Yaga ni Noda Vakamalumalumu ena Veiliutaki vaKalou

DODONU meda vakamalumalumu vei Jiova na Kalou Cecere Duadua ke da vinakata meda lewe ni isoqosoqo e cakava na lomana. Eda doka na veiliutaki i Luvena ena ivavakoso vaKarisito. E bibi tale ga meda rokova na ituvatuva ni veiliutaki vakalou ena noda bula kece. Ena yaga vei keda kece.

² A tekivu sara ga ena were o Iteni na bibi ni noda vakamalumalumu ena veiliutaki. E laurai qo ena ivakaro ni Kalou ena Vakatekivu 1:28 kei na 2:16, 17. Na tamata ena lewa na manumanu, me rau vakamalumalumu tale ga ena veiliutaki ni Kalou o Atama kei Ivi. Ni muri na veiliutaki vakalou, ena sega na duiyaloyalo kei na yakusurasura. E qai vakabibitaki e muri na ituvatuva ni veiliutaki vakalou ena 1 Korinica 11:3. E vola na yapositolo o Paula: “Au vinakata moni kila ni ulu ni tagane yadua o Karisito, e ulu ni yalewa na tagane, e ulu i Karisito na Kalou.” E dusia qo ni tiko na uluda meda vakamalumalumu kina, o Jiova duadua ga e sega ni vakamalumalumu vua e dua tale.

³ Levu nikua era sega ni kauaitaka na ituvatuva ni veiliutaki vakalou. Na vuna? Na leqa qo e tekivu mai Iteni ni rau sega ni vinakata na vuda me rau vakarorogo ena veiliutaki cecere i Jiova. (Vkte. 3:4, 5) Ia erau sega ni galala dina. Kena veibasai ni sa lewai rau e dua na kabula vakayalo ca, o Setani na Tevoro. Na imatai ni veivorati qo e vakavuna meda yawaka na Kalou. (Kolo. 1:21) Oya na vuna e levu ena gauna qo e lewai ira tu na vunica.—1 Joni 5:19.

⁴ Nida vulica na Vosa ni Kalou da qai muria, ena sega ni lewai keda o Setani. Nida yalataki keda, da papitaiso meda iVakadinadina i Jiova, eda vakabauta me noda iliuliu cecere duadua. Eda duavata kei Tui Tevita, ena nona kaya ni o Jiova na “ulu ni ka kece.” (1 Vei. 29:11) Io, eda vakatusa ena yalomalumalumu: “Moni kila ni o Jiova na Kalou. E buli keda o koya qai taukeni keda. Eda nona tamata, kei na sipi ni nona veico.” (Same 100:3) Eda kila ni cecere duadua o Jiova qai dodonu meda vakamalumalumu vua, ni bulia na ka kece. (Vkta. 4:11) Nida italatala ni Kalou dina, eda vakatotomuria na ivakaraitaki vakasakiti i Jisu Karisito ena nona vakamalumalumu vua na Kalou.

⁵ Na cava e vulica o Jisu ena veika rarawa e sotava ni bula voli e vuravura? E sauma na Iperiu 5:8: “E dina ni luvena, ia e vulica na talairawarawa mai na veika rarawa e sotava.” Io, e vakamalumalumu tiko ga o Jisu vei Tamana. Kena ikuri, e sega ni cakava rawa e dua na ka vakataki koya. E sega ni dau tukuna ga na ka e nanuma, e sega tale ga ni vinakata me dokai. (Joni 5:19, 30; 6:38; 7:16-18) Ena nona cakacaka vakaitalatala, e dau marau me vakayacora na loma i Tamana, e dina ni tusaqati qai vakacacani kina. (Joni 15:20) Io, e vakaraitaka o Jisu ni vakamalumalumu vua na Kalou. E “vakamalumalumutaki koya” mada ga me “mate ena kaunirarawa.” E yaga vakalevu na nona vakamalumalumu, rawa kina nida bula tawamudu, e vakacerecerei kina o koya, qai vakalagilagi o Tamana.—Fpai. 2:5-11; Iper. 5:9.

