‘Meda Talairawarawa Vua na Kalou, Me Kua Ga Vua na Tamata’

‘E Dredre me Keitou Kua ni Tukuna na Veika me Baleti Jisu’

ENA yabaki 33 S.K. a caka kina e dua na veivaqaqai ena loma ni rumu vakasakiti ni nodra mataveilewai levu na Jiu, e Jerusalemi. E vaqaqai ratou kina na 12 na imuri i Jisu Karisito na Sanadrini. Na vuna? Baleta ni ratou vunautaki Jisu tiko. Oqo e sa ikarua ni gauna me rau tu kina ena mataveilewai na yapositolo o Pita kei Joni, ia sa qai imatai ni gauna vei ratou na vo ni yapositolo.

A vosa na bete levu vei ratou na 12 na yapositolo me baleta e dua na ivakaro a solia na mataveilewai ena dua na gauna e liu. Eratou sa vakaroti oti me ratou kua ni vunau ena yaca i Jisu. Ena veivakaroti e liu oya, erau a sauma kina o Pita kei Joni: “Mo ni lewa ga se sa dodonu se segai e na mata ni Kalou me keirau vakarorogo vei kemuni ka kua vua na Kalou: ni sa dredre vei keirau me keirau kua ni tukuna na veika keirau a raica ka rogoca.” Nira kerea oti ena masu na tisaipeli i Jisu me soli vei ira na doudou, era tomana tiko ga nodra vunautaka na itukutuku vinaka.​​—Cakacaka 4:​18-​31.

Ni kila na bete levu ni matewale nona sasaga ena imatai ni gauna me vagalui ratou, sa qai kaya ena ikarua ni veilewai oqo: “Keitou a sega beka ni vakarota matua vei kemudou, mo dou kakua ni vakatavuvuli e na yaca oqo, oi? ka raica, dou sa vakasinaiti Jerusalemi e na nomudoui vakavuvuli, dou sa nakita talega me keitou tarogi e na dra ni tamata oqo.”​​—Cakacaka 5:​28.

Eratou Tabuvakasuka

Ena yalodei sa qai kaya o Pita kei iratou na yapositolo: “Sa kilikili kei keitou me keitou talairawarawa vua na Kalou, me kakua ga vei ira na tamata.” (Cakacaka 5:​29) O koya gona, ni yaco na ituvaki e veisaqasaqa kina na ivakaro ni tamata kei na ivakaro ni Kalou, sa macala tu ga nida na talairawarawa vei Jiova.a

Na vosa eratou a cavuta na yapositolo a dodonu sara ga me rawa na yalodra na lewe ni Sanadrini. Ni oqo o ira na nodra iliuliu na Jiu, kevaka gona mera tarogi se o cei me talairawarawa taumada kina na tamata, sa dodonu ga mera kaya kece: “Talairawarawa vua na Kalou.” Vakauasivi nira vakabauta tale ga ni Kalou e Turaga Cecere e lomalagi kei vuravura.

Kena irairai ni a vosa tiko o Pita ena vukudratou na vo ni yapositolo, e kaya ni nodratou cakacaka vakavunau e vakaraitaka ni ratou talairawarawa tiko vua na Kalou, sega vua na tamata. Ena sala oqo sa sabaya kina na nodratou beitaki ni ratou a talaidredre. Ia, era kila na lewe ni Sanadrini na itukutuku ni veika a sotava o Isireli ena veigauna sa oti, oya ni a tiko na gauna a dodonu ga me ia na talairawarawa vua na Kalou, sega vua na tamata. Kena ivakaraitaki, rau a sega ni rerevaki Fero na dauveivakasucumi e Ijipita, ia erau a rerevaka na Kalou ena nodrau vakabulai ira na gonedramidrami tagane era vakasucuma na yalewa Iperiu. (Lako Yani 1:​15-​17) A talairawarawa o Tui Esekaia vei Jiova, a sega ni vakarorogo vei Tui Senakaripi ena gauna a vakasaurarataki kina me soro. (2 Tui 19:​14-​37) E vakabibitaki gona ena iVolatabu Vakaiperiu ni o Jiova e dau namaki ira nona tamata mera talairawarawa vua, ra qai kila vinaka oqo na lewe ni Sanadrini.​​—1 Samuela 15:​22, 23.

E Vakalougatataki na Talairawarawa

Kena irairai ni a tarai koya sara ga e dua na lewe ni mataveilewai levu na matavosa, “Sa kilikili kei keitou me keitou talairawarawa vua na Kalou, me kakua ga vei ira na tamata.” Na vosa oqo a tarai Kamelieli, e dua na turaganilewa ni Sanadrini e dau dokai vakalevu. Laurai oqo ena nona vosa vei ira wale ga na lewe ni mataveilewai, a uqeti ira mera rogoca na nona ivakasala. A kauta cake mai o Kamelieli e so na ka sa yaco oti, me dusia ni sega ni ka vakavuku me tarovi na nodratou cakacaka na yapositolo. Sa qai tinia ena nona kaya: “Dou kakua soti ni kitaki iratou na tamata oqo, dou laivi iratou ga: . . . de dou na kunei beka ni dou sa veivala kei na Kalou.”​​—Cakacaka 5:​34-​39.

E rogoca na ivakasala momona i Kamelieli na mataveilewai levu, ratou mani sereki sara na yapositolo. Dina ga ni ratou vakanakuitataki, ratou a sega ga ni rere na yapositolo ena ituvaki oqo. E kuria na ivolatukutuku ena iVolatabu: “E na veisiga kecega e na vale ni soro, kei na veivale kecega, era sa sega ni mudu ni vakatavuvuli ka vunautaki Jisu ni sai koya na Karisito.”​—Cakacaka 5:42.

Ratou a vakalougatataki vakalevu na yapositolo baleta ni ratou vakadeitaka ni sega ni dua e uasivita na veiliutaki ni Kalou! E tiko tale ga vei ira na lotu Vakarisito dina nikua na rai oqo. Era raica na iVakadinadina i Jiova me nodra iLiuliu Cecere Duadua na Kalou o Jiova. Kevaka e soli vei ira na ivakaro e veisaqasaqa kei na ivakaro ni Kalou, era na sauma ga me vakataki ratou na yapositolo: ‘Meda talairawarawa vua na Kalou, me kua ga vua na tamata.’

[iVakamacala e ra]

[Kato/​iYaloyalo ena tabana e 9]

O BAU VAQAQA BEKA?

E kila vakacava o Luke na ka e tukuna o Kamelieli ni a vosa tiko vei ira wale ga na lewe ni Sanadrini? De dua e vakatakila vakadodonu na Kalou vei Luke na vosa i Kamelieli. Dua tale, e rawa ni a vakasavuya o Paula (a dua vei ira na gonevuli i Kamelieli) vei Luke na ivakamacala nei Kamelieli. Se, a kerea beka o Luke e dua vei ira na lewe ni mataveilewai a duavata kei na nodratou rai na yapositolo, me tukuna vua na ivakamacala i Kamelieli.