Na Cava Mo Kua Kina ni Via Vinaka Vakaoti?

O dau tovolea mo solia na nomu vinaka taucoko? Sa macala ga ni na yaga vei iko kei ira oni veimaliwai vata. Ena dua tale na yasana, e so era dau cakava sara vakasivia na ka e mani yaco kina mera sa lai via vinaka vakaoti. Na cava e vakaraitaka oqo?

E DUA na ibalebale ni “via vinaka vakaoti” ni “na sega ni vakabau e dua na ka ke lekati na ivakatagedegede uasivi.” O sa na rairai sotavi ira e so na tamata e vaka oya na nodra rai. O na rawa ni vakadinadinataka ni kena dau namaki vakasivia na ka ena rawa ni vakavuna e levu na leqa, qai vakavurea na yalolailai kei na yalodadatuvu. E vuqa era dau rai vakayalomatua era sega ni tokona na kena namaki vakasivia na ka ena veibasoga ni noda bula kece. E veiganiti me vakadodonutaki na rai vaka oya. E dua ga na kena leqa, ni dredre meda kila ni tiko vei keda na rai se itovo oqo, ena dredre kina me valuti.

O Nelson e dua e levu sara na nona icolacola qai levu na leqa e tu me walia. E dau dikeva vakawasoma na fika ni veika e rawati, ni dau vakabibitaka me caka vakavinaka na cakacaka. E dau gadrevi na ivakatagedegede e vinaka vakaoti ena veiqatitaki ni rawati ni cakacaka. Dina ni so era taleitaka na vinaka ni cakacaka i Nelson, e vakaleqa na nona bula na nona via vinaka vakaoti, e dau vakavuna me mosi na uluna qai dau osooso na nona vakasama. O iko beka e dua e vakataki Nelson?

E dau vakaleqai ira tale ga na itabagone na via vinaka vakaoti. Ni se gone o Rita, mai Rio de Janeiro, e dau taleitaka na vuli. E dau via ubia na yalo ni veiqati, ia e lakovakaca vua ke sega ni rawata na ivakatagedegede e cake ni maka yalataki. E kaya o Rita: “Mai na gauna au a se gonelailai kina, au dau vakatauvatani au kei ira e levu tu na nodra gauna, niu lomaocaoca au qai dau cumuwaqara ni via cakava kece ga na ka. E sega vakadua niu vakasamataka meu bau cegu mada ga vakalailai baleta ni sa bini tu ga na ka meu cakava.”

Ni se gone o Maria, e dau tagi ni sega ni rairai vinaka na nona droini me vakataki ira e so. Kuria, ena nona gadreva me daunivakatagi e vinaka vakaoti ena kena ivakatagedegede e cake sara, e dau lomabibi qai lomaocaoca, sega mada ga ni marautaka na nona dau vakatagi se lagasere. E dua tale na goneyalewa ni Brazil, o Tânia, ena nona tovolea me dau dodonu tu ga nona rai me kua tale ga ni veiqati, e vakadinadinataka ni se tiko ga e cake na veika e dau lalawataka, e vale vaka kina mai koronivuli. E nanuma nira na sega ni taleitaki koya na tamata kevaka e sega ni vinaka vakaoti na veika e rawata. E dau vakayalolailaitaki Tânia tale ga ena so na gauna ni dau sivia na ka e namaka vei ira na tani.

Dina ga ni vinaka na rawaka, na gugumatua, kei na marautaki ni veika eda rawata, ena rawa ni veivakaleqai kevaka e dau cala na noda rai, ena noda na leqataka tiko na veika eda na sega ni rawata rawa, ena noda via tekia e dua na ivakatagedegede eda sega ni sauva rawa. Era dau tekia na itubutubu kei ira e so tale na ivakatagedegede e cake sara ni veika mera na rawata na itabagone ena vuli se na qito, na kena ena dredre vei ira mera rawata. Kena ivakaraitaki ni a tu sara ga e cake na veika e namaka o tina i Ricardo vua, ni vinakata me vuniwai, me dau taba piano, me kila tale ga e vica vata na mataqali vosa. O raica rawa ni mataqali rai vaka oqo, kevaka me mani tauri sara vakasivia, ena vakavuna na leqa kei na yalolailai?

Na Cava Meda Kua Kina ni Via Vinaka Vakaoti?

E dau gadrevi vakalevu na ivakatagedegede ni cakacaka e tu sara e cake. Oqo e vakavuna na veiqatitaki ni cakacaka. Na leqataki ni vakayali ni sala ni rawailavo e vakavuna tale ga mera dau sasagataka kina vakaukaua e so na veika era dau cakava. E so na tamata cakacaka era vakataki koya na dauqito e vakuai koya mai na vuqa na ka me rawata kina e dua na isausau vou. Ia, na gauna e sotava kina na veiqati kaukaua, ena sasagataka me tosoya cake na ivakatagedegede ni nona vakaukaua yago, de na mani vakasaqara kina e so na wainimate e rawa ni vakuria na nona kaukaua, o koya e nuitaka me vakavuna na nona qaqa. E vinaka na sasaga me rawati na ivakatagedegede e cake, ia na yalo ni via vinaka vakaoti e vakavurea “na taqayataki ni druka kei na guce” se “na kena sasagataki vakaukaua meda naba dua.”​—The Feeling Good Handbook.

E dina, ni so era nanuma ni gadrevi mera vakavinakataka cake na ka era cakava, wili kina na qito. Ia, me vaka na ka e kaya o Vuniwai Robert S. Eliot: “Ena sega ga ni rawa ni na vinaka vakaoti na ka kece eda rawata.” E kuria: “Na via vinaka vakaoti e vu mai na lomaleqataki ni cakacala, via rairai dodonu, kei na taqayataki ni veivakalialiai.” E veiganiti kina na vosa ni vuku i Tui Solomoni: “Au a nanuma tale na oca kecega, kei na cakacaka dodonu kecega; ni sai koya oqo sa vuvutaki kina e dua na tamata maivua na kai nona. Oqo talega na ka wale ka sa ka ni oca wale ki na yalo.”​​—Dauvunau 4:4.

Na cava o rawa ni cakava ke o iko e dua o dau via vinaka vakaoti? E sega li ni dina ni levu ga ni nomu sasagataka mo vinaka vakaoti, na levu tale ga ni nomu rarawataka? Ena sega li ni vinaka vei iko me vakarauta ga na ka o namaka mo kua kina ni lomaocaoca? Na cava sara mada na ibalebale ni vinaka vakaoti? Sa macala ga ni o na gadreva mo dau rawaka, ia me kua ga ni o via vinaka vakaoti, se vakaevei? Ke rawa vei ira na tamata sega ni uasivi mera vakayagataka na isolisoli vakalou e tu vei ira me buli kina na veika e yaga raraba, qai vakasamataka mada na veika ena rawata na kawatamata ena ituvaki e vinaka vakaoti, ena veidusimaki tale ga vakalou!

[iYaloyalo ena tabana e 4]

Era dau tekia na itubutubu kei ira e so tale na ivakatagedegede uasivi era na sega ni yacova rawa na itabagone