Talairawarawa ina Veiliutaki i Jiova
“Sa i koya oqo na lomana na Kalou: me da muria na nona i vakaro; a sa sega ni i colacola bibi na nona i vakaro.”—1 JONI 5:3, VV.
1, 2. (a) Na cava era cata kina e levu nikua mera talairawarawa ina nona veiliutaki e dua? (b) Vakacava o ira na kaya nira lewai ira ga, e dua tale beka era talairawarawa tiko kina? Vakamacalataka.
E LEVU nikua era sega ni taleitaka mera vakamalumalumu ina nona “veiliutaki” se lewa e dua. Ra dau kaya: “Me kua ni dua e lewa na ka au cakava.” Ia dau dina beka qori? E sega! Baleta nira muri ira tale tiko na ‘bulataka tu na itovo ni vuravura qo.’ (Roma 12:2, VV) Era sega gona ni lewai ira ga, ia era “vakabobulataki e na ca,” me vaka ga a tukuna na yapositolo lotu vaKarisito o Pita. (2 Pita 2:19) Era muria voli ‘na ivalavala ni vuravura qo, kei na nodra turaga kaukauwa e macawa,’ o Setani na Tevoro.—Efeso 2:2.
2 E sakitaka e dua na dauvolaivola: “Au sega ni vinakata me rau lewa noqu itubutubu na ka rau nanuma ni na vinaka vei au, se mera lewai au na bete, italatala, qasenivuli ni lotu, se me dusimaki au na iVolatabu.” E so nikua e rairai vakayagataka cala nodra veiliutaki se lewa, dredre kina me dua e talairawarawa vei ira. Ia kena ibalebale beka qo nida sega ni gadreva na veidusimaki se meda liutaki? Saumi vakamatata na taro qori ena veika eda dau wilika ena ulu ni niusiveva. Rarawataki dina ni levu era cata na veidusimaki ena gauna sara ga e gadrevi kina vakalevu.
Noda Rai me Baleta na Veiliutaki
3. Ra vakaraitaka vakacava na lotu vaKarisito ena imatai ni senitiuri nira sega ni talairawarawa tu ga ena ka kece e tukuni vei ira?
3 Nida lotu vaKarisito eda na sega ni vakamuri ira na bula tu e vuravura. Sega ni kena ibalebale qo nida sa talairawarawa tu ga ena ka kece e tukuni vei keda, da qai sega ni kauaitaka na vuna. Ia so na gauna eda na sega ga ni talairawarawa ena ka era vinakata e so meda cakava, kevaka mada ga era veiliutaki se soli tu vei ira na lewa. Qori na ka era cakava na lotu vaKarisito ena imatai ni senitiuri. Na gauna era vakaroti kina vakaukaua mera kua ni vunau, era sega sara ga ni rere se vakamalumalumu ina nodra ivakaro na bete kei ira na vakailesilesi era lewe ni Sanadrini. Era dei tiko ga ena nodra muria na ivalavala dodonu nira sega ni talairawarawa ina veiliutaki vakatamata.—Wilika Cakacaka 5:27-29.
4. iVakaraitaki cava ena iVolatabu vakaIperiu e vakavotui kina nira sega ni dau muria na tamata ni Kalou na itovo sa takalevu tu?
4 Era dei tale ga va ya e levu na dausokalou era a bula ni se bera na gauna ni lotu vaKarisito. Dua o Mosese, a ‘bese ni vakatokai me luvena na luve i Fero goneyalewa, qai digitaka ga me vakacacani kei ira na tamata ni Kalou,’ dina ni na ‘vakacudruya na tui.’ (Iper. 11:24, 25, 27) A drotaka tale ga o Josefa nona veitemaki na wati Potifa, dina ni tu vua na marama qori na kaukaua me cakava e dua na ka me vakaleqai kina o Josefa. (Vkte. 39:7-9) O Taniela a “sa lewa oti e lomana . . . me kakua ni vakadukadukalitaki koya e nai votavota ni kakana ni tui,” dina ni a dredre vua na turaga ni matanivanua e Papiloni me muria na vakatulewa qori. (Tani. 1:8-14) Na ivakaraitaki kece qo e vakavotuya sara ga na nodra dei ena ka dodonu na tamata ni Kalou ena gauna makawa, dina nira kila vinaka tu na leqa ena rawa ni yaco kina. Era sega ni dau tabetabe vei ira na tamata, dodonu gona meda vakatotomuri ira.
