Na Tagi ni Kere Veivuke

“SA GUILECAVI au na Kalou!” e tagicaka e dua na yalewa ni Brazil. E nanuma o koya ni sa sega tale ni qai vakainaki na nona bula ni mai mate vakasauri o watina. O sa bau tovolea mo vakaceguya e dua e rui rarawa vakalevu se dua e tagica na veivuke?

E levu era tini vakamatei ira sara ni tarai ira vakasivia na lomabibi​—e levu vei ira oqo era itabagone. E vakamacalataka e dua na niusipepa na Folha de S. Paulo, e dua na vakadidike e Brazil e vakaraitaka “ni sa tubu cake ena 26 na pasede na levu ni itabagone era vakamatei ira.” Me kena ivakaraitaki, dikeva mada na ka e sotava o Wame,a e dua na cauravou e São Paulo. E sega na nona itubutubu, sega na nona vale, sega na nona gauna vakataki koya, sega tale ga na nona itokani. Me iwali ni nona leqa e nanuma o Wame me lai rika ena dua na wavu.

E rua na luvei Elenoa, e itubutubu le dua o koya, mani sotava e dua tale na tagane. Ni oti ga e dua na vula, rau sa lai tiko vata sara ena vale nei tinai tagane, e marama dauvakatevoro qai dau mateni o koya. E mani dua tale na luvei Elenoa. Lakolako sa dau mateni tale ga o Elenoa, ia ena levu ni lomabibi e bikai koya tu e saga me vakamatei koya. Ena vuku ni veika kece oqo, eratou tini kau tani ga mai vua na luvena ena lewa ni mataveilewai.

Vakacava o ira na sa qase? O Maria e wacece qai dauvosa. Ni sa qase cake sa tekivu leqataka na nona cakacaka vakanasi baleta ni rerevaka de qai cakava cala e so na ka. E vakavuna sara ga me lomabibi kina. Tovolea o koya e so na wainimate, ia ni se lomabibi tiko ga mani kerea nodra veivuke na vuniwai, e vukei koya na nodra veiqaravi. Ia ni vakacegui mai na nona cakacaka ni sa yabaki 57, sa baci lomabibi tale ni sega sara ga ni kila se cava me cakava. E mani nanuma kina me sa vakamatei koya.

“Voleka ni 10 na pasede vei ira era lomabibi era saga mera vakamatei ira,” e tukuna o José Alberto Del Porto, e dua na parofesa ena São Paulo University. “Sega nida vakabauta rawa ni levu vei ira na tamata era mate ena nodra vakamatei ira ga, mai vei ira era labati, ia e dina taucoko oqo,” e ripotetaka o Vuniwai David Satcher, na iliuliu ni tabana ni bula e Mereke.

Ena so na gauna ni saga e dua me vakamatei koya e vakaraitaka ni tagica tiko na veivuke. Era saga na nona lewenivuvale kei ira nona itokani mera cakava na ka ena yaga vua e lomabibi. Ena sega ni yaga ke tukuni: “Kua ni o lomalomani iko vakalevu,” “E levu era vakaloloma cake sara mai vei iko,” se, “O keda kece eda nuiqawaqawa ena so na gauna.” Me kena veibasai ga, ena vinaka mo itokani dina mo dau vakarorogo tale ga. Io, tovolea mo vukea e dua e lomabibi me raica ni vakainaki na bula.

E vola e dua na dauvolaivola ni Varanise o Voltaire: “O koya e vakamatei koya ena dela ni lomabibi, ena diva me a bau bula ke a wawa ga me dua tale na macawa.” O koya gona, ena rawa vakacava nira kila o ira na yalorarawa ni vakainaki dina na bula?

[iVakamacala e ra]

[iYaloyalo ena tabana e 3]

E tubu tiko ga na kedra iwiliwili na itabagone kei ira na uabula era vakamatei ira

[iYaloyalo ena tabana e 4]

O rawa vakacava ni vukea e dua e lomabibi?