Turaganivalu kei na Goneyalewa Lailai

E tiko e Siria e dua na goneyalewa lailai ni Isireli. Era kauti koya e kea na mataivalu ni Siria, e yawa sara mai na nona vanua. E lai veiqaravi vei wati Neamani na turaganivalu. E qaravi Jiova na goneyalewa qo, ia era sega ni cakava qori na tu wavoliti koya.

E tauvi Neamani e dua na matenikuli rerevaki, e mosi tu ga e veigauna. Dua na ka nona via vukei koya o goneyalewa lailai. E kaya vei wati Neamani: ‘Au kila tiko e dua e rawa ni vakabulai watimuni, e tiko e Isireli. Na yacana o Ilaisa, e parofita i Jiova. Ena vakabulai koya.’

E tukuna sara vei Neamani o watina na ka e tukuna o goneyalewa lailai. Dua na ka nona via bula o Neamani, mani gole i Isireli ina vale nei Ilaisa. E namaka me dokai koya o Ilaisa, ya me mai tavaki koya. Ia e tala ga o Ilaisa nona dauveiqaravi me tukuna vua: ‘Mo lai sili vakavitu ena uciwai na Joritani, o na qai bula.’

E cudru sara ga o Neamani. E kaya: ‘Au nanuma ni na masu vua na nona Kalou na parofita qo, me dodoka na ligana me vakabulai au. Qo e tukuna meu lai sili ena uciwai e Isireli. E vinaka cake na uciwai e Siria. Vakacava meu lako ga i kea?’ E cudru o Neamani, mani biubiu mai na vale nei Ilaisa.

Ratou uqeti Neamani nona dauveiqaravi me vakasamataka vinaka na ka me cakava. Ratou kaya: ‘Oni via bula? E rawarawa sara na ka e tukuna na parofita. Vakacava moni cakava ga?’ E mani rogoci ratou, e lako ina uciwai na Joritani qai nunu vakavitu ena uciwai. Ni lamata mai wai o Neamani ena ikavitu ni gauna, sa oti na kena mate. Dua na ka nona marau, mani lesu me vakavinavinakataki Ilaisa. E kaya: ‘Au sa qai kila ni Kalou dina ga o Jiova.’ Ena marau mada ga na goneyalewa lailai ni Isireli ni raica ni sa bula o Neamani mai na kena mate, se vakacava?