Ratou Sega ni Tarovi Rawa

E dua na tagane lokiloki e dau dabe e veisiga ena matamata ni valenisoro me kerekere. Dua na yakavi, e raici Pita kei Joni ni rau lako tiko ina valenisoro. E kaya vei rau: ‘Yalovinaka, drau solia mada vei au e dua na ka.’ E sauma o Pita: ‘Au na solia vei iko na ka e yaga mai na ilavo. Ena yaca i Jisu, tucake, mo lako!’ E vukei koya o Pita me duri, mani lako rawa na tagane ya! Dua na ka nodra marau na ilala levu ena cakamana qori, era mai vakabauta e levu tale.

Ia era cudru na bete kei na Setoki. Era tauri rau na yapositolo, era kauti rau ina mataveilewai, ra qai kaya: ‘Ena kaukaua i cei drau vakabula kina na tagane qo?’ E kaya o Pita: ‘E vakaukauataki keirau o Jisu Karisito oni a vakamatea.’ Era kailavaka na iliuliu ni lotu: ‘Drau kua tale ni cavuta na yaca i Jisu!’ Ia rau kaya na yapositolo: ‘Keirau na sega ni galu. Keirau na tukuni koya ga.’

Ni rau sere o Pita kei Joni, rau lako sara vei ira na vo ni tisaipeli me rau tukuna na ka e yaco. Era qai kerei Jiova ena masu: ‘Yalovinaka ni vakadoudoutaki keimami me vakayacori kina nomuni cakacaka.’ E solia vei ira o Jiova na yalona tabu, era mani tomana nodra vunau kei na veivakabulai. Sa qai levu tiko ga era mai vakabauta. Na levu ni nodra vuvu na Setoki era vesuki ratou na yapositolo qai biuti ratou e valeniveivesu. Ia ena bogi, e tala mai o Jiova e dua na agilosi me dolava na katuba ni valeniveivesu qai tukuna vei ratou: ‘Dou lesu ina valenisoro, dou lai veivakavulici kina.’

Ena mataka, e tukuni vei ira na lewe ni Sanadrini, oya na mataveilewai ni iliuliu ni lotu: ‘E se loka tu ga na valeniveivesu, eratou sa yali na tagane oni vesuka! Eratou veivakavulici tiko ena valenisoro!’ Era vesuki ratou tale na yapositolo, ratou kau ina Sanadrini. E kaya na bete levu: ‘Keimami vakaroti kemudou mo dou kua ni tukuna na veika me baleti Jisu!’ Ia e kaya o Pita: “E dodonu me keitou talairawarawa ga vua na Kalou ni iliuliu, sega vua na tamata.”

Era via vakamatei ratou sara ga na yapositolo na iliuliu ni lotu ena levu ni nodra cudru. Ia e kaya e dua na Farisi, na yacana o Kamelieli: ‘Ni qarauna! De tokoni ratou na tagane qo na Kalou. Vakacava oni via vala kei na Kalou?’ Era mani rogoci koya. Eratou kuitalaki na yapositolo, eratou vakaroti tale me ratou kua ni vunau, oti ratou qai sereki. Eratou vunautaka tiko ga ena doudou na itukutuku vinaka ena valenisoro kei na veivale.