iVola Mai na iLawalawa Dauvakatulewa

Kemuni na Neitou iTokani Vakabauta:

Nida dauveiqaravi i Jiova, eda taleitaka nona Vosa na iVolatabu. Eda nuidei ni donu na ka e volai kina, e nuitaki na kena ivakasala, e vakaraitaka tale ga nona lomana o Jiova na kawatamata. (Same 119:105; Luke 1:3; 1 Joni 4:19) E gu na lomada meda vukea eso tale mera kila na dina e tu ena iVolatabu. Keitou marau vakalevu ena kena vakarautaki na ivola “Vuli Mai na iVolatabu.” Me keitou vakamacalataka mada vakalekaleka.

E vakarautaki sara ga na ivola qo me baleti ira na gone. E rawa tale ga ni yaga vei ira na qase era via kila vinaka na itukutuku ena iVolatabu. E vakarautaki na iVolatabu me baleti keda kece, ena yaga gona na ka eda vulica kina.

Ni yavutaki ena iVolatabu, e talanoataki ena ivola qo na itukutuku me baleta na kawatamata me tekivu mai na gauna ni bulibuli. E sagai me rawarawa, matata, me muria tale ga na veitaravi ni ka e yaco ena iVolatabu.

E levu tale na yaga ni ivola qo. Na lewe ni ivola kei na kena iyaloyalo eda na raitayaloyalotaka kina na ka e yaco, kei na veika era vakila o ira na talanoataki.

Eda na vulica na kedra italanoa o ira na talairawarawa vei Jiova kei ira na talaidredre. E uqeti keda meda vuli mai na nodra ivakaraitaki. (Roma 15:4; 1 Korinica 10:6) E 14 kece na iwasewase ni ivola qo. E vakamacalataki vakalekaleka ena itekitekivu ni iwasewase yadua na veika ena vulici kina.

Ke o itubutubu, o rawa ni wilika vata kei luvemu e dua na wase, drau veivosakitaka na kena iyaloyalo. Rawa tale ga ni drau wilika vata na tikinivolatabu e yavutaki kina. Vukei luvemu me kila na veisemati ni ka e wilika ena iVolatabu kei na ka e vulica ena ivola. Rawa ni muri tale ga qori me vukei kina e dua e qase.

Keitou nuitaka ni na yaga na ivola qo vei ira na qase kei na gone yalomalumalumu, mera vulica na itukutuku ena Vosa ni Kalou ra qai bulataka. Nira cakava qori, era na mai qaravi koya mera lewe ni nona vuvale lomani.