Era Yalorawarawa Mera Gole​—i Taiwan

ERAU painia tudei tiko mai Serene, Ositerelia ena rauta ni lima na yabaki sa oti o Choong Keon kei Julie, e dua na veiwatini sa toka nodrau yabaki ni bula ena 30 vakacaca. E kaya o Choong Keon, “Keirau cakacaka vagauna, keirau qai marautaka tu neirau bula. E totoka na draki kei na ivakarau ni bula ena vanua keirau tiko kina. Keirau taleitaka ni keirau tiko volekati ira ga na neirau vuvale kei na itokani.” Ia e sega ni vinaka tiko na nodrau lewaeloma. Na vuna? Erau kila ni rawa ni rau vakalevutaka nodrau qaravi Jiova, ia erau sega ga ni sasagataka sara.

E uqeti rau dina e dua na ivunau rau rogoca ena soqo ni tikina ena 2009. E vosa vakadodonu sara ga na tacida e solia na ivunau ya vei ira era rawa ni vakarabailevutaka nodra cakacaka vakaitalatala. E kaya: “Vakasamataka mada qo: Ena vagolea o draiva nona motoka ena imawi se imatau ke toso tiko. Ena rawa tale ga ni dusimaki keda o Jisu meda vakarabailevutaka noda cakacaka vakaitalatala ke da toso tiko, oya nida saga meda rawata noda isausau.”a Rau kaya na veiwatini ni vaka sara ga e vosa tiko vei rau o koya e vunau. Ena soqo ni tikina vata qo, erau vakatarogi kina e dua na veiwatini erau veiqaravi vakadaukaulotu tiko mai Taiwan. Erau talanoataka ni rau marautaka nodrau cakacaka vakaitalatala, rau qai vakabibitaka ni se vinakati ga e levu sara na veivuke. Rau tukuna tale o Choong Keon kei Julie ni vaka sara ga e tukuni tiko vei rau na vosa qori.

“Ni oti na soqo ni tikina,” e kaya o Julie, “keirau masu vei Jiova me vakayaloqaqataki keirau me keirau vakayacora na veisau me keirau toki i Taiwan.” E tomana: “Ia keirau lomaleqa. E vaka ga ni keirau vakarau lade ina dua na tobu titobu ena imatai ni gauna.” Na tikinivolatabu e uqeti rau me rau toki na Dauvunau 11:4, e kaya: “Ko koya sa nanuma na cagi ena sega ni kaburaka na sila; kei koya sa vakaraica na o ena sega ni tamusuka.” E kaya o Choong Keon: “Keirau vakadeitaka me keirau kua ni ‘nanuma se vakaraica,’ ia me keirau tekivu ‘kaburaka se tamusuka.’” Erau sega ni cegu ena masu, rau vakawilika na kedra italanoa na daukaulotu, rau veitaratara vakalevu ena imeli kei ira na toki i Taiwan me rau kila na ivakarau ni bula mai kea. Rau volitaka sara nodrau motoka kei na iyaya ni vale, rau yaco i Taiwan ni oti e tolu na vula.

MARAUTAKI NA CAKACAKA VAKAVUNAU

E 100 vakacaca na tacida mai na veivanua era veiqaravi tiko ena vanua e vinakati vakalevu kina na dautukutuku e Taiwan. Era lako mai Ositerelia, Peritania, Kenada, Varanise, Japani, Korea, Sipeni, kei Merika na tacida e tiko nodra yabaki ni bula mai na 21 ina 73. E maliwai ira e 50 vakacaca na tacida yalewa dawai. Na cava e uqeti ira na tacida gugumatua qo mera veiqaravi i vanuatani? Meda raica mada.

O Laura e dua na tacida yalewa dawai mai Kenada, e painia tiko ena ra kei Taiwan. Ena rauta na tini na yabaki sa oti e sega sara ga ni taleitaka na cakacaka vakavunau. E kaya, “Au sega ni dau marautaka na cakacaka vakaitalatala, ni lailai ga na gauna ni noqu vunau.” Ra qai kerei koya nona itokani mai Kenada me tomani ira ena cakacaka vakavunau i Mexico me dua na vula. “Sa qai vakadua me levu na gauna au cakacaka vakavunau kina, au taleitaka dina!”

