Nodrau Veiwekani o Jisu kei Tamana

Era beitaki Jisu eso na Jiu ni beca na Siga ni Vakacecegu, e mani kaya o Jisu: “E cakacaka tiko ga o Tamaqu me yacova mai qo, au cakacaka tale tiko ga o yau.”​—Joni 5:17.

E sega ni vakatabui ena lawa ni Siga ni Vakacecegu na ka e cakava o Jisu. Nona cakacaka vakavunau kei na veivakabulai e vakatotomuria kina na nona dau caka vinaka na Kalou. Qori na vuna e caka vinaka kina e veisiga o Jisu. Ia e vakacudrui ira vakalevu na dauveibeitaki na ka e kaya o Jisu ra qai via vakamatei koya. Na vuna?

Era nanuma ni beca o Jisu na Siga ni Vakacecegu ena nona veivakabulai, era cudru tale ga vakalevu ni kaya e Luve ni Kalou. Era okata me vosavakacaca nona kaya o Jisu ni Kalou na Tamana, e vaka me vakatauvatani koya kina kei na Kalou. Sega ni rere o Jisu qai vakamacalataka vei ira nona veiwekani talei kei na Kalou. E kaya: “E lomani Luvena o Tamana, e vakaraitaka vua na ka kece e dau cakava.”​—Joni 5:20.

E Vunibula na Tamada, qai vakaraitaka qori ena veigauna sa oti ni solia na kaukaua ni veivakaturi vei ira eso. E tomana o Jisu: “Me vaka ga nona vakaturi ira na mate o Tamana qai vakabulai ira, o Luvena tale ga e vakabulai ira ga e vinakata.” (Joni 5:21) Qori e dua na ka totoka eda rawa ni vakanuinui kina ena gauna se bera mai! Ia ena gauna mada ga qo, sa veivakabulai tiko vakayalo na Luvena. E kaya kina o Jisu: “Au tukuna vakadodonu vei kemuni, o koya e rogoca noqu vosa qai vakabauti koya e talai au mai ena bula tawamudu, ena sega ni lewai, ia ena lakosivita na mate me bula.”​—Joni 5:24.

Me yacova mai na gauna qori, a se bera ni vakabula o Jisu e dua mai na mate, ia a kaya vei ira na dauveibeitaki ni na yaco dina na veivakaturi: “Sa voleka mai na gauna mera rogoca kina na domona o ira kece na tu ena ibulubulu nanumi mera tucake mai.”​—Joni 5:28, 29.

E vakatubuqoroqoro dina na ka ena cakava qori o Jisu, ia e vakamatatataka ni se cecere tiko ga na Kalou ni kaya: “Au sega ni cakava rawa e dua na ka vakataki au ga. . . . [Au] sega ni muria na lomaqu, na loma i koya ga e talai au mai.” (Joni 5:30) Ia e vakamacalataka o Jisu nona itavi bibi ena vakayacori ni inaki ni Kalou, se bera tiko ni cakava e matanalevu. Sega nira qai mai rogoca ga vei Jisu na dauveibeitaki na ka qori. E tukuna vei ira o Jisu: “Oni a tala eso na tagane vei Joni [na Dauveipapitaisotaki], e vakadinadinataka tale ga o koya na ka dina.”​—Joni 5:33.

Era sa rairai rogoca na dauveibeitaki ena rauta na rua na yabaki yani e liu, ni a tukuna o Joni vei ira na iliuliu ni lotu vakaJiu ni na qai muri mai o koya e vakatokai me “na parofita” kei na “Karisito.” (Joni 1:20-25) Sa vesu tu o Joni, era dau doka e liu na dauveibeitaki. E kaya kina o Jisu: “Oni via marautaka vakalekaleka ga na nona rarama.” (Joni 5:35) Ia o Jisu e ivakadinadina uasivi vei Joni na Dauveipapitaisotaki.

“Na cakacaka sara ga e lesi au kina o Tamaqu meu vakacavara au sa cakava tiko [okati kina na cakamana se qai vakayacora oti ga], au vakadinadinataka tale ga ni talai au mai o Tamaqu.” E tomana o Jisu: “Na Tamaqu e talai au mai e tukuni au tale ga.” (Joni 5:36, 37) Kena ivakaraitaki, na Kalou a tukuni Jisu ena gauna e papitaiso kina.​—Maciu 3:17.

E sega gona nodra iulubale ni cati Jisu o ira era beitaki koya tiko. Na iVolatabu mada ga era kaya nira dau dikeva e tukuni Jisu. Sa qai tinia o Jisu: “Ke oni vakabauti Mosese dina oni na vakabauti au tale ga, ni a vola o koya na ka e baleti au. Ia ke oni sega ni vakabauta na ka e vola, oni na qai vakabauta vakacava na noqu vosa?”​—Joni 5:46, 47.