O na Kunea i Vei na iVakasala Vinaka?

E vica vata na bilioni na dola era rawata e veiyabaki na “tabana ni ivakasala.” Era vinakata na tamata mera vukei. O Heinz Lehmann, e dua na kenadau ena tauvimate ni vakasama, e kaya: “E leqa tiko na veivakavulici kei na veimaliwai [ena bula ni tamata ena gauna oqo]. Sa sega tale ni raici vakabibi na lotu ena gauna oqo. Sa yavavala na bula vakavuvale . . . , yaco kina mera dau veilecayaki na tamata.” Kaya na dauvolaivola o Eric Maisel: “E liu era dau lai taro ivakasala vei ira na bete ni vanua, nodra italatala se nodra vuniwai vakavuvale, mera vukei ena leqa ni vakasama, leqa vakayalo, kei na leqa vakayago, edaidai era sa rai ga ena ivola mera taro ivakasala kina.”

NA ISOQOSOQO na American Psychological Association e vakaduria e dua na tabana me vaqaqa na taba ni cakacaka oqo sa totolo sara tiko na kena tete. E kaya na tabana ni veivaqaqai oqo, e dina ni “vinakati vakalevu mera vukei na tamata me rawa nira kilai ira vinaka kei ira tale ga na tani . . . , ia sa mani sivia tale qai veivakurabuitaki na itukutuku ni ka e rawa nira vakayacora na tabana oqo.” E kaya e dua na dauvolavola ni Toronto Star: “Meda kila kece ni levu na ivakasala me baleta na ka vakalotu kei na ka vakayalo e lasutaki. . . . Meda qarauna vinaka sara na ivola meda vukei keda ga kina vakataki keda, se na tepi, se na bose e yalataki kina e levu na ka, eda na vakila tale ga na kena yaga ena dua ga na gauna lekaleka, qai lailai sara na ka e vinakati meda cakava se na cava meda kua ni cakava.” E vuqa vei ira oqo era vaqarai ira dina na gadreva tu mera vukei. Ia, e ka ni rarawa nira tu ga e so e sega sara ni lomadra dina mera vukei ira se walia nodra leqa na tamata galili kei ira na rarawa tu, era via rawailavo ga.

Ena vuku ni tikina oqo, i vei sara mada na vanua e rawa nida vukei kina, e rawa tale ga nida nuitaka? I vei mada na vanua eda na kunea kina na ivakasala yaga ena mana tu ga?

Na iDusidusi e Sega ni Oti Rawa

E kaya o Henry Ward Beecher na dauvunau ni Mereke ena ika19 ni senitiuri: “Na iVolatabu e idusidusi ni Kalou vei iko me sokotaki iko mo kua ni kasa, me vakaraitaka vei iko na toba, kei na sala o na curu kina ina toba ena nomu levea na yamotu se na ibinibini nuku.” E kaya e dua tale na turaga me baleta na iVolatabu: “E sega ni dua e uasivia na iVolatabu, ni toso noda yabaki e toso vata na kena raba kei na kena titobu na ivola oqo.” Na cava na vuna mo vakasamataka kina vakabibi na ivurevure ni vakasala oqo?

Na iVolatabu sara ga e tukuna: “Sai koya na Kalou sa vakavuna nai Vola Tabu kecega, a sa yaga oqo mei vakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu: me yaco kina na tamata ni Kalou me vakarau tu, ni sa vakarautaki ki nai valavala vinaka kecega.” (2 Timoci 3:​16, 17) E vakavuna sara ga na iVolatabu o koya na iVurevure ni bula, na Kalou o Jiova. (Same 36:9) O koya gona, e kila vinaka o koya na keda ibulicaki, me vaka e tukuna na Same 103:14: “Ni sa kila ko koya na nodai bulibuli; sa nanuma ga ni da sa kuvu-ni-soso.” Sa rawa sara ga nida nuitaka vakatabakidua na lewe ni iVolatabu.

E tu ena iVolatabu e vuqa sara na ivakavuvuli kei na idusidusi e rawa ni taurivaki ena ituvaki cava ga eda sotava. E vaka sara ga ni kaya tiko vei keda na Kalou: “Oqo na sala, dou mai lako tu ga kina.” (Aisea 30:21) Ena rawa beka ni vakacegui keda edaidai na iVolatabu ena ka eda gadreva? Meda raica mada.

E Vakacegui Keda na iVolatabu Ena Ka Eda Gadreva . . .

Nida Lomaocaoca. E tukuna vei keda na iVolatabu: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka. Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.” (Filipai 4:​6, 7) E yaga beka na masu nida lomaocaocataka na dredre ni bula vakailavo, ni vakayacori vei keda na ivakarau vakasisila se da rulaki, se ni mate e dua na wekada lomani? Vakasamataka mada oqo.

E kaya o Jackie ena gauna e kila kina ni a vakayacori vei luvena yalewa na ivalavala vakasisila: “Au sega ni tukuna rawa na levu ni ora ni lomaqu niu a sega ni taqomaki koya rawa. Au saga meu kinoca na ca ni lomaqu, na noqu rarawa kei na noqu cudru. Sa tekivu me bikai au na ka kece oqo. Sa dua na ka noqu vinakata me karoni au o Jiova.” Ni wilika oti vakavica na Filipai 4:​6, 7, e saga sara ga vakaukaua me muria na ivakasala e tu kina. “Au masu ena veisiga kece, au dau kerea vakawasoma me kua ni rawai au na mataqali vakasama ca vaka oqo, e vukei au o Jiova me dei tale na yaloqu, meu mamarau tale ga. Au vakila sara ga na vakacegu ni yaloqu,” e kaya o Jackie.

