Me Kua ni Bera Nomu Papitaiso

1. Na cava eso na vuna vinaka mo papitaiso kina?

VAKACAVA o lomana na Kalou o Jiova, o koya e vakarautaka na isolisoli vinaka kece kei na nomu bula? O via vakaraitaka nomu lomani koya? Nomu yalataki iko qai papitaiso, e sala vinaka duadua o vakaraitaka kina nomu lomani koya. Ni o cakava qori, o sa na lewenivuvale i Jiova. Ena tuberi iko, ena karoni iko tale ga na Tamamu, e nomu itokani. (Same 73:24; Aisea 43:​1, 2) Na nomu yalayala kei na papitaiso o sa na rawa ni bula tawamudu.​—1 Pita 3:21.

2. Na cava eda na dikeva ena ulutaga qo?

² Vakacava o lomalomarua tiko mo papitaiso? Levu tale ga era va qori. E vica vata na milioni era papitaiso oti era cakava e levu na veisau ena nodra itovo kei na nodra rai me rawa ni vakadonui mera papitaiso. Ena gauna qo era marautaka tiko na nodra qaravi Jiova, era gumatua tale ga. Na cava o rawa ni vulica vei ira eso era papitaiso ena imatai ni senitiuri? Meda dikeva mada na ka era sotava kei na ka eda rawa ni vulica ena nodra ivakaraitaki.

ERA PAPITAISO NA KAI SAMARIA

3. Na veisau cava mera cakava na kai Samaria me rawa nira papitaiso?

³ E dua ga na nodra matalotu na kai Samaria ena gauna i Jisu, era tiko ena yasayasa o Sikemi makawa kei Samaria ena vualiku kei Jutia. Ni bera nira papitaiso na kai Samaria, e vinakati mera vakabauta na ka kece e tukuni ena Vosa ni Kalou. Na vuna? Nira vakabauta ga ni uqeti vakalou na imatai ni lima na ivola ena iVolatabu, ya na Vakatekivu me yaco ina Vakarua, kena irairai na ivola tale ga i Josua. Era namaka na kai Samaria me yaco mai na Mesaia, ni yavutaki ena yalayala ni Kalou ena Vakarua 18:​18, 19. (Joni 4:25) Me rawa gona nira papitaiso, e vinakati mera vakabauta ni o Jisu na Mesaia yalataki. Qori sara ga na ka era vakabauta e “levu na kai Samaria.” (Joni 4:39) Eso tale e vinakati mera veisautaka nodra dau vakaduiduitaki ira na Jiu.​—Luke 9:​52-54.

4. Me vaka e tukuni ena Cakacaka 8:​5, 6, 14, na cava era cakava na kai Samaria ni lai vunau yani o Filipi?

⁴ Na cava e uqeti ira na kai Samaria mera papitaiso? Ni lai vunautaki ‘Karisito vei ira’ o Filipi na dauvunau, eso na kai Samaria era “ciqoma . . . na Vosa ni Kalou.” (Wilika Cakacaka 8:​5, 6, 14.) E Jiu o Filipi, ia era sega ni cati koya. De dua era nanuma lesu na ka e tukuni ena tikinivolatabu ena Penitatuki, ni Kalou e sega ni vakaduiduitaka e dua. (Vkru. 10:​17-19) Ia era vakatudaliga matua vei Filipi, era raica tale ga na ivakadinadina matata ni tokoni koya tiko na Kalou. E levu nona cakamana, e vakabulai ira na tauvimate, e vakasavi ira tale ga na timoni.​—Caka. 8:7.

5. Na cava o vulica vei ira na kai Samaria?

⁵ A rawa nira veivakaduiduitaki na kai Samaria se ra nanuma ni lailai na ka era kila mera sega ni toso kina. Ia era sega ni cakava qori. Era sega tale ni vakaberabera na kai Samaria mera papitaiso nira vakadeitaka ni dina na ka e vakavulica o Filipi. E tukuni ena iVolatabu: “Nira vakabauti Filipi ni tukuna vei ira na itukutuku vinaka ni Matanitu ni Kalou kei na yaca i Jisu Karisito, era sa qai papitaiso na tagane kei na yalewa.” (Caka. 8:12) Vacava o vakabauta ni dina na Vosa ni Kalou, era sega tale ga ni veivakaduiduitaki na iVakadinadina i Jiova nira vakaraitaka na loloma dina, na ivakatakilakila ni lotu vaKarisito dina? (Joni 13:35) Kua gona ni rere mo papitaiso, mo nuidei ni na vakalougatataki iko o Jiova.

