Na Yaga ni Cakacaka Vakapainia
1, 2. Era vakalougatataki vakacava na painia? Ena vuku ni cava?
1 “Sega tale ni dua na cakacaka e rawa ni solia vei au na vakacegu me vaka na kena au rawata mai na noqu wasea na itukutuku dina,” e kaya e dua na painia. Dua tale a kaya: “Dau vuabale na lomaqu ena marau, au qai moce vinaka e veibogi.” Na ka erau kaya tiko na painia oqo e dina tale ga me baleti ira na tacida kece sara era sa tovolea na vinaka ni cakacaka vakapainia.—Vkai. 10:22.
2 Sa bau veivakacegui dina meda vukea e so tale mera kila na Vosa ni Kalou, na vosa ni bula. (Caka. 20:35; 1 Ces. 2:19, 20) E vola e dua e sa painia dede: “Bau totoka dina qai vakaukauataka tale ga noqu vakabauta niu raica na nona veisau rawa e dua ena igu ni Vosa ni Kalou.” Io, oqori na veivakalougatataki era dau marautaka na painia nira soli ira vakarawarawa mera vukea e so tale mera vulica na iVolatabu.
3, 4. E yaga vakacava na cakacaka vakapainia me vulica kina e dua me dau vakararavi vei Jiova, qai yaga tale ga vakacava ena nona tubu vakayalo?
3 Vakararavi Vei Jiova: Era dau vakararavi e veisiga ena yalo tabu ni Kalou na painia mera vakayacora kina nodra cakacaka vakaitalatala. Na ka oqo e vukei ira mera teivaka “na vua ni yalo tabu” qai dau itataqomaki tale ga vei ira. (Kala. 5:16, 22, 23) Era dau maqosa na painia ni vakayagataka na iVolatabu mera tutaka na ka dina, mera dau veivakaukauataki tale ga, baleta ni sa nodra cakacaka ga e veisiga mera vakayagataka na Vosa ni Kalou. (2 Tim. 2:15) E kaya oqo e dua na tacida tagane sa vicasagavulu na yabaki nona painia voli: “E vukei au noqu cakacaka vakapainia meu vakatitobutaka noqu kilaka vakaivolatabu, qai yaga vei au oqori meu vukea kina e levu mera mai kilai Jiova kei na nona inaki.” Sa bau totoka dina, se vakacava?
4 Levu tale na sala era dau vakararavi kina vei Jiova na painia tudei. E dei cake ga nodra vakabauta nira raica na veivakalougatataki ni Kalou ena nodra sasaga mera qara na veika mera bula kina vakayago. E kaya oqo e dua na turaga yabaki 72 sa 55 na yabaki nona cakacaka vakapainia tudei: “Sega vakadua ni bau dua na gauna me biuti au kina o Jiova.” Nira bula tale ga vakarawarawa na painia, oqori e taqomaki ira mai na dau lomaocaocataka e levu na ka. Vakaevei, o diva tale ga me vaka oqori nomu bula?—Maciu 6:22, NW; Iper. 13:5, 6.
5. E yaga vakacava na cakacaka vakapainia meda veivolekati kina kei Jiova?
5 Toro Voleka Vua na Kalou: Dua dina na ka talei na noda veiwekani kei Jiova. (Same 63:3) Eda na vakila ni na qaqaco cake ga na veiwekani oqori nida soli keda vakalevu ena cakacaka vakavunau ena yalo e lomani Jiova. (Jeme. 4:8) E kaya oqo e dua sa yabaki 18 vakacaca nona cakacaka vakapainia: “Dua na sala meda ‘tovolea da qai raica kina ni sa yalovinaka o Jiova’ na cakacaka vakapainia, da qai vakila kina ni qaqaco cake tiko ga e veisiga na noda veiwekani kei koya e buli keda.”—Same 34:8.
6. Na cava e gadrevi vei ira na via painia, ia o cei tale era vakila na yaga ni nodra cakacaka?
6 Sega wale ga ni vinakati me veiganiti na kena ituvaki e dua me qai painia rawa kina, e gadrevi tale ga me kaukaua nona vakabauta, me lomana dina na Kalou kei na tamata kece ga, qai tu vua na yalo e rawa ni biuta vakatikitiki e so na ka. (Maciu 16:24; 17:20; 22:37-39) Ia, sa rawa ni vakadinadinataki vinaka mai na nodra matadredredre na painia e veivanua kece na totoka ni veivakalougatataki era marautaka mai na cakacaka vakapainia. (Mala. 3:10) E sega ni yala ga vei ira oqori, ni yalo era vakaraitaka era lai vakila tale ga na kena yaga na nodra vuvale kei na ivavakoso era lewena.—Fpai. 4:23, NW.