5. E duidui vakacava na noda rai me baleta na veiliutaki ni vakatauvatani kei ira e vuravura?
5 Dina nida dau dei ena noda vakabauta, ia me kua ni nanumi nida vakataki ira na tamata dau be, se o ira na dau saqata na veiliutaki me rogoci ga kina nodra sega ni tokona e dua na rai vakapolitiki. Ia e noda lalawa dei meda na dau vakaliuca ga na veiliutaki i Jiova se na nona lewa. Ke veisaqasaqa na ka e vakarota na Kalou kei na lawa ni tamata, dodonu me rawarawa noda vakatulewa. Eda na talairawarawa tiko ga vua na Kalou, sega ni o ira na tamata, me vakataki ira ga na yapositolo ena imatai ni senitiuri.
6. Na cava e vinaka duadua ga kina na talairawarawa ina ivakaro i Jiova?
6 Na cava e uqeti keda meda talairawarawa ina veiliutaki ni Kalou? Eda muria na ka e tukuna na Vosa Vakaibalebale 3:5, 6: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.” Eda vakabauta dei ni na yaga vei keda na ka taucoko e vinakata na Kalou meda cakava. (Wilika Vakarua 10:12, 13.) E tukuna vei ira na Isireli o Jiova “ka’u sa vakavulici iko mo vinaka kina, ka’u sa tuberi iko e na sala mo lakova.” Tukuna tale ga: “De ko a vakarorogo ki na noqu vunau! sa na qai vaka na uciwai na nomu vakacegu, ka vaka na ua ni wasawasa na nomu cakacaka dodonu.” (Aisea 48:17, 18) Eda nuitaka na malanivosa ya. Da vakadeitaka kina ni dau vinaka duadua ga meda talairawarawa ina ivakaro ni Kalou.
7. Na cava meda cakava ke sega ni matata vinaka vei keda na ivakasala ni Kalou ena nona Vosa?
7 Kevaka mada ga e sega ni matata vinaka sara na inaki ni so na ivakasala i Jiova ena nona Vosa, eda na talairawarawa tiko ga vua kei na nona ivakasala. Eda na sega ni vakabauta wale tu ga, ia eda nuitaki koya. Eda vakaraitaka noda nuitaki Jiova mai vu ni lomada baleta ni kila tu na veika ena vinaka vei keda. Vakavotui tale ga ena noda talairawarawa na noda loloma, ni vola na yapositolo o Joni: “Ni sai koya oqo na loloma vua na Kalou, me da muria na nona vunau.” (1 Joni 5:3) Ia e tiko e dua tale na ka meda kua ni vakawalena ni na vakavotui tale ga kina na noda talairawarawa.
Vakavulica na Lomada
8. E semati vakacava ina noda talairawarawa ina veiliutaki i Jiova na noda ‘vakavulica na lomada’?
8 E uqeti keda na iVolatabu meda ‘vakavulica na lomada me rawa ni vakaduiduitaka na vinaka mai na ca.’ (Iper. 5:14, VV) Eda na nakita dei kina meda kua ni muria wale tu ga na lawa ni Kalou da qai sega ni vakasamataka vinaka. Ia eda na saga meda ‘vakaduiduitaka na vinaka mai na ca,’ da qai yavutaka qori ena ivakatagedegede i Jiova. Eda na via kila na vuku se yaga ni sala i Jiova, me rawa nida kaya tale ga na vosa ni daunisame: “Na nomuni vunau sa tu e na vu ni yaloqu.”—Same 40:8.
