Sa Voleka​—Na Vuravura e Sega Kina na Yalorarawa

SA DREDRE sara na bula qai levu na vu ni yalorarawa. Nida rarawa e dredre meda tarova na lomada. O ira mada ga era dau taleitaka na bula e rawa ni yaco tale ga mera rarawa! Meda raica mada e so na ivakaraitaki.

Ena gauna makawa, e a yalolailai na parofita o Mosese mani kaya vua na Kalou: “Ia kevaka kemuni sa cakacaka vakaoqo vei au, mo ni vakamatei au sara mada, kevaka kemuni sa lomani au; ia me’u kakua ni kunea na noqu vakaloloma.” (Tiko Voli mai na Lekutu 11:15) Nona dro mai vei ira na kena meca, e kaya na parofita o Ilaija: “I Jiova sa rui levu; ni vakaotia ga na noqu bula.” (1 Tui 19:4) E kaya na parofita o Jona: “Ia oqo ga, kemuni Jiova, au masuti kemuni kina mo ni kauta tani vei au na noqu bula; ni sa vinaka meu mate ka ca meu bula.” (Jona 4:3) Ia, e sega ni dua vei iratou o Mosese, o Ilaija se o Jona me via vakamatei koya. Eratou kila kece na vunau ni Kalou: “Mo kakua ni laba.” (Lako Yani 20:13) Ni dei na nodratou vakabauta na Kalou, eratou kila kina ni tiko na iwali ni leqa, ni isolisoli ni Kalou na bula.

Vakacava na leqa eda sotava? Me ikuri ni leqa ni vakasama se tauvimate tale e so, eda dau sotava tale ga na ka mosimosi ena ligadra na noda lewenivuvale, o ira eda vakaitikotiko vata, se o ira eda cakacaka vata. Na iVolatabu e tukuni ira na tamata era vakasinaiti “e na veika ca kece ga, na veika dukadukali, na kocokoco, na veicati, na vuvu, na laba, na veivala, na lasu, na yalo cudrucudru kei na dauvakacaca. Era veikaseti vakataki ira, era cata na Kalou, veivakasewasewani, dokadoka ka qaciqacia; era sa dau vakasamataka e vuqa na sala me ra cakava kina na ka ca, ka ra sa sega ni muria na nodra vosa na nodra i tubutubu. Era sa yalowai; era sega ni dau vakayacora na nodra vosa ni yalayala, ka sega ni dau veikauwaitaki se lomani ira na tani.” (Roma 1:​28-​31, VV) E dredre na bula nira bula wavoliti keda tu na tamata vaka oqo. E rawa vakacava nida vukei ira era gadreva dina tu na vakacegu?

Tu Vakarau Mo Vakarorogo

Na tarabi ni leqa kei na rarawa e rawa ni vakavuna vua e dua me veilecayaki nona vakasama. E kaya na vuku: “E dina, na veivakasaurarataki sa vukica na tamata vuku me tamata lialia.” (Dauvunau 7:7) O koya gona, ke tukuna tiko e dua ni via vakamatei koya, e dodonu me kauaitaki sara vakalevu. Na nona leqa, de leqa beka ni vakasama se tauvimate vakayago se vakayalo, ena gadrevi me dikevi sara vakatotolo. Na veiqaravi vakavuniwai era duidui tu, ia me na dui vakatau ga vei keda yadua na kena eda na vakayagataka.​—Kalatia 6:5.

Se mani cava e vu ni nona via vakamatei koya e dua, ena vukei koya sara ke rawa ni talaucaka na lomana vua e dua e yalomatua, e yalololoma, qai yalovosovoso. O ira na lewenivuvale era tu vakarau mera vakarorogo e rawa nira veivuke tale ga. Me ikuri ni veinanumi kei na yalovinaka, na vakasama e veitaraicake ena Vosa ni Kalou ena rawa ni yaga sara vakalevu vei ira e sega tu na nodra inuinui.

Veivuke Vakayalo Vei Ira na Lomabibi

De o na kidroa ni o dikeva ni bau veivakayaloqaqataki dina na wili iVolatabu. E dina ni sega ni ivola vakavuniwai ni mona, ia e rawa ni vukei keda na iVolatabu meda vakamareqeta na bula. E kaya o Tui Solomoni: “Au sa kila ni sa sega tale na ka vinaka cake kina, ka me reki ga na tamata, ka caka vinaka ni sa bula tiko: Ia me kana talega ka gunu na tamata yadua, ka kunea na kena vinaka ni nona cakacaka kecega, sai koya oqo na isolisoli ga ni Kalou.” (Dauvunau 3:​12, 13) Me ikuri ni ka vinaka eda cakava me vakainaki kina na bula, e tu tale e so na ka​—na cagi bulabula, na matanisiga, na senikau, na vunikau, kei na manumanu vuka​—era isolisoli kece ni Kalou meda marautaka.