Na veika vinaka e vakila o Laura e uqeti koya me toki ena dua ga na ivavakoso e Kenada e duatani na kena vosa. E curu ena dua na kalasi ni vuli vosa vakaJaina, e veiqaravi ena kena iwasewase lailai qai nona isausau me toki i Taiwan, e mani toki ena Seviteba 2008. “Rauta ni dua na yabaki meu qai matau ena noqu itikotiko vou,” e kaya o Laura, “ia qo au sega ni bau vakasamataka meu lesu i Kenada.” E raica vakacava nona cakacaka vakavunau? E kaya, “Au marautaka. Sega tale ni dua na ka e vakacegui au niu raica ni veisautaki ira na gonevuli na nodra kilai Jiova. Au marau vakalevu ena noqu veiqaravi tiko e Taiwan.”

SEGA NI KILA VINAKA NA VOSA VOU

E dua na veiwatini mai Merika o Brian kei Michelle erau yabaki 30 vakacaca, rau toki i Taiwan ena rauta ni walu na yabaki sa oti. Rau vakila ni sega ni vakaibalebale nodrau cakacaka vakaitalatala. Ia e kaya vei rau e dua sa dede nona kaulotu: “Ke drau solia mada ga na tikidua vua e dua, mo drau nanuma ni rairai imatai ni gauna qori me rogoca kina o koya na itukutuku me baleti Jiova. Drau sa vakaitavi tiko ena dua na itavi bibi ena cakacaka vakaitalatala!” Na vosa qori e uqeti rau vakalevu na veiwatini me rau kua ni soro. E kaya vei rau e dua tale na tacida tagane: “Drau na yalolailai ke drau vakalewa e veisiga na vinaka ni nomudrau vosa vakaJaina, ena vinaka mo drau vakalewa mai na dua na soqo vakatabacakacaka ina dua tale na soqo vakatabacakacaka” Io, erau toso vinaka, rau sa painia gugumatua tiko ena gauna qo.

Na cava ena rawa ni uqeti iko mo vulica e dua na vosa vou? Saga mo gade ina vanua o via veiqaravi kina. Mo lako ina soqoni, veimaliwai kei ira na mataveitacini ena ivavakoso, qai tomani ira ena cakacaka vakavunau. E kaya o Brian: “Ni o raica ni levu era taleitaka na itukutuku vinaka ni Matanitu ni Kalou o qai vakila nodra veikauaitaki na mataveitacini, ena uqeti iko mo bolea mo veiqaravi e vanuatani.”

VAKACAVA NA CAKACAKA?

Levu era toki i Taiwan era veivakavulici ena vosa vakavalagi me tokoni ira ena nodra painia. O Kristin kei Michelle erau volitaki sasalu ni waitui. E kaya o Kristin, “Au se bera vakadua ni cakava na cakacaka qo, ia qori e vukei au meu tiko kina ena vanua qo.” Toso na gauna, sa tiko ga o ira na mai volivoli wasoma. Na cakacaka vagauna qo e tokoni rau vakailavo, e levu kina nodrau gauna me rau vakayacora na itavi bibi ni cakacaka vakapainia, oya me rau gonedau ni tamata.

“MARAUTAKA NOMU VEIQARAVI”

Rauta ni vitu na yabaki sa oti, erau toki i Taiwan e dua na veiwatini mai Merika o William kei Jennifer. E kaya o William, “Dau veivakaocai ena so na gauna na vulici ni vosa vou, na veiqaravi vakapainia, na qaravi ni ivavakoso, kei na cakacaka saumi.” Na cava e vukei rau me vuavuaivinaka kina nodrau cakacaka rau qai marautaka? Rau saga me rawarawa nodrau isausau. Kena ivakaraitaki, rau sega ni namaka vakasivia me rau kila e levu na ka ni rau vulica tiko na vosa vakaJaina, rau sega kina ni yalolailai ni rau toso vakamalua.

E nanuma lesu o William na ka e tukuna vua e dua na ivakatawa dauveilakoyaki, “Marautaka nomu veiqaravi, kua ni marautaka ga na vanua.” Kena ibalebale ga qori ni o sa biuta nomu isausau, marautaka na ka o vakayacora mo rawata kina. E kaya o William ni rau muria na ivakasala qori, e uqeti rau vakaveiwatini me rau yalorawarawa ni muria nodra ivakasala na tacida tagane ena ivavakoso, rau veisautaka na ka rau dau cakava me laulau kina nodrau cakacaka vakaitalatala ena vanua vou. E tomana, “E uqeti keirau tale ga me keirau vagalalataka na gauna me keirau marautaka kina na totoka ni yanuyanu keirau veiqaravi kina.”

