KATO NI VEIVAKAVULICI 1B
iVakamacala Lekaleka ni Isikeli
Rawa ni wasewasei na ivola i Isikeli me vaka e tuvai toka qo e ra:
WASE 1 INA 3
Ena 613 B.G.V. ni bula tu o Isikeli kei ira na Jiu era a kau vakavesu i Papiloni, a raica na raivotu i Jiova, qai vakaroti me parofisai vei ira na Jiu era tiko ena batiniuciwai na Kipa.
WASE 4 INA 24
Ena maliwa ni 613 kei na 609 B.G.V., a parofisaitaka kina o Isikeli na lewa ena tau vei Jerusalemi kei ira na kena lewenivanua ena nodra talaidredre, nodra qaravi matakau tale ga.
WASE 25 INA 32
A tekivu nodra iotioti ni wavokita na koro o Jerusalemi na kai Papiloni ena 609 B.G.V. Sa veisau na itukutuku ni veilewai i Isikeli vei Jerusalemi, qo sa tau vei ira na kena meca era tu wavoliti koya, qo o Amoni, Itomi, Ijipita, Moapi, Filisitia, Saitoni kei Taia.
WASE 33 INA 48
Tekivu ena 606 B.G.V., ni se tu mai vakayawa o Jerusalemi kei na irusarusa ni kena valenisoro, sa veisau kina na itukutuku i Isikeli, qo e sa baleta na inuinui, na kena vakalesui mai na sokalou savasava vua na Kalou o Jiova.
E tuvai gona na ivola i Isikeli ena ka e yaco veitaravi kei na kena ulutaga. E liu mai na parofisai me baleta na rusa i Jerusalemi kei na kena valenisoro, qai muri e vica vata na parofisai e vauca na vakalesui mai ni sokalou savasava. E donu vinaka qori ni kilai mai na parofisai me baleta na vakalesui mai ni sokalou savasava ni sa oti na sokalou ena valenisoro.
Na parofisai tale ga i Isikeli me baleta na veimatanitu era kedra meca na Isireli (wase 25 ina 32) e volai donuya na itukutuku ni veilewai me baleti Jerusalemi kei na parofisai me baleta na vakalesui mai ni sokalou savasava. E tukuna kina e dua na dauvakadidike ena itukutuku ni veilewai i Isikeli me baleti ira na veimatanitu: “E donu vinaka na kena veisau na itukutuku ni nona cudru na Kalou ina nona yalololoma vei ira na nona tamata. Na nodra totogitaki tale ga na meca e dusia na nodra vakabulai na nona tamata.”