Cava na Ki ni Rawaka?
RAU saga tiko e rua na cauravou mamakutu ena nodrau maqosa taucoko me rau vakasodora vata na gacagaca ni dua na misini e duatani sara na kena irairai, me rawa ni vakatovolei. Ia e vakasauri ga na kena laveta e dua na batinicagi kaukaua na gacagaca vakamareqeti ni misini oqo qai bitalaka i ra. Rau yalolailai sara ga na cauravou, rau mai duri galugalu tu yani. Sa veiveveyaki qai veibinibini tu na kau kei na gacagaca tale e so ni misini, sa maumau na buno kei na maqosa ni nodrau cakacaka.
Na ka e yaco oya ena Okotova 1900, e sega ni kena imatai me tini botoilevu kina na nodrau cakacaka o Orville kei Wilbur Wright. Rau saga tiko me rau bulia e dua na misini me vuka, dina ni bibi cake mai na cagi. Sa vica vata na yabaki na nodrau vakatovotovo tiko mai, e levu tale ga na ilavo e kania.
Ia e sa qai yaga na nodrau sasaga. Mai Kitty Hawk, North Carolina, e Mereke, ena 17 Tiseba, 1903, rau bulia rawa na veitacini na Wright e dua na dago ni waqavuka vakaidini e rawa ni vuka tiko me 12 na sekodi na kena dede. Dina ni lekaleka sara oqori ni raici vata kei na ka e sa rawati edaidai, ia na kena vuka rawa me 12 na sekodi e veisautaka vakadua na noda vuravura!
Na noda rawaka ena cava ga eda saga ena vakatau vakalevu ena noda sasaga tiko ga ena vosovoso. Kevaka eda vinakata meda kila e dua na vosa vou, se vulica e dua na cakacaka, se na noda saga sara mada ga meda veikilai kei na dua, e rawati ga e levu na veika vivinaka kevaka eda gugumatua. E tukuna na dauvolaivola o Charles Templeton, ni noda “rawaka e vu ga vakalevu mai na cakacaka kaukaua.” E tukuna tale ga o Leonard Pitts, Jr., e dauvolavola ena niusiveva: “Era kaya e so ni taledi ga eda rawaka kina, so tale era kaya ni kalougata ga, ia vakalevu mera guilecava na ka e bibi duadua. Na cakacaka kaukaua kei na vica vata na gauna e dreve kina nona sasaga. Sa guilecavi tale ga nona dau tekivu totolo kei na nona dau suka bera ena cakacaka.”
E vakadinadinataka oqo na ka e a tukuna makawa tu mai na iVolatabu: “Na liga daucakacaka, ena yaco me lewa.” (Vosa Vakaibalebale 12:24, NW) Na tamata daucakacaka ena sasaga vagumatua. Ni tiko vei keda na yalo oqori, eda na rawata kina na ka eda lalawataka meda cakava. Ia na cava na gugumatua? Ena rawa vakacava meda dau gugumatua meda rawata kina na noda isausau, ia na cava e dodonu meda gumatuataka? Na rua na taro oqori ena saumi ena ulutaga e tarava.
[iTaba ni Credit Line ena tabana e 3]
U.S. National Archives photo