Vakavulica na Luvemu

E Lomana me Veivuke

O BAU kila e dua a tauvimate bibi?​— Sa na wacava nomu vinakata mo vukei koya. Vakacava ke cavutu mai na dua tale na vanua se duidui nona lotu? O na via vukei koya tiko ga me rawa ni bula vinaka tale?​— A cakava qori e dua na goneyalewa ni Isireli rauta na 3,000 na yabaki sa oti. Meda raica mada se cava a yaco.

Erau dau veiraravui vakalevu o Siria kei Isireli, na vanua e vakaitikotiko kina na goneyalewa lailai oya. (1 Tui 22:1) Ena dua na siga, era lako yani i Isireli na kai Siria, ra qai vesuki koya na goneyalewa lailai. A kau sara i Siria me lai nona dauveiqaravi na wati Neamani na kavetani ni mataivalu ni Siria. A tauvi vukavuka tu o Neamani, na mate ca qo e rawa ni midra kina na yago.

Na goneyalewa ni Isireli a qai tukuna vei wati Neamani na ka me caka me bula kina o watina. E kaya: ‘Ke a tiko mai Samaria o Neamani, ena vakabulai koya mai na vukavuka na parofita i Jiova o Ilaisa.’ Na ivakarau ni nona tukuni Ilaisa na goneyalewa qo e lai vakabauta kina o Neamani ni na rawa ni vakabulai koya o Ilaisa. Ena veivakadonui i Penietati na tui Siria, a gole o Neamani kei na so na dauveiqaravi ena dua na ilakolako balavu, rauta ni 150 na kilomita me lai vaqarai o Ilaisa.

Eratou gole e liu vei Jiorami na tui Isireli me vakaraitaki vua na ivolakerekere nei Tui Penietati me vukei o Neamani. Ia o Jiorami e sega ni vakabauti Jiova kei Ilaisa na parofita. E nanuma ga o Jiorami ni via vaqara vala o Penietati. Ni rogoca o Ilaisa na ka e yaco, e tukuna vei Tui Jiorami: “Me lako mada mai vei au ko koya.” A vinakata o Ilaisa me vakaraitaka vei Neamani ni rawa ni vakabulai ena kaukaua i Jiova.​—2 Tui 5:​1-8.

Ni yaco ena vale i Ilaisa o Neamani ena nona ose kei na nona qiqinivalu kareti, a tala o Ilaisa e dua na nona dauveiqaravi me tukuna vei Neamani: ‘Mo lai sili vakavitu ena uciwai na Joritani, o na qai bula.’ Qori e vakacudrui Neamani, ni a namaka me gole yani i tuba o Ilaisa me vakabulai koya. Ia a qai lai tavaki koya ga na nona dauveiqaravi o Ilaisa! E cudru o Neamani qai vakanadaku me lesu.​—2 Tui 5:​9-​12.

Na cava o na cakava ke o dua vei ira na dauveiqaravi i Neamani?​— Io, era tarogi Neamani na nona dauveiqaravi: ‘Ke tukuna vei iko na parofita e dua na ka dredre mo cakava, o na sega beka ni cakava? Vakacava mo cakava na ka rawarawa e tukuna vei iko​—sili mo rawa ni vakasavasavataki?’ A muria o Neamani na ka era kaya. E gole “sobu ko koya, ka silimi koya vakavitu e na Joritani . . . , a sa bula tale na lewena me vaka na lewe ni gone lailai.”

E lesu vei Ilaisa o Neamani qai tukuna vua: “Raica, au sa qai kila ni sa sega e dua na Kalou e vuravura taucoko, e Isireli duaduaga.” A yalataka tale ga ni na sega tale ni ‘vakacabora na isoro kama, se dua na imadrali vei ira na kalou tani, vei Jiova duadua ga.’​—2 Tui 5:​13-​17.

O vinakata mo vakataki koya na goneyalewa lailai ni Isireli, mo vukea tale ga e dua me kilai Jiova, me kila tale ga na veika ena cakava?​— Ni se bula voli e vuravura o Jisu, a vakabauti koya e dua na turaga vukavuka qai kaya vua: ‘Ke oni vinakata, oni na vakasavasavataki au.’ O kila na cava a qai tukuna o Jisu?​— “Au sa vinakata.” A vakabulai koya o Jisu me vaka ga nona vakabulai Neamani o Jiova.​—Maciu 8:​2, 3.

O kila ni na vakarautaka o Jiova e dua na vuravura vou eda na bulabula vinaka da qai bula tawamudu kina?​— (2 Pita 3:​13; Vakatakila 21:​3, 4) Sega ni vakabekataki ni o na vinakata mo tukuna vei ira tale e so na veika totoka qori!

Taro:

○ A vukei Neamani vakacava e dua na goneyalewa lailai, o cei era kauti koya vakavesu?

○ Na cava a dredre kina vei Neamani me vakarorogo vei Ilaisa ena imatai ni gauna, na cava e veisau kina na lomana?

○ Na cava mo cakava mo ucui koya kina na goneyalewa ni Isireli?

○ Na cava a via cakava o Jisu, na cava ena marautaki kina na bula ena vuravura vou ni Kalou?