Me vakataki William kei Jennifer, e dua na tacida yalewa dawai mai Merika o Megan, e ‘marautaka tiko nona veiqaravi’ ni saga tiko me rawata nona isausau me taladrodro nona vosa vakaJaina. Ena muanimacawa kece e dau tomana eso na dautukutuku era dau vunau ena dua na yalava taleitaki, oya na ikelekele ni waqa e Kaohsiung ena toba levu duadua e Taiwan. E wasea o Megan na itukutuku vinaka ena waqa kece, me vunau vei ira na dauqoli mai Bangladesh, Idia, Idonisia, na Yatu Filipaini, Tailadi, kei Vanuatu. “Ni lekaleka ga nodra tiko ena ikelekele ni waqa na dauqoli, keimami tauyavutaka e kea na vuli iVolatabu ena gauna vata qori. Mera vuli kece, au dau vakavulica e va se lima ena dua ga na gauna.” Vakacava nona vuli vosa vakaJaina? E kaya, “Au diva meu kila totolo na vosa, ia au dau vakasamataka na ka e tukuna vei au e dua na tacida, ‘Cakava na ka o rawata, o Jiova ena qai cakava na kena vo.’”

VEIGANITI, RAWARAWA, MARAUTAKI

Ni bera ni toki i vanuatani o Cathy mai Peritania, e vakekeli mada me kila na vanua e ganiti ira na tacida yalewa dawai. E masuti Jiova qai volavola ina veivalenivolavola ni tabana me kila kina na leqa e rawa nira sotava na tacida yalewa dawai. Oti e vakasamataka vinaka na ka e volai mai, mani donu vua o Taiwan.

E toki sara i Taiwan o Cathy ena 2004 ni sa yabaki 31, e saga me bula rawarawa ga. E kaya: “Au tarogi ira na mataveitacini me baleta na vanua e sau rawarawa kina na vuata kei na kakana draudrau. Nodra ivakasala vinaka e rawa kina meu maroroi ilavo.” Na cava e vukei koya me bula rawarawa? E kaya o Cathy: “Au dau masulaka me vukei au o Jiova meu lomavakacegu ena kakana kei na isulu e sau rawarawa. Au vakadinata ni rogoca o Jiova noqu masu ena nona vakavulici au meu kila na ka e bibi ena noqu bula, meu lomavakacegu tale ga ena ka sa tu vei au.” E tomana: “Au marautaka ni rawarawa noqu ivakarau ni bula meu vakabibitaka kina na veika vakayalo.”

E bula rawarawa ga o Cathy, e marautaka tale ga nona veiqaravi. Na vuna? E kaya: “Au rawa ni vunau ena vanua e taleitaki kina vakalevu na itukutuku vinaka. Qo e ka marautaki dina!” Ni yaco yani i Taiwan, e rua ga na ivavakoso vosa vakaJaina ena korolevu au veiqaravi tiko kina, ia qo sa vitu na ivavakoso. E kaya o Cathy: “Au marau dina niu vakaitavi ena cakacaka ni tatamusuki qori, au qai raica na tubu vakatubuqoroqoro!”

‘ERA VINAKATA SARA GA MEU TIKO!’

Vakacava erau marautaka tiko nodrau veiqaravi o Choong Keon kei Julie rau sa cavuti mai ena ikau ni ivakamacala? A nanuma o Choong Keon ni na sega ni yaga ena ivavakoso ni lailai ga na vosa vakaJaina e kila. Ia e veibasai sara na ka era nanuma na tacida ena ivavakoso mai kea. E kaya, “Ni wase rua na neitou ivavakoso, e levu tale na itavi e lesi vei au me vaka niu dauveiqaravi ni ivavakoso. Au vakila ena gauna oya niu sa veiqaravi tiko ena vanua e vinakati vakalevu kina na veiqaravi.” E kaya ena matadredredre, “E marautaki dina nira vinakata sara ga meu tiko!” Sa qase ni ivavakoso tiko ena gauna qo. E kaya o Julie: “Keirau lomavakacegu, keirau marau ni sa qaravi vinaka na itavi. Qori na ka keirau sega ni vakila ena gauna sa oti. Keirau lako mai me keirau veivuke, ia keirau vakila ni keirau vukei ena veika vinaka keirau mai donuya. Keirau vakavinavinaka vei Jiova ni vakadonuya me keirau mai veiqaravi e ke!”

Ena levu na vanua, e vinakati kina e levu na dautatamusuki vakayalo. Vakacava ke o sa biu vuli, o vakasamataka tiko na ka mo cakava? O se dawai tiko o qai vinakata mo vakarabailevutaka nomu veiqaravi ena isoqosoqo i Jiova? O vinakata mo dou marautaka vakavuvale eso na gauna guiguilecavi dredre? O sa cegu mai na nomu cakacaka o qai via wasea na ka o kila? Ke o via vakarabailevutaka nomu veiqaravi vakaitalatala ena vanua e vinakati vakalevu kina na dautukutuku, o na vakalougatataki dina.