Rairai o na sotava tale ga na ituvaki vaka oya o qai sega ni cakava rawa kina e dua na ka. Ia ke o masu me vaka e tukuna na iVolatabu, ena rawa ni dei na yalomu. E vakayaloqaqataki keda na daunisame ena vosa oqo: “Laiva na nomu sala vei Jiova; vakararavi talega vua, ka na vakayacora ko koya.”​—Same 37:5.

Meda Vakayaloqaqataki. Ena yalo vakavinavinaka e kaya kina vaka oqo na daunisame: “I Jiova, au sa vinakata na vale ko ni sa dautiko kina, kei na yasana sa tiko kina na nomuni ukuuku. Sa tu ga na yavaqu e na vanua vinaka: ka’u na vakavinavinaka vei Jiova e nai soqosoqo.” (Same 26:​8, 12) E vakauqeti keda na iVolatabu meda sokalou vei Jiova ena noda sosoqoni vata vakawasoma. Ena vakacegui iko vakacava na sosoqoni vata vaka oqo? E vaka oqo na ka era raica rawa e so.

Kaya o Becky: “Rau sega ni qaravi Jiova na noqu itubutubu, rau dau vakadredretaka tale ga na noqu vinakata meu qarava na Kalou. Sa bau wadrega noqu saga meu lako ina soqoni.” Ia e vakila o Becky ni vakalougatataki vakalevu, e baleta ni dau saga vakaukaua me lako ina soqoni vakarisito. “Niu goneyalewa, au gonevuli, au dauveiqaravi tale ga i Jiova, au vakila ni vakaukauataka noqu vakabauta na soqoni, meu vosota kina na veika dredre au dau sotava ena veisiga. Era duidui sara o ira na tamata era dau lako yani ena Kingdom Hall mai vei ira na noqu icaba e koronivuli! O ira mai na Kingdom Hall era dau veikauaitaki ra dau veivukei, e dau veivakayaloqaqataki na neimami veitalanoa. Era itokani dina.”

Io e vakacegui keda, e vakayaloqaqataki keda tale ga o Jiova nida muria na veidusimaki ni iVolatabu meda dau sosoqoni vata vakawasoma. Eda na vakadinadinataka na dina ni nona vosa na daunisame: “A nodai drodro kei na noda kaukauwa na Kalou, sa voleka sara me vukei keda ni da sa rarawa.”​​—Same 46:1.

Ena Cakacaka e Veivakacegui Qai Yaga. E tusanaka na iVolatabu: “Oi kemudou na wekaqu lomani, mo dou qai tu dei sara, mo dou kakua ni yavala, mo dou uasivi cake e na cakacaka ni Turaga e na gauna kecega, ni dou sa kila sa sega ni ka walega na nomudou cakacaka e na vuku ni Turaga.” (1 Korinica 15:58) E veivakacegui dina na “cakacaka ni Turaga”? E yaga beka na nodra cakacaka vakaitalatala na lotu Vakarisito?

E vakamacalataka o Amelia na ka e yacovi koya: “Au vakavulica e dua na veiwatini e sa voleka sara tu ga ni kasura nodrau bula vakawati. Au vukea tale ga e dua na marama e vakamatei vakaloloma na luvena yalewa. E vakararawataka na lomana na marama oqo na kena sega tu ni matata vua na kedra ituvaki na mate. Ni ratou taurivaka na ivakavuvuli vakaivolatabu, o koya na marama, vaka kina o rau na veiwatini, eratou kunea kina na vakacegu ratou yalovakanuinui tale ga kina. Au marau dina vakalevu, au lomavakacegu ni bau dua na noqu cau ena nodratou vukei.” E tukuna o Scott: “Ke dua nomu vakasavuirogorogo vinaka me baleta na cakacaka vakaitalatala, se na nomu tekivuna e dua na vuli iVolatabu, se o marautaka ni sa yaga tiko nomu vunau tawalokuci, ena wewe ni gusumu tiko ena vica vata na yabaki. Sa macala ga ni na malaude na yalomu ena gauna kece o talanoataka kina! Dau vakavumarau qai guiguilecavi dredre na cakacaka vakaitalatala.”

E matata tu vakasigalevu ni kena vakamuri na ka e tukuna na iVolatabu, oya meda gumatua ena cakacaka vakaitalatala, e rui veivakacegui qai yaga vei iratou na sa cavuti mai cake. O sureti mo vakaitavi tale ga ena cakacaka oqo ena nomu vakavulici ira na tani ena sala ni Kalou kei na nona ivakavuvuli, me na yaga tale ga vei iko ena gauna vata oqori.​—Aisea 48:17; Maciu 28:​19, 20.

Rawaka Mai na Vosa ni Kalou

E sega ni sega ni idusidusi nuitaki qai yaga na iVolatabu meda dusimaki kina ena vuravura edaidai. Meda vakila na kena yaga, e dodonu meda qacoya na wilika vakawasoma, vulica, qai vakananuma vakatitobu. E veivakasalataki o Paula: “Mo dauvakananuma na veika oqo; me ra rawai iko sara; me rairai kina ni ko sa vuku cake mai e na ka kecega.” (1 Timoci 4:​15; Vakarua 11:​18-​21) E vakadeitaka na Kalou, ke o saga mo taurivaka na nona ivakasala e tu ena iVolatabu, o na tamata yaco. E yalataka vei keda: “Mo vakararavi vei Jiova . . . Mo vakarogotaka vua na nomu sala kecega, ia ena vakadodonutaka na nomui lakolako ko koya.”​—Vosa Vakaibalebale 3:​5, 6.

[iYaloyalo ena tabana e 31]

Na muri ni ivakasala vakaivolatabu e veivakacegui qai vakainaki kina na bula