O se Nanuma Tiko?
O taleitaka na ka o vakawilika ena itabataba ni Vale ni Vakatawa era se qai taba wale ga oqo? Ia, raica mada ke rawa mo sauma e vica na taro oqo:
• Na cava e ciqomi rawarawa kina na Kirisimasi e Korea?
E tiko e dua na vakabauta makawa e Korea kei na so tale na vanua me baleta e dua na kalou ni valenikuro. E nanumi ni curuma mai na ikuvukuvu ena Tiseba qai kauta tiko mai na iloloma. Ni oti tale ga na iKarua ni iValu Levu, era dau lai soli iloloma kei na iyaya ni vakacoko o ira na sotia ni Mereke ena veivalenilotu.—12/15, taqana e 4, 5.
• Me vaka e tukuni ena Aisea 21:8, “nai vakatawa” cava e sa vakarautaka tu na Kalou ena noda gauna oqo?
Era lotu Vakarisito lumuti ena yalo tabu, era ilawalawa e vaka e le dua na ivakatawa. Era vakayadrati ira tiko na tamata ina veika lelevu sa yaco tu e vuravura e qai sereka na kedra ibalebale vakaparofisai ena iVolatabu. Era vukei ira tale ga na vuli iVolatabu mera kila na ivalavala kei na ivakavuvuli e sega ni vakaivolatabu, mera drotani tale ga mai kina.—1/1, taqana e 8, 9.
O cei o ira na “Polish Brethren”?
O ira oqo era lewe ni dua na isoqosoqo lotu lailai e Poladi ena ika16 kei na ika17 ni senitiuri. Era dau uqeta me muri ga na iVolatabu, era sega kina ni duavata kei na ivakavuvuli kilai levu ni so na lotu me vaka na Letoluvakalou, na nodra papitaisotaki na gonedramidrami, kei na bukawaqa mai eli. Ni toso na gauna, era vakacacani sara vakaca, vakavuna kina mera dui se yani ina veivanua tale e so.—1/1, taqana e 21-3.
• Na cava na vuna e nuitaki kina na vosa ni yalayala ni iVolatabu mai na ka era yalataka o ira na dauraikalokalo se o ira na saenitisi ni bula raraba era vakatokai na futurologist?
Era sega ni nuitaki o ira na viavia parofita baleta nira lecavi Jiova kei na iVolatabu. Na vosa ni yalayala wale ga ena iVolatabu ena rawa ni vukei iko mo na kila era veisemai vakacava kei na inaki ni Kalou, me rawa ni na yaga tawamudu kina vei iko kei iratou nomu vuvale.—1/15, taqana e 3.
• Na ivakadinadina cava e so e vakaraitaka nida sa bula tu oqo ena iotioti ni veisiga?
Sa da raica tu oqo na revurevu ni nona kolotaki mai lomalagi o Setani. (Vakatakila 12:9) Sa da bula donuya tu oqo na iotioti ni “tui” e cavuti ena Vakatakila 17:9-11. Sa lutu tiko ga na kedra iwiliwili na lotu Vakarisito lumuti, ia ena so beka vei ira era na se bula tiko e vuravura ni sa na tekivu na veivakararawataki levu.—1/15, taqana e 12, 13.
• E volai ena gauna cava na ivola i Apakuki, na cava na vuna meda kauaitaka kina?
Na ivola oqo ena iVolatabu a volai rauta na 628 B.S.K. E volai kina na nona vakatauca o Jiova na lewa vei Juta ena gauna makawa kei Papiloni. E vakaraitaka tale ga na lewa ni Kalou sa na vakarau vakatauca ina ivakarau ni veika ca e cici tu nikua.—2/1, taqana e 8.
• E vei ena iVolatabu e cavuti kina na ivakasala momona ni dua na tina vei ira na yalewa vakawati gugumatua?
Na iotioti ni wase ni ivola na Vosa Vakaibalebale, wase e 31, e dua dina na ivurevure totoka ni ivakasala momona.—2/1, taqana e 30, 31.
• Na cava na vuna meda vakavinavinaka kina vei Jiova ni sa vakatakila mai vei keda na “vakasama i Karisito”? (1 Korinica 2:16, NW)
Ena vuku ni itukutuku ena Kosipeli, sa rawa kina vei Jiova me vakavulici keda ena vakasama, vakanananu kei na itovo i Jisu, wili kina na nona cakacaka kei na veika e dau vakabibitaka. Oqo ena vukei keda meda vakataki Jisu, vakauasivi na noda vakabibitaka na cakacaka vakavunau e veivakabulai.—2/15, taqana e 25.
• E dau rogoca li na Kalou na masu ena gauna oqo?
Io. E dina ni vakaraitaka na iVolatabu ni masu kece ga e sega ni rogoca na Kalou, ia na itukutuku ni cakacaka ena noda itabagauna oqo era vakadinadinataka ni Kalou e dau rogoci ira era masulaka mera vakacegui, mera vukei me wali na leqa me vaka na tiko yavavala ni bula vakawati.—3/1, taqana e 3-7.
• Na cava meda cakava meda rawata kina na kaukaua ni Kalou?
Meda kerea ena masu, meda vakaukauataki vakayalo mai na iVolatabu, meda vakaukauataki tale ga mai na soqoni vakarisito.—3/1, taqana e 15, 16.
• Mera vukei luvedra vakacava na itubutubu me yaga na nodra dau tiko ena soqoni vakarisito?
Mera vukei luvedra mera yadra tiko, de na vinaka mera vakamoceri ira rawa na luvedra ni bera na soqoni. Mera vakauqeti na gone mera dau “vola na veitikina bibi,” mera dau vola e dua na itoqa ena tikinipepa nira rogoca e so na vosa se yaca kilai levu.—3/15, taqana e 17, 18.
• Na cava e so na ka eda rawa ni vulica mai na ivakaraitaki i Jope?
E vakaliuca o Jope na nona veiwekani kei na Kalou, e raici ira vakatautauvata na tani, e dina vua na watina, dau kauaitaka na bula vakayalo ni nona vuvale, qai vosota ena yalodina ni a vakatovolei.—3/15, taqana e 25-7.
• E tiko beka ena iVolatabu na itukutuku vuni e rawa ni veisautaka na itukutuku?
Sega. E kainaki ni rawa tale ga ni tu na itukutuku vuni ena so na ivola vakavuravura. Na vakasaqarai ni itukutuku vuni ena iVolatabu ena sega wale ga na betena nira veiveisau na matanivola ena ivolavivigi vakaiperiu.—4/1, taqana e 30, 31.