Me Tu Vinaka Tu ga na Noda Vanua ni Sokalou
1. Cava na yaga ni Kingdom Hall?
1 Sa sivia na 94,000 na iwiliwili ni ivavakoso ni iVakadinadina i Jiova e vuravura raraba. Levu vei ira na ivavakoso oqo e nodra isotasota sara ga na Kingdom Hall. Oqo na vanua era tuberi kina ena sokalou savasava ena nodra lai vulica vata na iVolatabu kei na nodra veimaliwai.
2. Na cava e bibi kina me savasava tu ga qai kilikili na Kingdom Hall?
2 iTuvatuva ni Sasamaki: Na samaki ni Kingdom Hall e dua na tiki bibi ni noda veiqaravi tabu. E kaya na Cokonaki ena tabana e 61-2: ‘Mera raica na mataveitacini ni ka ni veivakalougatataki nodra tokona vakailavo na Kingdom Hall kei na nodra bolea mera qarava me savasava tu ga, me rairai totoka me dauvakavinakataki tu ga. E dodonu me rairai vinaka na Kingdom Hall kei na kena lomanibai me kua ni vakarogocataki kina na isoqosoqo i Jiova.’ E dau vakayagataki wasoma na Kingdom Hall ena dua na macawa, oya na vuna e bibi kina me dau samaki tu ga, vakavinakataki totolo tale ga na ka e ca. E kena ivakarau me qarava na veika oqo na ivavakoso ga e vakayagataka tiko na Kingdom Hall. Me vaka ga ena gauna vakaivolatabu, o keda tale ga na dauveiqaravi i Jiova nikua e dodonu meda saga meda “vakavinakataka” tiko ga na vanua ni noda sokalou.—2 Vei. 34:10.
3. E tuvanaki vakacava na samaki ni Kingdom Hall? O cei e rawa ni vakaitavi ena itavi bibi oqo?
3 E dodonu me kabi tiko ena papa ni itukutuku e dua na ituvatuva vakamacawa ni sasamaki. Na iwasewase ni vulivola yadua e dodonu me tuvai na gauna me sasamaki kina ena veimacawa, me qai muria ga na veika e sa navuci me caka. E bibi meda saga kece meda vakaitavi ena samaki ni Kingdom Hall e veimacawa, kei na kena sagai me kilikili tu ga na kena irairai. E rawa nira vakaitavi tale ga na gone ke tiko e dua me raici ira. Ena sala oqo, era na raica tale ga kina o ira na bibi ni itavi oqo. E bibi na veitokoni ena tikina oqo, vakauasivi ke vica na ivavakoso era vakayagataka vata tiko e dua ga na Kingdom Hall. Ena sala oqo, ena sega kina ni tarabi vei ira ga e vica na tiki ni noda sokalou oqo.
4. Na cava e dodonu me caka me kila kina na ivavakoso na ka me cakava ena gauna e samaki kina na Kingdom Hall?
4 E rawa ni vakavolai e so na ka me caka, qai vinaka me kabi ena vanua e maroroi kina na iyaya ni sasamaki. Na ka e vakavolai oqo me vakamatatataki kina na itavi me qaravi e veimacawa me vaka na tataviraki se domici ni benu ena kena misini, quwa ni katubaleka, quwa ni vata kei na teveli, kau laivi ni benu, vaka kina na quwa ni fuloa kei na iloilo ni titiro. E so na itavi ena sega beka ni gadrevi me caka sara vakawasoma me vaka na quwa vinaka ni idabedabe se lalaga, na sava ni latilati, kei na cina. Na wainimate kece ni sasamaki e dodonu me maroroi ena vanua era na sega ni yacova rawa na gone, e dodonu me volai tale ga vakamatata na yacadra kei na ivakavakayagataki ni wainimate yadua.
5. E vakacava sara mada na bibi ni qaqarauni? Cava e so na ka me na dau qarauni? (Raica na kato ena tabana e 4.)
5 Na vakacalaka e dua na ka eda na sega sara ga ni vinakata me yaco ena Kingdom Hall. (Vkru. 22:8) Ena vuku ni tikina oqo, sa vakarautaki kina ena kato ena tabana e 4 e so na ka me dau qarauni me kua kina ni yaco na vakacalaka.