6. E uqeti iko vakacava na ivakaraitaki nei Ruben?

⁶ E susu o Ruben ena vuvale iVakadinadina i Jiova mai Jamani. Ni se gone e vakatitiqataka ni bula tiko o Jiova. Cava e qai cakava? E liaca o Ruben ni lailai na ka e kila, mani cakava kina e dua na ka. E kaya: “Niu vuli vakataki au, e vinakati meu vakadeitaka na ka dina mai na ka lasu. Au vulica vakavica na ulutaga me baleta na bula vakaidewadewa.” E wilika o Ruben na ivola Is There a Creator Who Cares About You? E uqeti koya sara ga na ivola qori. E kaya: ‘Ae, e bula tiko o Jiova.’ Ni gade ena itikotiko liu, e taleitaka vakalevu na nodra duavata na mataveitacini e veiyasa i vuravura. Ni lesu i Jamani e papitaiso sara ni sa yabaki 17. Cava o vulica? Ke o vakatitiqataka na ka o vulica, mo vakekeli ena noda ivola vakaivolatabu. Ena oti na vakatitiqa qori ni o ‘kila na ka dina.’ (Efeso 4:​13, 14) Ni o wilika na irogo ni noda duavata na tamata i Jiova e veiyasa i vuravura qai raica na kena ivakadinadina ena nomu ivavakoso, o na lomani ira vakalevu na mataveitacini.

PAPITAISO O SAULA MAI TARISU

7. Na rai cava me veisautaka o Saula?

⁷ Dikeva mada na ivakaraitaki i Saula mai Tarisu. E kila vinaka nodra lawa na Jiu, e turaga rogo tale ga. (Kala. 1:​13, 14; Fpai. 3:5) Ena gauna ya era nanuma na Jiu nira vukitani na lotu vaKarisito, e katakatataki ira o Saula qai tusaqati ira. E nanuma sara ga ni cakava tiko na loma ni Kalou. (Caka. 8:3; 9:​1, 2; 26:​9-11) Me vakabauti Jisu o Saula qai papitaiso me lotu vaKarisito, e vinakati me tu vakarau me tusaqati.

8. (a) Na cava e uqeti Saula me papitaiso? (b) Me vaka e tukuni ena Cakacaka 22:​12-16, e vukei Saula vakacava o Ananaiasa? (Raica tale ga na iyaloyalo.)

⁸ Na cava e uqeti Saula me papitaiso? Ni vosa vei Saula na Turaga o Jisu mai lomalagi, e cilavi koya vakasauri e dua na rarama mani mataboko kina. (Caka. 9:​3-9) E tolu na siga nona lolo, kena irairai ni vakasamataka vakatitobu na ka e yacovi koya. Io, e vakabauta sara ga o Saula ni o Jisu na Mesaia, era lotu dina tale ga na nona imuri. Sa na rarawa mada ga o Saula ni vakaitavi ena nona vakamatei o Sitiveni! (Caka. 22:20) Ni cava na ikatolu ni siga, e lako yani vei Saula e dua na tisaipeli na yacana o Ananaiasa, e vosa vakayalovinaka vua, e vakavuna me rai, e uqeti koya tale ga me papitaiso. (Wilika Cakacaka 22:​12-16.) E yalomalumalumu o Saula me rogoci Ananaiasa qai papitaiso.​—Caka. 9:​17, 18.

9. Na cava o vulica vei Saula?

⁹ E levu na ka eda vulica vei Saula. A rawa ni dokadoka se rerevaka na tamata me kua kina ni papitaiso, ia e sega ni cakava qori. Ni vakabauta na ka dina me baleti Karisito, e yalomalumalumu me veisautaka nona ivakarau ni bula. (Caka. 26:​14, 19) E tu vakarau mada ga me lotu vaKarisito ni kila ni na tusaqati kina. (Caka. 9:​15, 16; 20:​22, 23) Ni papitaiso oti o Saula, e vakararavi tiko ga vei Jiova me vukei koya ena levu tale na veika dredre. (2 Kor. 4:​7-10) Na nomu papitaiso mo iVakadinadina i Jiova, ena rawa ni vakatovolei kina nomu vakabauta se o tusaqati kina. Ia mo nuidei ni na tokoni iko tu ga o Jiova kei Karisito.​—Fpai. 4:13.

