O se Nanuma Tiko?

O taleitaka na ka o vakawilika ena itabataba ni Vale ni Vakatawa era se qai taba wale ga oqo? Ia raica mada ke rawa mo sauma e vica na taro oqo:

• Na cava na imatai ni kalawa me wali kina na duiyaloyalo?

Na imatai ni kalawa me wali kina na duiyaloyalo, oya meda kila ni rawa ni curumi keda kece na vakanananu kei na rai cala. Me kena ikuri, meda lialiaci keda, de dua eda na raica kina ni sega ni vu ni leqa na tamata tale kadua, o keda ga.​—8/15, taqana e 23.

• Ena yaco e naica na gauna e vakamacalataki ena Cakacaka 3:21 (VV), me “gauna sa na vakavoutaki kina na veika kece”?

E basogairua na veivakavoui e yalataki oqo. Kena imatai, na veivakavoui e tekivu ena 1919 e yaco kina na parataisi vakayalo eda sa vakila sara tu ga oqo. Kena ikarua, na vakavoui tale ni noda vuravura me parataisi dina.​—9/1, taqana e 17, 18.

• Na cava e vakaibalebaletaka na Vosa Vakaibalebale 6:​6-8, ni qasikalolo e sega ni dua me vakaraici ira, ia era ivakaraitaki vinaka vakacava vei keda ena tikina oqori?

Ena nodra itikotiko na qasikalolo e tiko e dua e tinadra, ia e tinadra ga baleta ni vakalutu yaloka, e sega ni dau vakaraici ira na luvena. Ia era cakacaka vakaukaua na qasikalolo. E dodonu meda cakacaka tale ga vakaukaua, da qai saga meda vakavinakataka na noda cakacaka, se dua e raici keda tiko se sega.​—9/15, taqana e 26.

• E dina beka na parofisai i Ulita ena 2 Tui 22:​20, e kaya kina ni na kau o Josaia “e na vakacegu” ina nona ibulubulu, ni a mate o koya ena buca ni ivalu?

Io, e rawa nida kaya ni a mate ena vakacegu baleta ni mate ni bera na rarawa levu ena 609-​607 B.S.K., ni bukudruadruataki qai vakarusai Jerusalemi na matanitu o Papiloni.​—9/15, taqana e 30.

• Na cava e veiganiti kina na vosa i Solomoni ni vakatauvatana na yalewa vakawati “me sa vaka na teira dauloloma . . . kei na me yalewa kila sa matavinaka”? (Vosa Vakaibalebale 5:​18, 19)

E dau malumu nona ivakarau na me kila yalewa, e dau totoka tale ga na kena irairai. Ia, e rawa ni bula tu ga qai dau vakasucu o koya ena veiqaravatu, ena vanua veivatu e dredre me lakovi, e kunekunei dredre kina na kakana. ​—10/1, taqana e 30, 31.

• O cei o Henry Grew kei George Storrs?

Rau bula donuya na ika19 ni senitiuri na rua na turaga oqo, rau dau vulica vagumatua na iVolatabu. Sa mai kila o Grew ni sega ni vakaivolatabu na ivakavuvuli ni Letoluvakalou, na tawamate rawa ni yalo kei na eli bukawaqa. Nona vuli o Storrs, e mai kila kina ni so era na rawata na bula tawamudu e vuravura. Sa qai muri rau mai o Charles Taze Russell, o koya e tekivu tabaka na ivoladraudrau oqo ena 1879. ​—10/15, taqana e 26-​30.

• Era raica vakacava na iVakadinadina i Jiova na veiqaravi vakavuniwai e vakayagataki tale kina vua e dua na nona dra ga?

Nira muria tiko na nodra vakabauta e yavutaki ena iVolatabu, era sega ni maroroya na nodra dra me rawa ni soli lesu vei ira ena veiqaravi vakavuniwai. Me na vakatulewataka sara ga na lotu Vakarisito yadua na sala me na vakayagataki kina na nona dra ena gauna ni veisele, na gauna e dikevi kina vakavuniwai, se ena ivakarau ni veiqaravi e caka vua. Me vakasamataka vakabibi o koya na ka e kaya na iVolatabu me baleta na dra, me nanuma tale tiko ga na nona yalataki koya vakatabakidua vua na Kalou.​—10/15, taqana e 30, 31.

• Na cava na ka e gadrevi vakalevu me vaka e vakaraitaka na vakadidike e vakayacori vei ira na iVakadinadina i Jiova ena veiyasa i vuravura ena itekivu ni yabaki oqo?

E gadrevi e sivia e 11,000 na Kingdom Hall ena veivanua era se qai vakatorocaketaki tiko, e lailai kina na ilavo. E vakayagataki tiko na nodra cau na lotu Vakarisito ena levu na vanua ena porokaramu ni kena tara na Kingdom Hall.​—11/1, taqana e 30.

• Na cava e rua na vosa taumada vakirisi e vakayagataki ena iVolatabu me baleta na sokalou?

E dua na lei·tour·giʹa, e vakadewataki me “veiqaravi ena matanalevu.” E dua tale na la·treiʹa, e vakadewataki me “veiqaravi tabu.” (Iperiu 10:​11, NW; Luke 2:​36, 37, NW)​—11/15, taqana e 11, 12.

• Na ka ni vuli bibi cava e vulici mai na kedrau itukutuku vakaivolatabu o Atama kei Ivi?

Ni ka sesewa ke dua e saga me liutaki koya ga vakataki koya, me vakanadakuya na Kalou o Jiova.​—11/15, taqana e 24-​7.

• Na cava e so na ivakadinadina ena iVolatabu e vakaraitaka ni dau vakaukauataki ira nona tamata na Kalou?

Eratou tukuna sara ga o Tevita, o Apakuki kei na yapositolo o Paula, ni o Jiova na Kalou e dau vakabulabulataki, se vakaukauataki iratou. (Same 60:12; Apakuki 3:​19; Filipai 4:​13) O koya gona, e rawa tale ga nida lomadei ni tu vua na Kalou na igu kei na kaukaua me vakaukauataki keda.​—12/1, taqana e 10, 11.