E vakamarautaki keda vakalevu na vosa ni veivakacegui ena iVolatabu, ni Kalou o Jiova kei na Luvena o Jisu Karisito erau kauaitaki keda. (Joni 3:​16; 1 Pita 5:​6, 7) E vaka tale ga kina na daunisame ena nona kaya: “Me vakacaucautaki na Turaga o koya sa colata na nodai colacola e na veisiga, io, na Kalou na nodai vakabula.” (Same 68:19) Eda na rairai nanuma ni sega na keda yaga, ia na Kalou e sureti keda meda masu vua. E vakadeitaka o koya ni o ira kece era kerekere vagumatua vua ena yalomalumalumu era na rogoci.

E sega ni dua e namaka na bula nikua me sega kina na leqa. (Jope 14:1) Ia, na ka dina mai na Vosa ni Kalou e vakaraitaka vei ira e lewe vuqa, ni nona via vakamatei koya e dua e sega ni sala me walia kina na leqa. Dikeva mada se a vukea vakacava e dua na ivakatawa ni valeniveivesu na yapositolo o Paula. Ni “yadra mai na moce nai vakatawa ni vale ni veivesu, ia ni sa raica sa tadola tu nai sogo ni katuba ni vale ni veivesu, sa ucuna na nonai seleiwau, ka nakita me vakamatei koya, ni sa nanuma era sa dro ko ira na tamata sa vesu tu.” Sega ni bera nona vakadeitaka e lomana na ivakatawa ni valeniveivesu ni nona vakamatei koya ena vinaka cake mai na nona vakalialiai kei na nona na vakamatei vakararawa ni sega ni yalodina ena nona itavi. E qai kaci na yapositolo: “Kakua ni ko vakacacani iko: keitou sa tiko kecega eke.” E sega ni galu o Paula. Rau mani vakayaloqaqataka na ivakatawa ni valeniveivesu o Paula kei Sailasa ni tarogi rau: “Oi kemudrau na turaga, a cava meu kitaka me’u bula kina?” Rau sauma: “Vakabauta na Turaga ko Jisu Karisito, ko na bula kina, kei ira tale ga na nomu lewe-ni-vale.” Rau mani tukuna vua kei ira na nona lewenivuvale na vosa i Jiova mani yaco me “papitaisotaki sara, ko koya kei ira kecega na kai nona.” E marau vakalevu na ivakatawa ni valeniveivesu kei ira na nona lewenivuvale nira sa qai kunea na ibalebale dina ni bula.​—Cakacaka 16:​27-​35.

Nikua, eda lomavakacegu nida kila ni sega ni vakavuna na veika ca na Kalou! E vakaraitaka nona Vosa ni tiko e dua na yalo velavela, na “yacana na Tevoro, kei Setani,” ni “temaki ira kecega na kai vuravura.” Ia ena sega ni dede na nona gauna. (Vakatakila 12:​9, 12) Ena dua na gauna ga oqo ena muduka kina na Kalou na ituvaki ca e vakavuna tiko o Setani kei ira nona timoni ena vuravura oqo. Na vosa ni yalayala ni Kalou me baleta na vuravura vou ni yalododonu ena tinia na nuiqawaqawa kei na nodra via vakamatei ira ga na tamata.​—2 Pita 3:​13.

Na Vakacegu Vei Ira na Tagica na Veivuke

Ena gauna mada ga oqo, o ira era yalolailai tu vakalevu era rawa ni kunea na vakacegu ena iVolatabu. (Roma 15:4) E lagata na daunisame o Tevita: “A yalo sa ramusu, ka bibivoro, ko ni na sega ni cata, na Kalou.” (Same 51:17) E ka dina kece, eda dau sotava na veivakatovolei da qai vakila tale ga na revurevu ni noda ivalavala ca. Ia nida mai kilai koya dina na Tamada vakalomalagi dau loloma, dau yalorawarawa, ena solia vei keda na nuidei nida ka talei e matana. Na Kalou e rawa ni noda iTokani, noda Qasenivuli tale ga. Kevaka meda bucina meda veiwekani voleka kei na Kalou o Jiova, ena sega vakadua ni biuti keda o koya. “Koi au ko Jiova na nomu Kalou,” e tukuna na noda Dauveibuli, “ka’u sa vakavulici iko mo vinaka kina, ka’u sa tuberi iko e na sala mo lakova.”​—Aisea 48:17.

