Talairawarawa ina Veiliutaki​—Na Cava e Beci Kina?

“Na ka beka ena kilai tani kina na tini na yabaki sa oti, oya na beci ni yavu ni veiliutaki ena veika vakalotu kei na bula raraba, na bula veimaliwai kei na bula vakapolitiki, ena veiyasa i vuravura kece ga.”

SA SIVI oqo e vica vata na yabaki mai na veiyabaki ni 1960, oqo na tini na yabaki e vosa kina na daunitukutuku makawa, e doketa tale ga ni vuku, o Hannah Arendt. Ena gauna li oqo e sa qai kaukaua sara na vorati ni veiliutaki.

Me kena ivakaraitaki e dua na itukutuku e qai tabaki ga oqo ena niusiveva ni Lodoni, na Times, e kaya: “Era sega ni vinakata e so na itubutubu mera lewai ira na luvedra o ira na qasenivuli, era dau kudru ke ra via tovolea na qasenivuli mera vakadodonutaki ira na luvedra.” Dau vakavuqa nira dau vakadodonutaki na gone e koronivuli, era qai dau lako yani kina na itubutubu, sega wale ga mera lai vakatubu veiba kei ira na qasenivuli, ia mera tarai ira sara ga.

E dua a vosa ena vukudra na qasenivuli liu era lewe ni isoqosoqo na National Association of Head Teachers in Britain, e tukuna: “Era kaya na lewenivanua ‘E noqu dodonu,’ ia e dodonu cake mera kaya ‘E noqu itavi.’ ” Me ikuri ni nodra sega ni vakavulici ira vakadodonu na luvedra e so na itubutubu me baleta na talairawarawa ina veiliutaki, era sega ga ni dau vakadodonutaki ira na luvedra​—era qai sega ni vinakata me dua tale e cakava. O ira na gone era nanuma ni tu na nodra “dodonu,” era sa vakalaivi sara tiko ga mera vorata na nodra veiliutaki na itubutubu kei na qasenivuli, e sa macala ga na vanua era na tini kina​—“e dua na itabatamata vou era na beca na veiliutaki era na lecava tale ga na cava e dodonu kei na cava e cala,” e vola oqori na dauvolaitukutuku o Margarette Driscoll.

E vakaraitaka sara ga vakadodonu na ivola na Time ena ulutaga “Lost Generation” (Na iTabatamata Veilecayaki), na nodra vakayalolailaitaki e vuqa na itabagone e Rusia, ni vola na ka a tukuna e dua na kenadau ni rap music, e kaya: “E rawa vakacava vua e dua me nuidei ena vuravura oqo, e sega ni dua na ka e tudei kina, e sega tale ga ni dau caka vakadodonu na ka, e sega tale ga nira nuitaki na tamata?” E tokona oqo o Mikhail Topalov, e dua na kenadau ni bula veimaliwai, e kaya: “Era sega ni lialia na itabagone qo. Era raica tu na nodra veidabuitaki ira na nodra itubutubu na matanitu, era sa vakadinadinataka tale ga na kena kau tani mai vei ira na nodra itubutubu na nodra cakacaka, qai vakaotia na ilavo era sa bau maroroya tu. Eda na qai namaka vakacava mera talairawarawa ina veiliutaki?”

Ena cala ke da nanuma ni o ira wale ga na itabagone era beca na veiliutaki. Edaidai e sa tautauvata ga na nodra sa sega ni nuitaka na veiliutaki na qase kei na gone, era sa beca tale ga. E kena ibalebale beka oqo ni sa na sega ni vakabauti na veiliutaki kece ga? Na ibalebale ni veiliutaki “na kaukaua se na dodonu ni kena liutaki, vakatulewataki se lewai na ka mera cakava na tani.” Ke vakayagataki vakadodonu, ena rawa ni ivurevure ni veika vinaka. Ena rawa ni yaga ina tamata yadua kei na bula raraba. Eda na raica oqo ena ulutaga e tarava.