Totogitaki na Ranadi Ca

Ni vakararai toka o Tui Eapi ena katubaleka ni nona vale mai Jesirieli, e raica sara nona loganivaini e dua na turaga, na yacana o Nepoci. E vinakata me volia na loganivaini ya me nona. Ia e bese ni volitaka o Nepoci ni vakatabui ena Lawa i Jiova me volitaki na tikiniqele e votai vei ira. Vakacava e duavata o Eapi kei na vakatulewa i Nepoci me cakava ga na ka dodonu? Sega, e cudru vakalevu o Eapi. Na levu ni nona rarawa, e sega mada ga ni biuta nona rumunimoce, e bese tale ga ni kana.

E vosa vei Eapi o watina, na marama ca o Ranadi Jesepeli. E kaya: ‘O iko na tui Isireli. E rawa ni nomu na ka ga o vinakata. Au na solia vei iko na tikiniqele ya.’ E volavola sara o Jesepeli vei ira na qase era tiko ena koro. E tukuna vei ira mera beitaki Nepoci ni vosavakacacataka na Kalou, mera vakaviriki koya tale ga ena vatu. Era cakava na qase na ka e tukuna vei ira o Jesepeli. E kaya vei Eapi o watina: ‘Sa mate o Nepoci. Sa nomu na loganivaini.’

E levu na tamata vinaka e vakamatea o Jesepeli, sega ni o Nepoci ga. Levu era lomani Jiova. E dau qaravi matakau o Jesepeli, e cakava tale ga e levu na ka ca. A raica kece tu qori o Jiova, na cava ena cakava vua?

Ni sa mate o Eapi, e tui sara na luvena o Jorami. E qai tala o Jiova e dua na turaga na yacana o Jeu, me totogitaki Jesepeli kei na nona vuvale.

E mani vodo o Jeu ena nona qiqinivalu me lako i Jesirieli, na itikotiko nei Jesepeli. E vodo sara o Jorami ena nona qiqinivalu me tavaki Jeu, e taroga: ‘Vakacava o gole mai ena vakacegu?’ E sauma o Jeu: ‘Au sega ni gole mai ena vakacegu ni caka ca tiko o Jesepeli na tinamu.’ A via vagolea o Jorami na nona qiqinivalu me dro. Ia e vanai koya o Jeu ena gasau, mani mate.

E lako sara o Jeu ena vale nei Jesepeli. Ni rogoca ni sa lako tiko yani o Jeu, e boroya na matana, ukutaka na uluna qai wawa toka ena yasa ni katubaleka mai cake. Ni yaco yani o Jeu, e sega ni marautaki koya yani. E kailavaka o Jeu vei ratou na yadravi Jesepeli tiko: ‘Dou kolotaki koya mai!’ Eratou qai biligi koya yani ena katubaleka, e lutu ina qele mani mate.

Oti qori e qai vakamatea o Jeu e 70 na tagane era luvei Eapi, e vakasavasavataka tale ga na vanua mera kua ni tiko kina na qaravi Peali. Vakacava o vakadeitaka ni kila o Jiova na ka kece qai totogitaki ira na caka ca ena kena gauna donu?