E levu sa vukei ira tiko na nodra dau vakararavi vua na Kalou. Me kena ivakaraitaki: E dau vakavuna na malumalumu i Mara na lomabibi e tarai koya tu ena gauna a coqa mate kina na luvena tagane.a E taqaya o Mara qai tovolea me vakamatei koya. Ia, nikua, sa dau yadra totolo ena veimataka me cakava na cakacaka ni vale. Sa taleitaka tale ga na vakarogoca na ivakatagi kei na nona dau vukei ira na tani. Na inuinui “ni na tu cake tale ko ira na mate, ko ira na yalododonu kei ira na sega ni yalododonu,” sa mai seavu kina na rarawa e yacovi koya tu me baleta na mate ni luvena tagane lomani, qai dei na nona vakabauta na Kalou. (Cakacaka 24:15) Ni sega ni vinakata o Mara me vakataki ira na agilosi e lomalagi, e tara sara ga na lomana na vosa oqo ena Same 37:11: “Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.”

E dua tale na yalewa ni Brazil, o Sera, e cakacaka sara vakaukaua me dua na tina vinaka vei iratou na luvena. E vakatusa: “Dua na ka na noqu osooso, ni gauna e mate kina vakasauri o tamaqu qai lako vata na noqu mai kila ni a lasa kei na dua na yalewa o watiqu, au sega vakadua ni vakasamataka meu masu vua na Kalou me vukei au.” Ena levu ni nona yalorarawa e saga o Sera me vakamatei koya. Na cava e qai vakalomavakacegutaki koya? Na nona kauaitaka na veika vakayalo. “Veibogi kece ni bera niu moce, au dau wilika na iVolatabu, au qai dau tovolea meu biuti au ena ituvaki era tu kina na tamata au wilika tiko na kedra italanoa. Au dau wilika tale ga na ivoladraudrau Na Vale ni Vakatawa kei na Yadra!, au dau taleitaka vakalevu na ulutaga era talanoataka kina na tacida na nodra bula, niu raica rawa kina ni sega soti ni dredre sara na kequ ituvaki.” Ni kila o Sera ni o Jiova e nona itokani vinaka duadua, sa vulica me dau talaucaka vua na lomana ena masu.

Na Bula Mai Muri e Sega Kina na Yalorarawa

E veivakacegui dina nida kila ni rarawa e sotava tiko na kawatamata ena lekaleka ga! Ena ruku ni veiliutaki ni Matanitu ni Kalou, era na marau o ira na itabagone kei ira na qase era vakaleqai tu ena vuku ni basulawa, lewa ca kei na veivakaduiduitaki. Me vaka sa tukuni oti ena parofisai ena same, ni Tui lumuti i Jiova, o Jisu Karisito, “ni na vakabula ko koya na dravudravua ni sa tagi; kei koya sa vakararawataki ka sa sega e dua me vukei koya.” Kuria, “ena lomana ko koya na tamata malumalumu ka dravudravua, ka vakabula na yalodra na dravudravua.” E dina taucoko, “ena vakabula na yalodra mai na lawaki kei nai valavala kaukauwa: ena ka talei talega e matana na kedra dra.”​—Same 72:​12-​14.

Sa voleka na gauna me na vakayacori kina na vosa ni parofisai oya. O marautaka beka ni tukuni nida na bula tawamudu ena dela ni vuravura oqo ena ituvaki totoka e sa cavuti oti? Ke vaka kina, e tiko na vuna mo rekitaka kina na bula, ni oqo e isolisoli ni Kalou. Kevaka mo wasea na vosa ni yalayala e veivakacegui vakaivolatabu oqo, o na rawa ni vakamarautaki ira era vakasaqara tu na veivuke ena vuravura tawaveinanumi oqo.

[iVakamacala e ra]

[iYaloyalo ena tabana e 6]

E levu na ka e rawa ni vakamarautaki keda ena gauna oqo

[iYaloyalo ena tabana e 7]

O bau vakanamata tu ina dua na vuravura e sega kina na yalorarawa?