Tukutuku Mai na Daukacivaka na Matanitu

Vukei Ira na Tamata Kece ga e Necaladi

E SA duatani dina sara ga na vakabauta i Eparama. “Ni sa kacivi,” a vola na yapositolo o Paula, a talairawarawa o Eparama ena ivakaro ni Kalou “ka sa lako yani, ia sa sega ni kila na vanua sa lako kina.” Ni sa tokia oti na nona vuvale taucoko o Eparama, “sa laki tiko vulagi kina e na vanua ka yalataki” ena vo ni duanadrau na yabaki ni nona bula.​—Iperiu 11:​8, 9.

E vaka kina nikua, ni vuqa na iVakadinadina i Jiova era bolea mera toki yani ina dua tale na vanua e gadrevi cake kina vakalevu na cakacaka. E so tale era vulica e dua na vosa vou me rawa nira vunau kina vei ira na vulagi era toki yani ina nodra vanua. Me vaka e vakaraitaki ena vica na itukutuku oqo, na yalogu vaka oya e sa dolava “na katuba levu ni cakacaka yaga” e Necaladi, ni duanamilioni mai na 15 na milioni na lewenivanua era vulagi.​—1 Korinica 16:​9, VV.

◻ O Bahram, a dauveivakavulici tu e liu ena Kung Fu, e lako mai ena dua na vanua ena Tokalau e Loma. A ciqoma e dua na iVolatabu kei na so na ivola e tabaka na isoqosoqo ni Watch Tower. Ena loma ga ni dua na vula, sa kila o Bahram ni sa kunea na ka dina. Erau tekivu tuberi kei na watina ena iVolatabu, ia e dua ga na kena leqa​—e sega ni kila o qasenivuli na nodrau vosa. Erau nanuma lesu ni ratou a veisikinalataki ga ni ratou veivosaki, “e vakayagataki ga kina na liga kei na yava.” Toso na gauna, erau sa qai kunea o Bahram kei watina na ivavakoso e vosataki kina na nodrau vosa, sa qai toso totolo sara kina nodrau vuli. Sa dua na iVakadinadina papitaiso o Bahram ena gauna oqo.

◻ Erau torova yani e dua na turaga ni Indonesia o rau na veiwatini painia ni Oladi ena dua na mata ni sitoa levu. E kurabui ni rau a vosa yani vua ena nona vosa. Eratou vakadeitaka sara me ratou qai lai sota i nona vale na turaga oqo. E qai kilai ni a yabaki 20 tu mai Rusia, e lai yaco kina e kea me dua na nodra vuniwai na marama. E kaya ni sega ni vakabauta na Kalou, ia e dau qoroqoro ga ena veigauna kece e vakasucuma kina e dua na gone, “Sa uasivi dina na ibulibuli ni tamata! Na cakamana ga!” E mani vakadonuya me vulica na iVolatabu, sega ga ni dede sa vakabauta ni dua dina tiko na Dauveibuli e kauaitaki keda na tamata. (1 Pita 5:​6, 7) E sa dua o koya oqo na tacida papitaiso, e sa dauveiqaravi sara tiko ena ivavakoso nodra na vosa vaka Indonesia e Amsterdam.

◻ E Rotterdam, e dua vei ira na ikelekele ni waqa levu duadua e vuravura, era sa kenadau sara e dua na ilala painia era dauvunau vei ira na dausoko e duidui na nodra vosa era dau sobu e vanua e veisiga. E vakavatukana sara na nodra cakacaka na dauvunau gugumatua oqo, ni vica vata na kaiwaqa, wili kina e dua na kavetani, dua na vakailesilesi ni soko, kei na dua na dauyadra e liu era sa ciqoma na ka dina. Ia oqo eratou sa veivuke sara tiko ena kena vakatetei e vuravura na itukutuku vinaka ni Matanitu ni Kalou.​—Maciu 24:14.

 Me vaka ga sa vakayacori tiko ena veiyasa i vuravura tale e so, era vakadeitaka na iVakadinadina i Jiova e Necaladi nira na vakayacora na nodra itavi ena kena vunautaki na itukutuku vinaka tawamudu ena veimatanitu, na veimataqali, na duivosavosa, kei ira na tamata kece ga.​—Vakatakila 14:6.