E Rawa Beka Mo Toro Voleka Vua na Kalou e Tawarairai?
‘Ena rawa vakacava me keirau veiwekani kei na dua au sega ni raica?’ o na taroga beka. Oqori e dua na taro vinaka. Ia vakasamataka mada:
E BIBI beka meda veirai sara me rawa nida qai veiwekani vinaka kei na dua? E sega tale beka ga ni bibi se bibi duadua na veika tawarairai? E dina taucoko! Ni so mada ga era mai veiwekani voleka ena nodra veivolavolai ga vakawasoma—ena nodra ivola e kilai votu kina na ka era taleitaka, kei na ka era sega ni taleitaka, na nodra isausau, na cava era vakaliuca, na nodra ivakarau, kei na so tale na nodra itovo se na ka era dau kauaitaka.
O ira tale ga na mataboko era vakadinadinataka ni sega ni bibi meda veirai mata me qai rawa nida veiwekani voleka. Vakasamataki rau mada o Etuate kei Kelera, erau mataboko ruarua na veiwatini oqo.a Erau veirai o Etuate kei Kelera ena nodra koronivuli torocake na mataboko, na vanua erau vuli tiko kina. E taleitaka o Etuate na itovo i Kelera, ena nona dau vosa dina kei na nona rai me baleta na cakacaka. Yaco tale ga me taleitaki Etuate o Kelera, e kaya, “e tiko sara ga vei Etuate na itovo e dau vakabibitaki vei au ena noqu tuberi cake mai.” Sa tekivu sara me rau veibuku, rau mani vakamau ni oti e tolu na yabaki.
E kaya o Etuate: “Ni o drau sa vakaitikotiko vata, e sega ni dredre nomu saga mo drau veiwekani, dina ga ni o drau mataboko. Ena sega beka ni rawa mo drau veirai, ia e rawa ga na veikilai.” Sa oti oqo e 57 na yabaki, e se kaukaua tu ga nodrau veilomani. Rau vakamacalataka e va na sala e talei tu ga kina nodrau veiwekani: (1) kila na nona itovo qoroi na kemu isa, (2) vakananuma na itovo oqori, (3) me tadola tu ga na wa ni nomudrau veivosaki (4) drau cakava vata na ka.
Na va na vakasama oqori e ganita na mataqali veiwekani cava ga, o iko kei na dua nomu itokani, ena loma ni bula vakawati, se o koya e bibi duadua na veiwekani kei na Kalou. Ena ulutaga e tarava eda na raica kina na kena taurivaki na vakasama oqori me rawa nida veiwekani voleka kei na Kalou o koya eda sega ni raica rawa.b
[iVakamacala e ra]
a Sa veisau na yaca.
b Na veiwekani kei na Kalou e yavutaki ena vakabauta ni bula dina o koya, e sega ni vaka na veiwekani vakatamata. (Iperiu 11:6) Mo qai raica na ivola na Is There a Creator Who Cares About You?, tabaka na Watchtower Bible and Tract Society of New York, Inc., ena vakaukauataka noda vakabauta na Kalou na ivakamacala e tu kina.