9. Eda na saga vakacava me salavata kei na ivakatagedegede i Jiova na noda lewaeloma, cava e bibi kina qo?
9 E dodonu meda vakasamataka vakatitobu na ka eda wilika ena iVolatabu, meda taleitaka kina na lawa ni Kalou me vakataki koya ga na daunisame. Kena ivakaraitaki, nida vulica e dua na ka e vinakata o Jiova, eda rawa ni taroga: ‘Cava e ivakaro se ivakavuvuli vuku kina qo? Cava e yaga kina meu muria? Na leqa cava sa yacovi ira na sega ni muria na ivakasala qori?’ Ke da saga me salavata kei na ivakavuvuli i Jiova na vakatulewa ni noda lewaeloma, ena rawarawa sara meda cakava na vakatulewa e salavata kei na loma ni Kalou. Eda na ‘kila kina na loma ni Turaga [Jiova]’ da qai muria ena noda talairawarawa. (Efeso 5:17) Ia e sega ni ka rawarawa.
Saga o Setani me Beci na Veiliutaki ni Kalou
10. Vakamacalataka e dua na sala e vakayagataka o Setani me beci kina nona veiliutaki na Kalou?
10 Sega ni cegu o Setani ena nona saga me beci na veiliutaki ni Kalou. E dau via lewai koya ga, qai vakavotui na yalo qori ena levu na sala. Kena ivakaraitaki, na kena sa sega ni dokai tu na ituvatuva ni Kalou baleta na vakawati. So era vinakata mera tu vata ga ia ra sega ni via vakamau, so tale era vaqara ulubale mera sere kina. De dua, ena tautauvata na nodra vakasama o ira kece qo kei na dua na dauvakatasuasua rogo ena nona kaya: “Sa bau dredre dina me dua tiko ga na keda isa se watida.” E kaya tale ga: “Au sega mada ni kila e dua e yalodina tiko ga vua na watina, se me bau vinakata ena nona igu kece me cakava qori.” Ni vakasamataka lesu na kavoro ni nona vakawati e kaya e dua tale na dauvakatasuasua rogo: “Eda a rairai sega ga ni buli meda tiko ga kei na dua ena noda bula taucoko.” Ena ka vakayalomatua gona meda taroga, ‘Au talairawarawa beka ina veiliutaki i Jiova ena veika me baleta na vakamau, se sa moica noqu vakasama na rai ni vuravura qo ni sega ni dodonu me dei?’
11, 12. (a) Na cava ena rairai dredre kina vei ira na itabagone mera talairawarawa ina veiliutaki i Jiova? (b) Tukuna e dua na ivakaraitaki ni kena beci na lawa kei na ivakavuvuli i Jiova.
11 O itabagone beka ena isoqosoqo i Jiova? Ke vaka kina, e rairai taketetaki iko sara tiko ga o Setani, ena nona sasaga me beci na veiliutaki i Jiova. “Na gagadre ca vakacauravou” kei na nodra veiuqeti na nomu icaba, o na nanuma kina ni sa rui kaukaua tale na lawa ni Kalou. (2 Tim. 2:22) Kua vakadua ni nanuma qori. Saga mo raica ni vukutaki dina qai yaga na talairawarawa ina ivakatagedegede ni Kalou. Kena ivakaraitaki, e kaya na iVolatabu meda “dro tani mai na daudara [“veidauci,” NW].” (1 Kor. 6:18) Taroga tale mada: ‘Cava e ivakaro vuku kina qo? Ena yaga vakacava na noqu talairawarawa kina?’ De o kila tiko e so era a sega ni talairawarawa ina ivakaro ya, ra qai sotava kina na leqa mosimosi. Vakacava era marau tiko beka na gauna qo? E vinaka cake beka na nodra bula ena gauna qo ni vakatauvatani kei na gauna marautaki era se tiko kina ena isoqosoqo i Jiova? Dua beka na ka vinaka era kila tiko ga o ira e vakavu marau, ia era sega ni kila na dauveiqaravi ni Kalou?—Wilika Aisea 65:14.