6. E cicivaki vakacava na qaravi ni Kingdom Hall?
6 Vakavinakataki ni Kingdom Hall: E itavi ni ilawalawa qase me yadrava na vakavinakataki ni Kingdom Hall. Dau kena ivakarau me lesi e dua na qase se dauveiqaravi vakaitalatala me raica na vakayacori ni cakacaka. E qarava o koya na veika e baleta na Kingdom Hall. E qarauna me savasava tu ga, sega ni dua na ka e ca, me qai tu ena veigauna kece na ka me vakayagataki me vaka na pepa ni valelailai, wainimate ni sasamaki, kei na so tale. Me kua sara ga ni dua na ka e loma ni Kingdom Hall se tautuba me rawa ni vakavuna na vakacalaka. Ke rua se sivia na ivavakoso e vakayagataka vata e dua ga na Kingdom Hall, ena lesia na ilawalawa qase ni veivavakoso oqo e dua na komiti (operating committee) me raica na qaravi kei na vakavinakataki ni vale ni soqoni kei na kena lomanibai. Na komiti oqo ena cakacaka tiko ena ruku ni veidusimaki ni ilawalawa qase ni ivavakoso kece era vakayagataka tiko na Kingdom Hall.
7. (a) Na cava me dau caka vakayabaki me vakadeitaki kina ni tu vinaka tu ga na Kingdom Hall? (b) Na cava soti me na dau kauaitaki? (Raica na kato ena tabana e 5.)
7 Me dau dikevi vakayabaki na Kingdom Hall me laurai kina na ka e dodonu me vakavinakataki. Me ratou raica na qase me vakavinakataki sara na ka e se sega ni caka. Kena ivakarau mera sureti ga na dautukutuku mera vakavinakataka na veika e laurai ni ca. Na lewe ni ivavakoso kece e dodonu me kauaitaka na veika lalai sara mada ga e ca, qai sega tale ni lokuyara ena nona raica me vakavinakataki na veika oya.
8. Gauna cava e rawa nira veitaratara mai kina ena valenitabana na qase me baleta na qaravi ni so na iyaya ena Kingdom Hall?
8 Ke ra gadreva na qase e so na idusidusi me baleta na qaravi ni Kingdom Hall, mera qai volavola ga ina valenitabana. E rawa ni vakarautaki yani e so na idusidusi me baleta na qaravi ni irinicagi se iyaya cava tale e tiko ena Kingdom Hall.
9. Na cava me na caka ke gadrevi me saumi e dua na konitaraki?
9 Me Vakayagataki Vinaka na iLavo ni iVavakoso: E levu ga na cakacaka e caka e loma ni Kingdom Hall vaka kina e tautuba era qarava na bolecakacaka. Na nodra soli ira e ivakaraitaki ni loloma, e vakabula ilavo tale ga. Ke mani gadrevi me saumi e dua na konitaraki me qarava e so na cakacaka me vaka na pest control se vanai ni manumanu lalai, ripea vakalivaliva, se caka na paipo ni wai, era na raica na qase na kabani ena cakava vakavinaka sara na cakacaka oya. Era vakayacora oqo ena nodra vakarautaka e dua na ivakamacala volai ni cakacaka me caka se na iyaya e vinakati. Na ka era vakavola oqo ena vakau ina veikabani mera kila kina na kabani na cakacaka ena gadrevi me caka. Nira vakauta lesu mai na veikabani na itukutuku ni ka e rawa nira cakava kei na kena isau era lavaka, eratou sa na qai digia na qase na kabani ena ganita duadua me qarava na cakacaka. Oqo tale ga me na vakayacori kevaka mada ga e bole e dua na tacida me cakava na cakacaka, se vakauta mai e dua na ka e gadrevi ena kena isau e lavaka.
10. Na cava me caka me vakadeitaki kina ni sa vakayagataki tiko vakadodonu na ilavo ni ivavakoso?
10 Ke vica na ivavakoso era vakayagataka vata e dua na Kingdom Hall, me qai raica na operating committee me tiko vakatikitiki e dua na akaude ena baqe me maroroi kina e dua na uma ilavo me dau vakayagataki me baleta na Kingdom Hall. Ia, me qai vakarautaki e veivula e dua na ivolatukutuku vakailavo mera kila tiko kina na qase se vakayagataki tiko vakaevei na ilavo oya. Mera raica na qase me vakayagataki vakadodonu na ilavo ni ivavakoso.
