Kacivaki na iTukutuku Vinaka ena Loga ni Veiraisi e Taiwan

Eda Vakataki Ira ga Era Vakabauta

Kacivaki na iTukutuku Vinaka ena Loga ni Veiraisi e Taiwan

O TAIWAN na vanua e dau tau kina vakalevu na uca, e rawa ni tamusuki kina vakarua ena dua na yabaki na raisi. Ia so na gauna e sega ni tau na uca ena kena gauna dodonu, era mate kina na sore ni itei. Ni yaco oqo, ena soro beka na dauteitei? Sega sara. E kila na dauteitei ni gadrevi na vosovoso. Ena bucina na sore ni itei vou qai tea tale na vanua. Kevaka me na donuya na uca, sa na dua na yabaki vinaka ni tatamusuki vua. So na gauna ena vaka tale ga oqo na teitei kei na tatamusuki vakayalo.

Vosovoso Ena Tatamusuki Vakayalo

Ena veiyabaki sa sivi era cakacaka vagumatua na iVakadinadina i Jiova e Taiwan ena nodra tea, kei na nodra tamusuka na sore ni ka dina mai na iVolatabu ena yalava e nanumi taumada ni sega ni vuavuaivinaka. Dua na kena ivakaraitaki na yasana e vakatokai o Miao-li County. Sega soti ni levu era bole mera lai vunau ena yalava oqo. O koya gona, ena 1973 erau a lesi e dua na veiwatini erau painia lavotaki me rau lai dautukutuku vakatabakidua kina ni Matanitu ni Kalou. E laurai ni so era taleitaka na itukutuku vinaka. Ia, sega ni dede, sa seavu tale na nodra tataleitaki. Rau mani lesi ina dua tale na yalava o rau na painia lavotaki oqo.

Ena 1991 erau lesi ina yalava vata ga oqo e rua tale na painia lavotaki. Ia e mani laurai ni rairai se sega ga ni kena gauna oya me tubu kina vakayalo na cakacaka. Oti e vica na yabaki, erau sa lesi tale na painia lavotaki ina yalava e nuitaki tu ni na vuavuaivinaka cake. Mani biu tu na yalava oya me se kua tu mada ni teivaki ena loma ni dua na gauna.

Rawaka Mai na Dua Tale na Sasaga

Ena Sepiteba 1998, a sasagataki mera qarai na yalava era vuavuaivinaka ena veivanua era se bera ni cakacakataki e Taiwan. Ena rawati vakacava oqo? Nodra lesi vakalekaleka e le 40 mera painia lavotaki ena yalava e sega ni lesi ina dua na ivavakoso, ia era levu kina na lewenivanua.

Rua na korolevu ena yasana o Miao-li County erau okati ena yalava e digitaki me vakayacori kina na cakacaka. Eratou lesi e va na tacida yalewa dawai me ratou lai tovolea mada na yalava me tolu na vula. Sega ni bera na nodratou yaco yani ratou sa volaitukutukutaka na levu ni tataleitaki eratou sotava. Ni mai cava na tolu na vula ni nodratou cakacaka vakapainia, sa levu sara na vuli iVolatabu. Eratou tauyavutaka tale ga e dua na iwasewase lailai ni vulivola ena veivuke ni dua na qase mai na dua na ivavakoso e voleka e kea.

Eratou vakadeitaka e le tolu mai vei iratou na tacida yalewa oqo ni ratou na tomana tiko ga na kena karoni “na sore ni itei” sa kadre mai. Ena vuku ni ka oqo, e lesi kina e rua me rau sa painia lavotaki, kei na kedratou ikatolu me na painia tudei tiko ga. Gole mai e dua na qase ni ivavakoso e tiko voleka kina me mai vukei iratou. E sivia e 60 era tiko ena imatai ni vunau soqovi levu ena yalava oya. Nikua sa dau lai veivuke tiko na ivavakoso e voleka kina me cicivaki nodra soqoni na ilawalawa vou oqo ena Sigatabu kece me ikuri ni vica na vulivola sa vakayacori tiko. De dua sa na rawa ni tauyavu ena yalava oqo e dua na ivavakoso vou.

Vakalougatataki na Vosovoso Ena So Tale na Yasa i Taiwan

So na yalava e laurai tale ga kina na toso. Ena tokalau vualiku ni yanuyanu ena yasana e vakatokai o l-lan, e tauyavutaki kina e dua na Vulivola ni iVavakoso vou ena yalava era cakacaka kina o ira na lesi vakalekaleka mera painia lavotaki.

Ni cakacaka tiko e veivale ena dua na yakavi e dua vei ira na lesi vakalekaleka me painia lavotaki, e sotava sara e dua na cauravou, mani vakaraitaka vua e dua na ivola ni veisureti e toqai tu kina na gauna ni soqoni vakaivavakoso. Totolo nona taroga: “E rawa niu tiko ena soqoni ena bogi nimataka? Ke rawa, na cava beka meu dara?” Na painia oqo e sa vakavulici ira tiko e le walu era taleitaka mera vulica na iVolatabu e veimacawa. E so vei ira na vuli iVolatabu sa ra nakinaki tiko mera na dautukutuku ni itukutuku vinaka, qai nodra isausau mera papitaiso.

Dua na marama ena koro tiko ga oqo e dau lako wasoma i lotu, ia e sega ni kunea e dua me vakavulici koya ena iVolatabu. Ena gauna e rogoca kina ni rawa ni vuli iVolatabu, sa ciqoma sara na veisureti. E uqeti me dau vakarautaka vakailiu na nona lesoni ni vuli. Gauna e yaco yani kina o koya e lesi vakalekaleka me painia lavotaki me lai caka na vuli, sa dau vakarautaka oti tu na nona lesoni na marama oqo ena nona volia e dua na ivola qai vola kece kina na taro mai na nona ivola ni vuli. Sa dau vola tale tu ga na isaunitaro yadua. Bau vola tale ga na tikinivolatabu kece e raica ena nona lesoni. Ni lako yani na tacida yalewa me lai tekivutaka na imatai ni vuli, sa vakarautaka oti tu na marama oqo na imatai ni tolu na lesoni!

Na ituvaki vata oqo e yaco ena loma i Taiwan, ena koro o Dongshih. Era solia rawa o ira na lesi vakalekaleka mera painia lavotaki e sivia e 2,000 na brochure ena tolu na vula era cakacaka tiko kina e kea. Me yacova na ikatolu ni vula, sa 16 taucoko na vuli iVolatabu. E vakacacani sara vakalevu na koro ena dua na uneune e yavalata na loma i Taiwan ena 21 Sepiteba, 1999, ia era toso ga vakayalo na tataleitaki, dina ga ni taura e dua na aua ina Kingdom Hall e bau voleka duadua. Io, e gadrevi na vosovoso me tamusuki kina na itei vinaka, vakayago se vakayalo.

[iYaloyalo ena tabana e 8]

(Raica tale na ivola)

JAINA

Taiwan Strait

TAIWAN

[Credit Line]