10. Na cava o vulica ena ivakaraitaki i Anna?

¹⁰ E susu o Anna ena dua na vuvale vosa vaKurd ena Tokalau kei Urope. Ni papitaiso oti o tinana, e kerei tamana o Anna me vulica na iVolatabu ni sa yabaki ciwa. Ia era sega sara ga ni taleitaka eso na lewe ni nona vuvale. Era kaya ni ka vakamadua me dua e biuta na lotu nei tukadra. Ni sa yabaki 12 o Anna, e kerei tamana me vakadonuya me papitaiso. E vinakata o tamana me kila ke nona vakatulewa dina qori se dua e vakasaurarataki koya kina. E kaya o Anna: “Au lomani Jiova,” mani vakadonuya o tamana me papitaiso. Oti qori, e sega ni cegu nona tusaqati o Anna kei na nona vakalialiai. E tukuna e dua vei ira na wekana: “E vinaka cake me dukadukali nomu ivakarau ni bula, mo vakatavako tale ga, mo kua ga ni iVakadinadina i Jiova.” E vosota vakacava o Anna? E kaya: “E vukei au o Jiova meu yaloqaqa, rau tokoni au tale ga o Na kei Ta.” E vola o Anna na gauna kece e tokoni koya kina o Jiova, e dau railesuva ena so na gauna me kua ni guilecava na sala e vukei koya kina o Jiova. Ke o leqataka na veitusaqati, nanuma tiko ni na vukei iko tale ga o Jiova.​—Iper. 13:6.

E PAPITAISO O KONILIO

11. Na cava e rawa ni tarova nona papitaiso o Konilio?

¹¹ E tu tale ga ena iVolatabu nona ivakaraitaki o Konilio. E “turaganivalu” o koya, e liutaka e 100 na sotia ni mataivalu ni Roma. (Caka. 10:​1, vmr.) Kena irairai ni kilai levu ena nona itikotiko kei na mataivalu. E dau “soli iloloma vakalevu vei ira na lewenivanua.” (Caka. 10:2) O Jiova e tala na yapositolo o Pita me tukuna vua na itukutuku vinaka. Vakacava e tarova na itutu nei Konilio nona papitaiso?

12. Na cava e uqeti Konilio me papitaiso?

¹² Na cava e uqeti Konilio me papitaiso? Eda wilika ena iVolatabu ni o Konilio ‘kei ira kece na lewe ni nona vuvale era dau rerevaka na Kalou.’ E dau masu tale ga vua na Kalou. (Caka. 10:2) Ni lai tukuna na itukutuku vinaka o Pita vei Konilio, e mani vakabauti Karisito kei ratou na nona vuvale, eratou papitaiso tale ga. (Caka. 10:​47, 48) E macala ni tu vakarau o Konilio me cakava na veiveisau me rawa ni qaravi Jiova kei na nona vuvale.​—Josua 24:15; Caka. 10:​24, 33.

13. Na cava o vulica vei Konilio?

¹³ Me vakataki Saula ga, e rawa ni ulubaletaka o Konilio nona itutu me kua kina ni lotu vaKarisito. Ia e sega ni cakava qori. Ni o mai kila na dina, vakacava e vinakati mo cakava e levu na veisau? Ke dina qori, ena vukei iko o Jiova. Ena vakalougatataka nomu qaravi koya ni o muria na ivakavuvuli vakaivolatabu.

14. Na cava o vulica ena ivakaraitaki i Tsuyoshi?

¹⁴ E vinakati vei Tsuyoshi mai Japani, me veisautaka eso na ka e vauca nona cakacaka me rawa ni vakadonui me papitaiso. E ivukevuke ni qasenivuli liu ena koronivuli ni tuva senikau o Ikenobo. Ni sega ni dau tiko rawa o qasenivuli liu ena somate, e dau matataki koya Tsuyoshi ena ivakarau ni sokalou vakaBuda. Ia ni vulica o Tsuyoshi na ka dina me baleta na mate, e kila ni na vakalatilati na ivakarau qori ena nona papitaiso. E mani vakatulewataka me kua ni vakaitavi ena ivakarau ni sokalou vakaBuda. (2 Kor. 6:​15, 16) E vakaraitaka sara qori vei qasenivuli liu. Cava e yaco? E vakadonuya o qasenivuli liu me cakacaka tiko ga e kea o Tsuyoshi, ia me kua ga ni vakaitavi ena ivakarau ni sokalou vakaBuda. Oti e dua na yabaki nona vulica na iVolatabu, e papitaiso sara.a Ke vinakati mo cakava na veisau ena nomu cakacaka mo rawa ni vakamarautaki Jiova, mo nuidei ni na vakarautaka na ka dou gadreva vakavuvale.​—Same 127:2; Maciu 6:33.

