O se Nanuma Tiko?

O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:

• Ena vakatawai keda vakacava na yalomatua? (Vosa Vakaibalebale 1:4)

Ena yavalati keda meda kidava na ituvaki e rawa ni yaco kina na leqa vakayalo qai uqeti keda meda tuvanaka na kosi me uli keda vakadodonu, me vaka na noda goletani mai na ituvaki e rawa nida coriti kina ena veidauci e vanua ni cakacaka. E vukei keda tale ga meda ciqoma nira sega ni tamata uasivi na noda itokani lotu Vakarisito, ena sega gona ni dau lekaleka na yaloda ni dua vei ira e vakacudrui keda. Ena vakatawai keda tale ga me kua kina nida domodomoiyau ni rawa ni na biligi keda vakamalua meda muacala vakayalo.​—8/15, tabana 21-4.

• E yaga vakacava ke da kauaitaki ira eda tiko veitikivi?

E rua na sala eda vakaraitaka kina nida kauaitaki ira eda tiko veitikivi, oya meda dau lomasoli, da qai dau vakavinavinakataka na ka vinaka e caka vei keda. Ni yaco na leqa, e bibi meda veikauaitaki na tiko veitikivi. Ena nodra saga na iVakadinadina i Jiova mera vakaraitaka nira kauaitaki ira na tiko tikivi ira, era veivakaroti tiko ena ka levu sa vakarau yaco me tinia kina na Kalou na ivakarau ca.​—9/1, tabana 4-7.

• O cei o ira na sanito dina e kaya na iVolatabu, era na vukea vakacava na kawatamata?

O ira kece na lotu Vakarisito taumada era wili mera sanito dina, se ra yalosavasava. E veidigitaki sara ga kina na Kalou, sega ni tamata se isoqosoqo vakatamata. (Roma 1:7) Nira sa vakaturi ina bula vakalomalagi na yalosavasava oqo, era na vakaitavi vata kei Karisito ena cakacaka ni nodra vakalougatataki na tamata yalodina e vuravura. (Efeso 1:​18-​21)​—9/15, tabana 5-7.

• E rawa ni yaga vakacava vua e dua na lotu Vakarisito ke bau kila toka vakalailai e so na ka me baleta na qito lelevu a dau caka mai Kirisi ena gauna makawa?

E sega wale ga ni rau dau cavuta vakacaca na yapositolo o Pita kei Paula ena nodrau volavola e so na ivakaraitaki mai na qito lelevu vaka oya ni gauna makawa, erau dau yavutaka tale ga kina e so na nodrau ivakatautauvata. (1 Korinica 9:​26; 1 Timoci 4:7; 2 Timoci 2:5; 1 Pita 5:​10) Vua na dau qito ni gauna makawa, a bibi me tiko na nona dauniveivakavulici vinaka, me dauvakatulewa vinaka, qai dau sasaga vakaukaua. Ena via tautauvata tale ga oqo kei na ka mera saga na lotu Vakarisito nikua.​—10/1, tabana 28-​31.

• Na cava e so na ka ni bolebole ia e marautaki, ni susu gone e vanuatani?

E levu na gone era dau vulica totolo cake mai vei ira na nodra itubutubu na vosa ni vanua vou era vakaitikotiko kina. Rairai ena dredre beka vei ira na itubutubu mera kila na ivakarau ni nodra ciqoma na ka na luvedra. Ena so tale ga na gauna e rawa ni dredre vei ira na gone mera taura rawa na yavu ni ivakavuvuli ni iVolatabu ena nodra vosa. Ia ke ra vakavulici ira na luvedra na itubutubu ena nodra vosa, e rawa ni vaqaqacotaka na veivolekati vakavuvale, e rawa nira kila na gone e rua na vosa, ena lakovinaka tale ga vei ira nira tiki ni rua na ivakarau ni itovo vakavanua.​—10/15, tabana 22-6.

• Na cava e bibi kina meda vulica na dau kere veivosoti?

Na kere veivosoti e vu dina mai lomada e dua na sala vinaka me vakavinakataki kina e dua na veileqaleqati. E laurai ena iVolatabu e so na ivakaraitaki e vakadinadinataka ni cakayaco vakalevu na dau kere veivosoti. (1 Samuela 25:​2-​35; Cakacaka 23:​1-5) Vuqa na gauna, ke rua erau veileqaleqati e rawa ni tukuni ni rau cala ruarua, ni rau tamata ivalavala ca ga e rawarawa ni rau cala. Sa na gadrevi ga me rau veisorosorovi.​—11/1, tabana 4-7.

• Ke veimautaki mada ga na ilavo lailai sara, na cava e ca kina?

Na veimauilavo e rawa ni vakabulabulataka na dokadoka, na yalo ni veisisivi kei na kocokoco, na mataqali yalo e cata na iVolatabu. (1 Korinica 6:​9, 10) E levu gona e nodra malumalumu na veimauilavo era a tekivu nira se gone ena betitaki ni ilavo lalai sara.​—11/1, tabana 31.

• Ni sa volai rawa tu ena vosa vakirisi e levu na ivola ena iVolatabu, na cava tale e qai gadrevi kina me vakadewataki na iVolatabu ina vosa vakirisi, na cava e rawati kina?

Na vosa vakirisi vou e duatani sara mai na vosa vakirisi ni iVolatabu Vakirisi Vakarisito, se na kena ena iVolatabu Vakirisi na Septuagint e vakadewataki mai na iVolatabu Vakaiperiu. Ena loma ni vica vata mai oqo na drau na yabaki, e levu sara na sasaga sa caka me vakarautaki rawa kina na iVolatabu taucoko, se vakatikina, ena vosa vakirisi kilai rawarawa. Nikua, sa rauta ni 30 na ivakadewa taucoko se vakatikina ni iVolatabu era wilika rawa na kai Kirisi, dua na kena e kilai levu sara na ivakadewa ni New World Translation of the Holy Scriptures, e tabaki ena 1997.​—11/15, tabana 26-9.

• Na cava e sega ni gadrevi kina vei ira na lotu Vakarisito mera solia na duanaikatini?

Ena ruku ni Lawa a soli vei ira na Isireli makawa, na duanaikatini a vakatikitikitaki mera bula kina na yavusa Livai, kei ira na gadreva na veivuke. (Vunau ni Soro 27:30; Vakarua 14:​28, 29) Ia na mate vakaisoro i Jisu e tababokoca na Lawa kei na soli ni duanaikatini a virikotori kina. (Efeso 2:​13-​15) Ena ivavakoso gona vakarisito taumada, a kena ivalavala mera solia yadua na lotu Vakarisito na ka ga era dui rawata, me vakatau sara ga mai lomadra. (2 Korinica 9:​5, 7)​—12/1, tabana 4-6.

• E vakaibalebaletaki beka ena Vakatakila 20:8 ni dua na iwiliwili vakaitamera ena temaki ira o Setani ena iotioti ni veivakatovolei?

E kaya na tikinivolatabu ni “kedrai wiliwili [na temaki] sa vaka na mata ni nuku ni matasawa.” Dau vakavuqa ena iVolatabu me ibalebale ni matavosa oqo e dua na iwiliwili e sega ni se kilai na kena levu, ia e sega ga ni vakaitamera. A cavuti ni “na [vaka na] nuku mai matasawa” na levu ni kawa i Eparama, ia e muri e qai macala nira lewe 144,000, vata kei Jisu Karisito. (Vakatekivu 22:17; Vakatakila 14:​1-4)​—12/1, tabana 29.