Bula Leqataki

“E sega ni dua na ka o rawa ni cakava ena dua na siga​—⁠wili kina na moce—⁠me sega na kena leqa kevaka mada ga e iotioti ni ka mo cakava.”​—iVoladraudrau na Discover.

E VAKATAUVATANI na bula me vaka na lakova e dua na vanua era bulu tu kina na gasaukuro, dau vakavuqa nida sega ni vakasalataki taumada kina, eda rawa ni sotava na vakacalaka kei na mate. E duidui na mataqali leqa e sotavi ena veivanua. Wili kina na vakacalaka e gaunisala, veivaluvaluti ni lewenivanua, dausiga, AIDS, kenisa, mateniuto, kei na vuqa tale. Me kena ivakaraitaki ena vanua wavokita na Sahara mai Aferika, e veivakamatei vakalevu duadua kina na AIDS, “era mate kina na le 2.2 na milioni, vakatinitaki na kedra iwiliwili kece na mate ena ivalu ni veivanua mai Aferika,” e kaya na U.S.News & World Report.

Ia ena gauna mada ga oqo, e vakayagataki e vuravura e vica vata na bilioni na dola ena sasaga me vakabalavutaki kina na bula vaka kina na vakalailaitaki ni tauvimate kei na leqa ni yago. Era yaga tale ga na sasaga e so me vaka na digitaki ni ka me laukana, na ka me gunuvi kei na vakaukaua yago. Ia, e tiko e dua na ivurevure ni ivakamacala e rawa ni nuitaki e tara na veibasoga ni bula kece, ena rawa ni vukei iko mo marautaka e dua na bula e vinaka cake, e nuitaki tale ga. Oqori na iVolatabu.

E rabailevu na idusidusi era tu kina, e tara na noda tiko bulabula kei na veika e baleti keda. E dina ni sega ni tara na iVolatabu na matailalai ni leqa eda dui sotava. Ia, e vakamacalataki ira na ivakavuvuli veiganiti era veidusimaki ena veika me baleta na kana, vakaukaua yago, ivakarau ni rai, veika e baleta na yalewa kei na tagane, ena vakayagataki ni alakaolo, ena tavako, ena wainimate gaga era wili me ka ga ni lasa, kei ena vuqa tale na veika e tara na noda bula.

E vuqa tale ga era nuiqawaqawataka na bula vakailavo. E rawa ni veivuke tale ga kina na iVolatabu. E sega wale ga ni veivakasalataki ena kena vakayagataki vakamatau na ilavo, e vukei keda tale ga meda boso vinaka ni cakacaka se meda tamata cakacaka vinaka. Na kena dina ga, ni iVolatabu e dua na idusidusi vinaka dina, e sega ni vukea wale ga na noda bula vakailavo kei na noda tiko bulabula, e tara sara tale ga na bula raraba. O via vakadinadinataka na yaga ni iVolatabu ena gauna oqo? Tomana sara mada na nomu wiliwili.