12 Vakasamataka mada na ka a kaya ena dua na gauna e liu o Sharon, e dua na lotu vaKarisito: “Tauvi au na AIDS niu beca na lawa i Jiova. Au dau nanuma lesu na veiyabaki marautaki au a qaravi Jiova tu kina.” E vakila ni sa bau ka lialia dina na nona beca na lawa i Jiova, ni dodonu ga me a doka vakalevu. Era itataqomaki na lawa kece i Jiova. A qai leqa o Sharon ni oti ga e vitu na macawa nona vola na veika qori. E matata mai na ka vakaloloma e yacovi koya qori, ni sega ni dolea tu e dua na ka vinaka o Setani vei ira na coko ena vuravura ca qo. Ni ‘vu ni lasulasu,’ e yalataka e levu na ka ia era veivakaleqai tale, vaka ga a cakava vei Ivi. (Joni 8:44) Sega ni vakabekataki ni vinaka duadua ga meda talairawarawa ina veiliutaki i Jiova.
Qarauna na Yalo ni Via Lewai Koya Ga
13. Na cava e dua na ka e vakavotui kina na yalo ni via lewai keda ga e dodonu meda na qarauna?
13 Nida talairawarawa tiko ina veiliutaki i Jiova, ena gadrevi meda qaqarauni meda kua ni via lewai keda ga. Ke da dau dokadoka eda na nanuma nida sega ni gadreva nona veidusimaki e dua tale. Kena ivakaraitaki, eda na rairai cata beka na nodra veivakasalataki o ira na sa lesi tu mera dusimaki keda na tamata ni Kalou. Sa tauyavutaka tu na Kalou e dua na ituvatuva me vakarautaka kina na dauveiqaravi yalodina ka vuku na kakana vakayalo ena kena gauna dodonu. (Maciu 24:45-47, VV) Qo sara ga na sala e karoni ira kina na nona tamata nikua na Kalou, meda yalomalumalumu gona da qai talairawarawa. Meda vakatotomuri ira na yapositolo yalodina. Ena gauna era tarabe kina e so na tisaipeli qai sega ni muri Jisu, a tarogi iratou na yapositolo: “Dou sa via lako tani talega koi kemudou?” E sauma o Pita: “Kemuni na Turaga, keitou na lako vei cei? sa tu ga vei kemuni na vosa ni bula tawa mudu.”—Joni 6:66-68.
14, 15. Na cava meda vakamalumalumu kina ina ivakasala vakaivolatabu?
14 Noda talairawarawa ina veiliutaki i Jiova e vauci kina noda muria na ivakasala ena nona Vosa. Kena ivakaraitaki, e dau vakaroti keda tiko ga na dauveiqaravi yalodina meda “yadra tiko ga ka yalo matua.” (1 Ces. 5:6, VV) Veiganiti dina na ivakasala qori ena iotioti ni veisiga eda bula tu kina qo ni levu era “daulomani ira walega . . . era na dauvinakata nai lavo.” (2 Tim. 3:1, 2) Vakacava na itovo sa takalevu tu qori, eda na rawa beka ni temaki kina? Io. Keda vakabibitaka na isausau vakayago, eda na vakawalena noda veika vakayalo, da rawa tale ga ni domodomoiyau kina. (Luke 12:16-21) Sa ka vakavuku gona meda talairawarawa ga ina ivakasala vakaivolatabu, meda kua ni via nanumi keda ga, me vaka sa takalevu tu ena vuravura e dusimaka tu o Setani!—1 Joni 2:16.
15 E nodra itavi na qase ni ivavakoso mera vakani ira na lewe ni ivavakoso ena kakana vakayalo e vakarautaka na dauveiqaravi yalodina ka vuku. E uqeti keda gona na iVolatabu: “Dou talairawarawa vei ira sa liutaki kemudou, ka mo dou vakamalumalumutaki kemudou: ni ra sa yadrava na yalomudou, me vakataki ira era na tukuni ira kina, me ra kitaka kina e na marau, ka sega e na vutugu: ni sa sega ni yaga vei kemudou me vakaoqori.” (Iper. 13:17) Kena ibalebale beka qori nira sega ni dau cala na qase ni ivavakoso? Sega! E raica vinaka tu na Kalou na nodra malumalumu, sega ni dua tale. Ia se vinakata tiko ga o Jiova meda vakamalumalumu vei ira. Dina nira sega ni uasivi na qase ni ivavakoso, ia na noda tokoni ira e vakadinadinataka noda talairawarawa tiko ina veiliutaki i Jiova.
