Na Cava o Kila me Baleta na Vakatevoro?

NA VAKATEVORO! Na cava beka na kena ibalebale?

E levu era nanuma ni ka ga ni itukuni, se baleta na rere vakalialia, e sega ni ka me tauri vakabibi. Vei ira oqori, na vakatevoro e dua na ka e raitayaloyalotaki ga​—me vakabeka oqo, ni o ira na yalewa dauvakatevoro era dau ubia na uludra ena nodra isulu, era vakasaqara na taba ni beka ina kuro e sa buebue tu ena veimataqali kakana vakasisila era veiwaki tu, era vukici ira na tamata mera boto, era qai vanataki yani i macawa ena buto ni bogi ena dia ni itataviraki qai watatagi na domodra ena mataqali rorogo e veivakarerei.

Vei ira tale e so, e sega ni ka ni veiwali na vakatevoro. Era kaya e so na dauvakadidike ni sivia na veimama ni lewe i vuravura era vakabauta nira sega ni ka ni itukuni ga na yalewa dauvakatevoro, e rawa nira cakayaco vei ira na tamata. E milioni vakamilioni era vakabauta ni ka ca na vakatevoro, e rawa ni veivakaleqai, e dodonu me rerevaki. Kena ivakaraitaki, e kaya e dua na ivola baleta na lotu e Aferika: “E vakawakana vinaka sara tu ga ena nodra bula e Aferika na nodra vakabauta ni ka rerevaki na cakaisausau, na vakacuru, kei na vakatevoro . . . O ira na yalewa kei na tagane dauvakatevoro kei ira na dauvakacuru era mataqali tamata cati vakalevu duadua ena vanua era tiko kina. Me yacova mai nikua, era dau moku mate ena so na vanua.”

Ia ena veivanua e Urope kei Mereke, e sa vaka me dua na ka dokai na vakatevoro. Era sa vakamamadataka na rerevaki ni vakatevoro na ivola, retioyaloyalo kei na iyaloyalo yavala. E kunea rawa o David Davis na daunivakadidike ena veika ni veivakamarautaki: “Vakasauri e sa veisau na kedra irairai na yalewa dauvakatevoro mera sa goneyalewa ra qai rairai totoka, dravia vinaka. E kenadau o Hollywood ena veivakamuai ina veisau oqo. . . . Nira vakayagoyagovinakataki ira na yalewa dauvakatevoro mera rairai vinaka, mera yalovinaka tale ga, era na makutu ni saravi ira e levu na dausara iyaloyalo, wili kina o ira na marama kei na gonelalai.” E kenadau tale ga o Hollywood na vakamoica na ivukivuki me ivurevure ni rawailavo.

E so era kaya ni vakatevoro e dua na ivakarau ni lotu e sa tubu bulabula sara e Mereke. Ena veivanua rawati ira, e tubu cake tiko na kedra iwiliwili na marama era via dre ga na nodra mua, le levu tale era vakanadakuya na matalotu lelevu, sa ra qai goleva kina na iwalewale e vuqa ni vakatevoro mera vakaceguya kina nodra gagadre vakayalo. Ni sa rui levu na isoqosoqo ni vakatevoro, era sa sega ni duavata kina e levu se cava sara mada na ibalebale ni “yalewa dauvakatevoro.” Ia, e levu vei ira na yalewa dauvakatevoro era kaya ni nodra iwalewale e yavutaki ena Wicca​—e vakamacalataka e dua na ivolavosa ni oqo e dua na “lotu butobuto dauqarava na veika buli a tauyavu ena ra kei Urope ni se bera na gauna vakarisito, ia e sa mai vakabulabulataki tale ena ika20 ni senitiuri.”a Oqo na vuna era kaya kina e levu vei ira nira lewenilotu butobuto.

Ena veitabagauna sa sivi, o ira na yalewa dauvakatevoro era cati, dauvakacacani, vakararawataki, era dau vakamatei tale ga. E sega ni kurabuitaki kina nira sa via vakavinakataka na kedra irogorogo o ira na dauvakatevoro ni gauna oqo. Era tarogi e vica vata na yalewa dauvakatevoro ena dua na vakadidike, se itukutuku cava sara mada era via vakasavuya vei ira na lewenivanua. E vakamacalataka na dauvakadidike o Margot Adler na kena isau: “Keimami sega ni tamata ca. Keimami sega ni sokaloutaka na Tevoro. Keimami sega ni vakamuai ira vakatani na tamata se cakava vei ira e dua na ka ca. Keimami sega ni tamata rerevaki. Keimami tamata ga vakataki kemuni. Keimami vakavuvale, e tu na neimami cakacaka, e tu na ka keimami nuitaka, kei na veika keimami lalawataka. Keimami sega ni lotu qaravi tamata. Keimami sega ni ka tani. . . . E sega na vuna mo ni rerevaki keimami kina. . . . Keimami vakataki kemuni ga.”

E vaka me sa ciqomi sara tiko vakatotolo na mataqali vakasama vaka oya. E kena ibalebale beka oqo meda sa kua ni qaqarauni ena veika vakatevoro? Da raica mada na isaunitaro oqori ena ulutaga e tarava.

[iVakamacala e ra]