O se Nanuma Tiko?

O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:

• Na cava e se veiganiti tiko ga kina nikua me dikevi na taro era tarogi ena Jope wase e 38?

E levu na cakacaka veivakurabuitaki ni Kalou e se sega tiko ga ni matata vei ira na saenitisi nikua. Wili kina se taura vinaka tiko vakacava na idre kei vuravura (gravity) na kena sowiri, na cava dina na rarama, na cava era duidui kina na mata ni ucacevata yadua, e vu vakacava na mataniuca, kei na vuna e vakilai kina na kaukaua ena yaseyase.​—4/15, taqana e 4-​11.

• Na ivakaraitaki cava ena iVolatabu e rawa ni vukea meda walia na yalolailai?

Eratou yalolailai o Esafa, Peruki, kei Neomai, ia na itukutuku vakaivolatabu e vakaraitaka ni ratou valuta na ituvaki oqo​—e rawa ni vukei keda.​—4/15, taqana e 22-4.

• Na cava e so na sala yaga e rawa nira vukei kina na yada lotu Vakarisito?

E rawa nira veivuke vakadodonu ena yalololoma na nodra itokani. Na nodra lewenivuvale kei ira tale na so era na rairai veivuke ena ilavo se iyau, ke gadrevi dina. E rawa tale ga nira veivuke na lotu Vakarisito nira veitokani kei ira, mera veitokoni vakayalo ra qai veivakacegui.​—5/1, taqana e 5-7.

• Na cava e bibi kina na vakawati ga “[e]na Turaga,” e vakasala kina na 1 Korinica 7:​39?

E laurai ni vakawati kei ira na tawavakabauta sa dau tini vakalevu ena leqa. Kena ikuri, na muri ni ivakasala vakalou oqo e ivakaraitaki ni yalodina vua na Kalou o Jiova. Nida muria na Vosa ni Kalou, ena sega ni vakaleqai keda na noda lewaeloma. (1 Joni 3:​21, 22, VV)​—5/15, taqana e 20-1.

• Ni rawa vei Jiova me vosota na ivalavala ca, na cava ga era vakatusa kina na lotu Vakarisito nodra cala bibi vei ira na qase ena ivavakoso?

Io, e dodonu me qara na lotu Vakarisito na veivosoti i Jiova ena vuku ni cala bibi. (2 Samuela 12:13) Me vaka ga nona vukei Tevita na parofita o Necani, o ira na qase matua e rawa tale ga nira vukei ira era cala era veivutuni. Nodra golevi na qase e salasalavata kei na ivakasala ena Jemesa 5:​14, 15.​—6/1, taqana e 31.

• Na ivakadinadina cava e tu ni dodonu meda kauaitaki ira na luveniyali kei na yada era gadreva na veivuke?

Na itukutuku makawa e vakaraitaka ni veikauaitaki oqori a kilai tani kina na sokalou dina vei ira na Iperiu makawa kei ira na lotu Vakarisito taumada. (Lako Yani 22:​22, 23; Kalatia 2:​9, 10; Jemesa 1:​27) E kotora tale ga ena iVolatabu na yapositolo o Paula na idusidusi matata vei ira na lotu Vakarisito mera kauaitaki ira na yada era gadreva dina na veivuke. (1 Timoci 5:​3-​16)​—6/15, taqana e 9-​11.

• Na cava na ki ni bula e vakaibalebale qai marautaki?

Saga meda bucina da qai taura dei na veiwekani vinaka kei Jiova, na Tamada vakalomalagi. Na vulici ni iVolatabu e ivukevuke yaga me rawati kina.​—7/1, taqana e 4-5.

•Ni mate na tamata, e bula tale tiko beka na yalona?

E dina nira vakabauta e so ni yalo​—sega ni soul​—e tawamate, na iVolatabu e sega ni tokona na vakasama oqo. E vakaraitaka ga ni gauna e mate kina e dua, e suka tale ina qele qai sega ni bula tale tiko. Ia na Kalou e rawa ni vakabulai koya tale. Koya gona na inuinui ni bula mai muri ena vuku ni veivakaturi, e tiko ga vua na Kalou. (Dauvunau 12:7)​—7/15, taqana e 3-6.

• A tu e vei o Taniela ni ratou vakatovolei na tolu na Iperiu ena buca o Tura?

E sega ni vakamacalataka na iVolatabu. E rairai sega ni gadrevi me tiko e kea o Taniela ena vuku ni nona itutu, se a gole ena dua na ilesilesi vakamatanitu. Ia eda nuidei ni a yalodina tiko ga vei Jiova.​—8/1, taqana e 31.