Vakavulica na Luvemu
A Yalokaukaua, ia a Qai Vakarorogo
O BAU yalokaukaua ena dua na gauna qai sega ni via vakarorogo?—a De dua o sarava e dua na porokaramu ni tivi erau vakatabuya na nomu itubutubu. Ni o qai vakasamataka e muri, o rairai veivutunitaka sara ga na nomu talaidredre. Dua na kena ivakaraitaki o Neamani, a talaidredre ena dua na gauna. Meda raica mada se a vukei vakacava me kua ni yalokaukaua.
Raitayaloyalotaka mada nida bula tu ena 3,000 na yabaki sa oti. E turaga rogo o Neamani, na turaganivalu ni Siria. E dau matau vua me tukuna vei ira na nona sotia na ka mera cakava ra qai dau talairawarawa vua. Ia a tauvi Neamani e dua na mate ni kuli, na vukavuka. E rairai mate mosimosi qori, qai vakarairaicataki koya.
O wati Neamani e dua tiko na nona dauveiqaravi goneyalewa lailai mai Isireli. E tukuna ena dua na siga na goneyalewa lailai qori vei wati Neamani ni tiko mai na nona vanua e dua na turaga o Ilaisa, e rawa ni vakabulai Neamani. Ena gauna e rogoca kina na itukutuku qori o Neamani, e gu sara ga me lai raici Ilaisa. E kauta e levu na iloloma, qai lako vata kei ira na nona sotia e Isireli. E lai vakaraitaka sara vua na tui kei Isireli na vuna e lako yani kina.
Ni rogoca qori o Ilaisa, mani vakauta e dua na itukutuku vua na tui me talai yani vua o Neamani. Ni yaco yani ena vale i Ilaisa o Neamani, e tala sara o Ilaisa e dua me lai tukuna vei Neamani me sili vakavitu ena Uciwai na Joritani. E tukuna o Ilaisa ni na bula o Neamani ke cakava qori. Na cava o nanuma ni na cakava o Neamani ni rogoca oya?—
E cudru sara ga. E yalokaukaua qai sega ni via muria na ka e tukuna na parofita ni Kalou. E tukuna vei ratou na nona sotia: ‘E vinaka cake meda lai sili ena veiuciwai era tu mai Siria.’ Oti a biubiu sara. Ia o kila na cava eratou qai taroga na nona sotia?— ‘Ke a dredre na ka a kerea na parofita, o na cakava? Ia me vaka ni sega ni dredre na ka e kerea, vakacava mo muria?’
E vakarorogo o Neamani qai cakava na ka eratou tukuna nona sotia. E lade vaka ono ena uciwai. Ni cabe mai ena ikavitu ni gauna, dua na ka nona kurabui ni sa oti nona vukavuka! Sa vinaka tale na ituvaki ni yagona! E gole lesu vei Ilaisa rauta ni 48 na kilomita me lai vakavinavinakataki koya. E vinakata me solia vua na iloloma sau levu, ia e sega ni vinakata na parofita me ciqoma e dua na ka.
Sa qai tarogi Ilaisa o Neamani. O kila na ka a taroga?— ‘Mo solia vei au eso na qele me vodo ena rua na meule meu kauta i vale.’ O kila na vuna e vinakata kina qori?— E tukuna o Neamani ni via cabora na isoro vua na Kalou ena qele mai na nodra vanua na Isireli, nira tamata ni Kalou. Mani yalataka o Neamani ni na sega vakadua ni qarava e dua tale na Kalou, o Jiova duadua ga! E oti sara ga nona yalokaukaua, ia e yalorawarawa me vakarorogo vua na Kalou dina.
O raica na sala mo vakatotomuri Neamani kina?— Ke o dau yalokaukaua me vakataki koya, o rawa ni veisau. Ke o ciqoma na veivuke, o na sega tale ni yalokaukaua.
Wilika ena Nomu iVolatabu
[iVakamacala e ra]
a Ke o wiliwili tiko kei na dua na gone, mo cegu ni o raica na itoqa balavu o qai uqeti gone me tukuna na nona nanuma.