Vakabula o Jisu na Luve ni Yada

A gole i Neini o Jisu ni vakabula oti ga na nona dauveiqaravi na turaganivalu. Na korolevu qori e tiko ena cevaira kei Kapenaumi qai 32 na kilomita na kedrau veiyawaki na vanua e rua. Era tomani koya na nona tisaipeli kei na dua na ilala levu. Sa karobo toka na vanua nira yaco yani ena ibili kei Neini. Era sotava e keri e levu na Jiu era gole tiko ena dua na veibulu. Sa colati tiko mai nakoro na yagona e dua na cauravou me lai bulu.

E rarawa vakalevu duadua o tinai cauravou. Sa yada tu mada, qo sa mate tale na luvena duabau ga. Se bau vinaka na gauna e mate kina o watina, ni se bula o luvena tagane. Macala ga ni rau na veivolekati dina, ni sa na vakatautaka vei luvena nona bula mai muri. Ni sa mate qo o luvena, o cei ena qai tiko kei koya se veitokoni?

E tarai Jisu sara ga na levu ni rarawa nei yalewa kei na vakaloloma ni kena ituvaki. E vosa vakayalololoma vua o Jisu qai vakayaloqaqataki koya ni kaya: “Kua ni tagi.” Oti e toro volekata yani qai tara na tavata e davo toka kina na yago i cauravou. (Luke 7:13, 14) Era tu vakadua sara ga na colata tiko na mate nira kurabuitaka na ka e tukuna qai cakava o Jisu. Era na rairai veinanuyaka e levu ‘na ibalebale ni vosa i Jisu kei na ka ena cakava.’

E levu era tomani Jisu tiko ena ilakolako qo era sa raica oti nona vakabulai ira vakacakamana na tauvimate. Ia era se sega ni raica me vakabula e dua sa mate. Sa yaco oti na veivakaturi ena gauna makawa sara, vakacava ena rawa ni cakava tale ga qori o Jisu? (1 Tui 17:17-23; 2 Tui 4:32-37) E vakarota o Jisu: “Cauravou, au tukuna vei iko, duri!” (Luke 7:14) E duri sara na cauravou qai vosa. E kurabui o tinana, ia e marau vakalevu ni sa bula tale o luvena. Sa na sega ni tiko duadua.

Nira raica na lewenivanua ni sa bula tale na cauravou, era vakacaucautaki Jiova na Vunibula nira kaya: “Sa basika ena keda maliwa e dua na parofita levu.” Era tukuna eso tale era kila na inaki ni nona cakava o Jisu na ka veivakurabuitaki ya: “Sa yalololoma na Kalou vei ira nona tamata.” (Luke 7:16) E tete totolo na itukutuku vakatubuqoroqoro ya ina veivanua voleka, rairai yaco sara ina koro i Jisu o Nasareci rauta ni 10 na kilomita kena yawa. Era bau rogoca mada ga na tiko mai Jutia ena ceva.

E se tiko ga e valeniveivesu o Joni na Dauveipapitaisotaki, dua na ka nona via kila na veika e vakayacora o Jisu. Era sa qai talanoataka na tisaipeli i Joni na cakamana i Jisu. Na cava e cakava o Joni?