VEILIUTAKI VAKALOU MEDA TALAIRAWARAWA KINA

⁶ Nida vakamalumalumu vua na Kalou meda cakava na lomana, eda na sega ni nuiqawaqawa se yacovi keda na leqa era sotava o ira na bese ni vakamalumalumu vei Jiova. E saga tiko ga na keda meca na Tevoro me tilomi keda. Eda na vakabulai ke da tudei meda vorati koya da qai vakamalumalumu vei Jiova.—Maciu 6:10, 13; 1 Pita 5:6-9.

⁷ Ena ivavakoso, eda doka na veiliutaki i Karisito kei na lewa e solia vua na “dauveiqaravi yalodina e vuku.” Ena vinaka kina noda veimaliwai. Nida vakamalumalumu ena ivavakoso ena uqeti keda meda talairawarawa ena Vosa ni Kalou ena ka e vauca noda sokalou. Kena ivakaraitaki na noda cakacaka vakaitalatala, tiko ena soqoni kei na noda vakaitavi, veimaliwai kei ira na qase ni ivavakoso, kei na noda tokona na ituvatuva ni isoqosoqo.—Maciu 24:45-47; 28:19, 20; Iper. 10:24, 25; 13:7, 17.

⁸ Nida vakamalumalumu vua na Kalou eda na duavata, vakacegu qai cicivaki vinaka na ivavakoso. Era na vakaraitaka na itovo i Jiova o ira na vakamalumalumu vua. (1 Kor. 14:33, 40) Na veika eda raica ena isoqosoqo i Jiova e uqeti keda meda duavata kei na ka e cavuta o Tui Tevita. Ni raica na kedra duidui na dauveiqaravi i Jiova kei ira na tamata ca, e tukuna ena marau: “Era marau na tamata e nodra Kalou o Jiova!”—Same 144:15.

⁹ Ena bula vakawati kei na bula vakavuvale, e “ulu ni yalewa na tagane.” Ena gauna vata qori, me vakamalumalumu na tagane vei Karisito, ia e ulu i Karisito na Kalou. (1 Kor. 11:3) E dodonu mera vakamalumalumu na yalewa vei watidra, o ira na gone vei ira na itubutubu. (Efeso 5:22-24; 6:1) Era na bula vakacegu nira vakamalumalumu na lewenivuvale ena ituvatuva ni veiliutaki vakalou.

¹⁰ Dodonu me veiliutaki vakayalololoma na tagane vakawati, me vakataki Karisito. (Efeso 5:25-29) Ni sega ni veiliutaki vakasaurara se vakasavuliga, ena marautaka o watina kei ratou na gone me ratou vakamalumalumu vua. E itavi ni yalewa me ivukevuke, me kena isa vinaka. (Vkte. 2:18) Ni veitokoni qai veidokai ena ka talei vei watina qai vakalagilagi kina na Kalou. (1 Pita 3:1-4) Ni rau muria na veiwatini na ituvatuva ni veiliutaki ena iVolatabu, erau ivakaraitaki vinaka vei ira na gone mera vakamalumalumu vua na Kalou.

¹¹ Nida vakamalumalumu vua na Kalou ena laurai tale ga ena noda dokai ira “na iliuliu cecere,” ni se “vakatara na Kalou” mera veiliutaki. (Roma 13:1-7) Era dau muria na lawa na lotu vaKarisito, oya na vuna era sauma kina nodra ivakacavacava; era solia lesu vei “Sisa na ka e nei Sisa, vua na Kalou na ka e nona na Kalou.” (Maciu 22:21) Kena ikuri, me salavata kei na lawa ni vanua na kena tarai na yalava. Nida vakamalumalumu da qai talairawarawa vei ira na veiliutaki ena ka kece e salavata kei na lawa savasava i Jiova, eda rawa ni vakayagataka na noda kaukaua kei na igu ena cakacaka vakavunau.—Mari. 13:10; Caka. 5:29.

¹² Ena yaga ena noda bula kece nida talairawarawa ena veiliutaki vakalou. E vaka ga nida raica na gauna sa na vakamalumalumu kece kina vua na Kalou na kawatamata. (1 Kor. 15:27, 28) Era na vakalougatataki dina o ira era doka na veiliutaki cecere i Jiova ra qai vakamalumalumu tiko ga vua me tawamudu!