Na Bibi ni Yalomalumalumu
16. Eda na vakaraitaka vakacava nida doka ni Ulu ni ivavakoso vaKarisito o Jisu?
16 Meda nanuma tiko ni o Jisu ga na Ulu dina ni ivavakoso. (Kolo. 1:18) Qori e dua na vuna meda na vakamalumalumu tiko kina ena nodra veidusimaki na qase ni ivavakoso, eda na ‘dokai ira, da lomani ira tale ga vakalevu.’ (1 Ces. 5:12, 13) Era na yalomalumalumu tale ga na qase ni ivavakoso ena nodra qarauna mera vakasavuya ga na itukutuku ni Kalou ena ivavakoso, sega ni nodra vakasama ga. Mera “kakua ni uasivia na ka sa volai tu” mera vakavulica kina na nodra nanuma ga.—1 Kor. 4:6.
17. Na cava e rerevaki kina na yalo ni vakaliuci keda ga se viavialevu?
17 Mera qarauna tale ga na lewe kece ni ivavakoso na yalo ni via vakaliuci keda ga se na viavialevu. (Vkai. 25:27) Qori sara ga na nona malumalumu e dua na tisaipeli rau a sota kei na yapositolo o Joni. E qai vola o Joni: “Ko Tiotirifi, o koya sa viavialiu vei ira, sa sega ni vakacegui keitou. O koya oqo ka’u na nanuma kina na nonai valavala sa kitaka ko koya, ni’u na lako yani, ni sa dau vosavakacacataki keitou e na vosa ca.” (3 Joni 9, 10) Eda vuli kina ena gauna qo. Ke da liaca nida sa via vakaliuci keda tiko, meda cavuraka tani vakatotolo. Kaya na iVolatabu: “Sa liu na viavialevu, ia sa muri na rusa, a sa liu na yaloviavialevu ia sa muri na bale.” Mera vorata na viavialevu o ira na talairawarawa ina veiliutaki ni Kalou, ke sega era na beci kina.—Vkai. 11:2; 16:18.
18. Na cava ena uqeti keda meda talairawarawa tiko ga ina veiliutaki i Jiova?
18 Meda saga ena noda igu taucoko meda valuta na yalo ni via lewai keda ga sa takalevu tu e vuravura, da qai talairawarawa tiko ga ina veiliutaki i Jiova. Meda dau vakasamataka vakatitobu na itavi dokai eda vakalougatataki tu kina oya na noda qaravi Jiova. Na noda sa mai maliwai ira tiko na tamata ni Kalou e ivakadinadina ni uqeti keda o Jiova ena nona vakayagataka na yalo tabu. (Joni 6:44) Kua vakadua ni vakawaletaka na nomu veiwekani kei na Kalou. Meda saga mada ga ena veibasoga ni noda bula kece nida sega ni via lewai keda ga, ia eda talairawarawa tiko ga ina veiliutaki se lewa i Jiova.
O se Nanuma Tiko?
• Na cava e okati ena noda talairawarawa ina veiliutaki i Jiova?
• E semati vakacava na noda vakavulica na lomada ina noda talairawarawa ina veiliutaki i Jiova?
• Sala cava soti e saga kina o Setani me beci na veiliutaki i Jiova?
• Na cava e bibi kina na yalomalumalumu ina noda talairawarawa ina veiliutaki i Jiova?
[iYaloyalo ena tabana e 18]
“Sa kilikili kei keitou me keitou talairawarawa vua na Kalou, me kakua ga vei ira na tamata”
[iYaloyalo ena tabana e 20]
E ka vakayalomatua meda dau muria na ivakatagedegede ni Kalou