11. Ke gadrevi me caka e dua na ripea levu se vakavoutaki na Kingdom Hall, na cava me caka?
11 Ripea Lelevu kei na Kena Vakavoutaki: Ke ratou nanuma na lewe ni operating committee me caka e dua na cakacaka levu ena Kingdom Hall, me qai vakaraitaka na komiti na ka e gadrevi ina ilawalawa qase ni ivavakoso era vakayagataka vata tiko na Kingdom Hall. Ke laurai ni gadrevi sara ga me caka e dua na ripea levu se me vakavoutaki sara ga na Kingdom Hall qai gadrevi kina na liga ni cakacaka mai na taudaku ni veivavakoso, me ratou qai veitaratara kei na valenitabana na ilawalawa qase. O ira na qase matua era na qai vakarautaka e so na ivakasala kei na idusidusi me baleta na cakacaka. Ke na vakayagataki kina e levu sara na ilavo, ena yaga me vakarautaki e dua na kena esitimeti, vakarogoi sara ena ivavakoso e dua na kena inakinaki.—Raica na Kato ni Taro ena Noda Cakacaka Vakaitalatala ni Feperueri 1994.
12. Eda na vakaraitaka vakacava ni ka dokai dina vei keda noda dau tiko ena noda soqoni ena Kingdom Hall?
12 E ka dokai dina noda dau mai sota vata ena Kingdom Hall! Meda kua vakadua ni dau vakalutu soqoni, se meda vakawaletaka. E rawa nida marautaka kece noda dau tiko ena soqoni ena noda vakaitavi kece ena taqomaki, qarauni, kei na vakasavasavataki ni noda Kingdom Hall. Oqo ena vakalagilagi kina na sokalou savasava, ena dokai tale ga kina na yaca i Jiova. Meda saga kece mada ga me tu vinaka tu ga noda vanua ni sokalou.
[Kato ena tabana e 4]
Veika me Qarauni
◻ Me dau tu vakarawarawa na taqe ni bokobuka, mera dau dikeva tale ga e veiyabaki na kenadau.
◻ Me rawarawa na curu i tuba, ke vakaikabakaba na Kingdom Hall, me kaukaua vinaka tu na kena bai se itautauri nida kaba cake se siro sobu.
◻ Me dau savasava tu ga qai maqosa na vanua ni maroroi iyaya, vale ni vakacegu, kei na vanua ni lili kote. Me kua ni biu kina e dua na ka e rawa ni vakavuna na kama, me kua nida lai biuta tu kina noda iyaya vakataki keda, me kua tale ga ni biu kina na benu.
◻ Me dau raici qai samaki e veigauna na delanivale kei na salasala ni wai.
◻ Me samaki vinaka na vanua e dau lakovi e tautuba kei na ikelekele ni motoka, me dau waqa vinaka na kena cina, me kua ni dua na ka e vakavuna na sisi kei na tarabe.
◻ Me dau raici na iyaya vakalivaliva kece, qai qarauni tu ga. Me kua ni yaco sara e dua na leqa meda qai yavala.
◻ Ke turu na vale, me vakavinakataki totolo sara de qai tete me levu na leqa.
◻ Me loka na Kingdom Hall ke sega ni dua e vakayagataka.
[Kato ena tabana e 5]
Qaravi ni Vale kei na iYaya
◻ Tuba: E savasava beka qai rairai vinaka na delanivale, lalaga, iboro, katubaleka, kei na ivakatakilakila ni Kingdom Hall?
◻ Lomanibai: E koti vinaka na co? Vakacava, e rairai vinaka tu na gaunisala, bai, kei na ikelekele ni motoka?
◻ Loma: Vakacava, e rairai vinaka tu na ibe se tile, na latilati, idabedabe, cina, paipo, kovate ni ivola, kato ni ripote, kei na papa ni itukutuku?
◻ iYaya: Era vinaka kece tu na cina, misini ni vosa, kei na irinicagi?
◻ Valenivakacegu: E savasava? Ke levu, era vinaka kece tu qai sega ni drodro tu ga na wai ni kedra taqe se ra tuturu tu na paipo?
◻ Ka Vakaivola ni iVavakoso: Era tu vinaka na ivola kece vakalawa? Ke dodonu me vakaleweni e veiyabaki na fomu ni ivakacavacava se dua tale na fomu, sa vakaleweni? Sa saumi ena kena gauna na lisi ni Matanitu, lisi ni iTaukei, kei na town rate?