ERA PAPITAISO MAI KORINICA

15. Na cava e rawa ni tarova nodra papitaiso e Korinica?

¹⁵ E kilai o Korinica makawa ena domodomoiyau kei na ivakarau dukadukali. E sega sara ga ni vakadonuya na Kalou nodra ivakarau ni bula e levu e kea. E macala ni na ka ni sasaga vua e dua me mai qaravi Jiova. Ia ni lako yani ena koro qori na yapositolo o Paula qai vunautaka na itukutuku vinaka me baleti Karisito, “era vakabauta tale ga e levu na kai Korinica era rogoca na itukutuku vinaka ra qai papitaiso.” (Caka. 18:​7-11) Oti qai rairai vei Paula na Turaga o Jisu Karisito ena raivotu qai kaya: “Levu na noqu tamata [era tiko] ena koro qo.” E mani vunau tiko ga e kea o Paula me dua veimama na yabaki.

16. Na cava e uqeta eso mai Korinica mera papitaiso? (2 Korinica 10:​4, 5)

¹⁶ Na cava e uqeti ira mai Korinica mera papitaiso? (Wilika 2 Korinica 10:​4, 5.) E uqeti ira na Vosa ni Kalou kei na kaukaua ni yalo tabu mera cakava na veisau lelevu ena nodra bula. (Iper. 4:12) O ira na vakabauta na itukutuku vinaka me baleti Karisito mai Korinica era biuta eso na itovo kei na ivalavala, me vaka na mateni, butako, kei na veiyacovi vakayalewa se vakatagane.​—1 Kor. 6:​9-11.b

17. Na cava o vulica vei ira mai Korinica?

¹⁷ Dikeva ni sa vakawakana tu vei ira eso mai Korinica e levu na itovo, ia era sega ni nanuma ni dredre mera veisau mera lotu vaKarisito. Era sasaga vagumatua mera muria na sala qiqo e basika ina bula tawamudu. (Maciu 7:​13, 14) Vakacava e ka ni sasaga mo biuta e dua na itovo ca mo rawa ni papitaiso? Sasaga tiko ga! Kerea vei Jiova nona yalo tabu me vukei iko mo valuta na gagadre ca.

18. Na cava o vulica ena ivakaraitaki i Monika?

¹⁸ E dua na tacida mai Georgia o Monika, e sasaga tiko ga me biuta na vosa dukadukali kei na ka ni veivakamarautaki e ca me rawa ni toso me papitaiso. E kaya: “Niu se itabagone e dau vakaukauataki au na masu. E kila vinaka o Jiova niu via cakava na ka e dodonu, e dau vukei au tu ga qai dusimaki au.” E papitaiso o Monika ni sa yabaki 16. Vacava o sasaga tiko mo biuta eso na itovo me rawa ni vakadonuya o Jiova nomu veiqaravi? Kerei koya tiko ga me vukei iko mo cakava na veiveisau. E lomasavu o Jiova ni vakarautaka na yalona tabu.​—Joni 3:34.

RAWA NI TOSOYA NA ULUNIVANUA NOMU VAKABAUTA

19. Na cava e vinakati mo rawa ni tosoya na ituvaki e vaka na ulunivanua? (Raica tale ga na iyaloyalo.)

¹⁹ Mo vakabauta ni lomani iko o Jiova, e vinakata tale ga mo lewe ni nona vuvale. Qori na ka dina, se mani vakacava na ka e vakalatilati ena nomu papitaiso. E tukuna o Jisu vua eso nona tisaipeli ena imatai ni senitiuri: “Ke vaka mada ga na levu ni sore ni musita na nomudou vakabauta, dou rawa ni kaya ina ulunivanua qo, ‘Toki i kea,’ ena toki dina. Sega ni dua na ka ena dredre vei kemudou.” (Maciu 17:20) Se qai vica ga na yabaki nodra tomani Jisu o ira na rogoca na ka e tukuna qori, kena ibalebale e vinakati me vakalevutaki nodra vakabauta. Ia e vakadeitaka vei ira o Jisu ke ra vakalevutaka nodra vakabauta, ena vukei ira o Jiova mera tosoya na ituvaki e vaka na ulunivanua. Ena vukei iko tale ga o Jiova mo cakava qori!

20. E uqeti iko vakacava nodra ivakaraitaki na lotu vaKarisito ena imatai ni senitiuri kei ira ena gauna qo?

²⁰ Ke o kila ni tarova tiko nomu papitaiso eso na ivakarau ni nomu bula, sasaga sara mo biuta vakatotolo. Me vakacegui iko qai vakaukauataki iko nodra ivakaraitaki na lotu vaKarisito ena imatai ni senitiuri kei ira ena gauna qo. Me uqeti iko mada ga na nodra ivakaraitaki mo yalataki iko vei Jiova qai papitaiso. Qori na vakatulewa vinaka duadua o rawa ni cakava!