Wase e 30

Sauma Nodra Vosa Era Daubeitaki Koya

NI RA beitaki Jisu na i liuliu ni lotu vaka-Jiu ni voroka na Siga ni Vakacecegu, sa qai sauma o koya: “Sa cakacaka tikoga ko Tamaqu, koi au talega, au sa cakacaka.”

E veitalia ga na veika era kaya voli na Farisi, na cakacaka i Jisu e sega ni vakatabui ena lawa ni Siga ni Vakacecegu. Na nona cakacaka vakavunau kei na veivakabulai na i lesilesi mai vua na Kalou, ia ena nona vakadamurimuria na i vakaraitaki ni Kalou, sa dauvakayacora tikoga kina o koya e veisiga. Ia, sa qai vakacudrui ira vakalevu sara na Jiu ka sega ni vakakina e liu na i sau ni taro i Jisu, ka ra vakasaqara na sala me ra vakamatei koya kina. Baleta?

Na vuna ni gauna oqo era sega ni vakadinata ni voroka duadua ga ko Jisu na Siga ni Vakacecegu, ia e kaya sara ga ni Luve ni Kalou, e sa vosa vakacacataka kina na Kalou. E sega ni bau rere ko Jisu, sa qai vakuria nona vakamacalataka vei ira na nona veiwekani lavotaki kei na Kalou. “Ni sa lomana na Luvena ko Tamana,” e kaya o koya, “a sa vakatakila vua na ka kecega sa kitaka ko koya.”

“Me vaka sa vakaturi ira cake na mate ko Tamana,” sa qai tomana nona vosa ko Jisu, “sa vakakina na Luvena o koya sa vakabulai ira sa vinakata.” Sa vakadina kina, na nona sa vakaturi ira cake oti na mate ena kedra i tuvaki vakayalo! “O koya sa rogoca na noqu vosa, ka vakabauti koya sa talai au mai,” sa kaya ko Jisu, “sa lako mai na mate ki na bula.” Io, e tomana nona vosa o koya: “Sa lako mai na gauna, ia sa yaco edaidai, me ra rogoca na domo ni Luve ni Kalou ko ira na mate: ia ko ira sa rogoca era na bula.”

E dina ga ni se bera ni bau volatukutukutaki ni sa vakabula dina e dua mai na mate ko Jisu, e tukuna vei ira na dauveibeitaki ni na yaco dina na nodra vakaturi na mate. “Dou kakua ni kurabui e na ka oqo,” e kaya ko Jisu, “ni sa lako mai na gauna era na rogoca kina na domona ko ira kecega e nai bulubulu, a ra na lako maikina.”

Me yacova mai na gauna oqo, e se sega ni bau tukuni koya ko Jisu me kilai na nona i tavi bibi ena i naki ni Kalou ena sala macala ka kilai tani. Ia e levu sara na i vakadinadina e tu me ra rai kina na daubeitaki Jisu mai na kena a vakarautaka o koya. “Dou a talaki vei Joni,” e tukuna ko Jisu me ra nanuma lesu, “a sa tukuna na ka dina ko koya.”

E rua ga na yabaki ni bera ni yaco oqo, a tukuna ko Joni na Dauveipapitaiso vei ira na i liuliu ni lotu vaka-Jiu me baleti Koya ka muri mai vua. Ni tukuna lesu vei ira na nodra a daudokai Joni e liu, o koya ka sa vesuki tu oqo, sa qai kaya ko Jisu: “Dou a vinakata vakadede vakalailai ga mo dou reki e na kena rarama.” E kauta lesu mai oqo ko Jisu me ra nanuma ena nona nuitaka tu me vukei ira, io, me vakabulai ira. Ia, e sega ni vakararavi o koya ena vakadinadina i Joni.

“A cakacaka oqo ka’u sa kitaka tiko [okati kina na cakamana a sa qai vakayacora oti ga], sa tukuni au, ni sa talai au mai ko Tamaqu.” Ia e kuria oqori, ko Jisu: “Ia ko Tamaqu, ko koya sa talai au mai, sa dautukuni au.” Me kena i vakaraitaki, e vakadinadinataki Jisu na Kalou, ena gauna sa papitaiso kina, ni a kaya o koya: “O koya oqo na noqu Gone ni toko, au sa dauvinakata vakalevu.”

E sega kina na nodra ulubale na beitaki Jisu tiko me ra cati koya. Na veitiki ni i Vola Tabu sara ga era tukuna voli ni ra dauvakadikeva era vakadinadinataki koya! “Kevaka dou a vakabauti Mosese, dou na vakabauti au,” sa qai tinia ko Jisu, “ni sa volai au ko koya. Ia kevaka dou sa sega ni vakadinata na nonai vola, dou na vakadinata vakaevei na noqu vosa?” Joni 5:17-47; 1:19-27; Maciu 3:17.

▪ Na cava e sega ni voroka kina na Siga ni Vakacecegu na cakacaka i Jisu?

▪ E vakamacalataka vakacava ko Jisu na nona i tavi bibi ena i naki ni Kalou?

▪ Me vakadinadinataka ni Luve ni Kalou, sa qai dusimaki cei ko Jisu me nona i vakadinadina?