Rawa ni Nomu na Veika Totoka ena Kauta Mai na Matanitu ni Kalou

E TALADRODRO nona vosataka na yapositolo lotu Vakarisito o Paula e so na vosa kilai levu ena nona gauna. E rawata na ivakatautauvata ni vuli ena univesiti edaidai. E soli tale ga vua na galala kei na dodonu ni dua na kai Roma. (Cakacaka 21:​37-​40; 22:​3, 28) Na veika oqo e rawa ni vutuniyau se rogo kina. Ia, e kaya: “Na veika kece au a taleitaka e liu au sa okata me ra ka tawa yaga e na vuku i Karisito . . . au sa okati ira kece ga me ra de ni manumanu, me noqu kina na Karisito.” (Filipai 3:​7, 8, VV) Na cava e kaya kina vaka oqo o Paula?

E qai yaco me vakabauta o Paula ni raivotutaka nona vakaturi kei na nona sa tiko mai lomalagi o Jisu. O Paula ga oqo a dau vakatokai me o Saula mai Tarisu, a dau vakacacani ira tale ga era “muria tiko na Sala.” (Cakacaka 9:​1-​19, VV) Na ka a sotava o Paula ena gaunisala i Tamasiko e vakabauta sara ga kina ni o Jisu na Mesaia yalataki, se Karisito, ena qai liutaka na Matanitu ni Kalou. E veisautaka tale ga vakalevu na bula i Paula, me vaka eda raica ena vosa bibi a tauca e volai toka e cake. Io, a veivutuni o Paula ena vuku ni nona lomadina.​—⁠Kalatia 1:​13-​16.

Ena iVolatabu, na vu (verb) “veivutuni” e dau vakadewataki vakalevu mai na vosa vakirisi e kena ibalebale “kilai e muri,” me veibasai ni “kilai taumada.” O koya gona, na veivutuni e okati kina na veisau ni nona vakasama e dua, nona itovo ni rai, se nona inaki, me cata nona ivalavala makawa e sega ni vinaka. (Cakacaka 3:​19; Vakatakila 2:⁠5) E taura vakabibi o Paula na ka vakairogorogo a sotava ena gaunisala i Tamasiko. E vakayadrati koya sara ga ni nona bula makawa e lecavi kina o Karisito, e sega na betena. Me yaga vua na nona sa qai mai kilai Karisito, e kila o koya ni dodonu me cakava e dua na ka me vakadodonutaka kina nona bula.​—⁠Roma 2:4; Efeso 4:​24.

Na Veisau e Kauta Mai na Veivakalougatataki

Na ka e kila o Paula me baleti koya na Kalou e tautauri mai na nona a lewena taumada tu e dua na taba ni lotu e nodra na Farisi. Nodra vakabauta e levu kina na vuku kei na ivakavuvuli vakatamata. Ena vuku ni veivakaduiduitaki ena lotu, e vakamuai cala kina na gugumatua kei na sasaga i Paula. E dina ni nanuma ni qarava tiko na Kalou, ia e sega ni kila ni sa vorati koya sara tiko ga.​—⁠Filipai 3:​5, 6.

E raica o Paula ni dodonu me vakatulewataka vinaka nona bula ni sa mai kila na ka dina me baleti Karisito kei na nona itavi ena inaki ni Kalou: Me Farisi tiko ga, me kilai qai vakaitutu rogo, se me veisautaka nona bula qai cakava na ka e veiganiti me vakadonui koya kina na Kalou? E marautaki ni donu nona vakatulewa o Paula, ni kaya: “Ni’u sa sega ni maduataka nai tukutuku-vinaka kei Karisito: ni sai koya oqo na kaukauwa ni Kalou me vakabulai kina ko ira yadua era sa vakabauta: sa liu vei ira na Jiu, vei ira talega sa matanitu tani.” (Roma 1:​16) E qai yaco o Paula me dua na dauvunau gugumatua ni itukutuku vinaka ni Matanitu ni Kalou kei Karisito.

Ni oti e vica vata na yabaki, e kaya o Paula vei ira nona itokani lotu Vakarisito: “Au sa sega ni vakasami au ni’u sa taura oti; ia sa dua bauga na ka ka’u sa kitaka, au sa guilecava na ka sa sivi, ka’u sa kakavaki me’u tadolova na ka kiliu, ka’u sa ciciva na cere, me’u tauca na cere sa kacivi au kina maicake na Kalou e na vuku i Karisito Jisu.” (Filipai 3:​13, 14) E vakayacoka vei Paula na itukutuku vinaka, ni tu vakarau me biuta na veika e vakamuai koya tani mai vua na Kalou qai kakavaka mai vu ni lomana na isausau e salavata kei na inaki ni Kalou.

Na Cava O na Cakava?

De dua o se qai rogoca ga na itukutuku vinaka ni Matanitu ni Kalou. O taleitaka na inuinui ni bula tawamudu ena parataisi e uasivi vakaoti kina na veika kece? Sa macala ga ni dodonu me vaka kina, nida sucukaya kece na gagadre ni via bula, meda marautaka na bula vakacegu kei na tiko vinaka. E kaya na iVolatabu ni sa kotora na Kalou “na gauna ena sega ni mudu” e lomada. (Dauvunau 3:​11) O koya gona, sa kena ivakarau ga meda nuitaka na gauna sa na bula tawamudu kina na tamata ena vakacegu kei na marau. Oya sara ga na ka e dulaka tu na itukutuku vinaka ni Matanitu ni Kalou.

Me rawa ni dei vei iko na inuinui oqo, e dodonu mo vakadikeva mo kila kina se cava sara mada e vakamacalataka na itukutuku vinaka. E vakasalataka na yapositolo o Paula: “Vakadinadinataka e [lomamu] na yaga, na vinaka, kei na uasivi ni loma ni Kalou.” (Roma 12:​2, NW) Me vakataki Paula ga, ni o sa rawata na kila kei na yalomatua, e dodonu mo vakatulewa.

Ena dua tale na yasana, sa na rairai tiko e so na ka o vakabauta me baleta nomu gauna mai muri. Nanuma ni tiko tale ga na ka e nanuma o Saula me loma ni Kalou, ni bera ni qai yaco me yapositolo o Paula. Kua ni namaka me vakaraitaka vakacakamana mai e dua na ivakatakilakila na Kalou. Ia vakacava mo tarogi iko mada: ‘Au kila beka na loma ni Kalou me baleta na kawatamata kei na vuravura? Na ivakadinadina cava au rawa ni vakadeitaka kina noqu vakabauta? Ena dei tiko beka ga noqu ivakadinadina ni vakasotari vata kei na rarama ni Vosa ni Kalou, na iVolatabu?’ De vinaka mo vakadikeva vaka oqo nomu vakabauta. Ena vinaka mo dikevi iko vaka kina, ni uqeti keda na iVolatabu: “Vakatovolea na ka kecega; taura matua na ka e vinaka.” (1 Cesalonaika 5:​21) Me cava tale, e bibi na veivakadonui ni Kalou, se vakaevei?​—⁠Joni 17:3; 1 Timoci 2:​3, 4.

Era na rairai yalataka vei keda na iliuliu ni lotu na bula tawamudu. Ia ke sega ni yavutaki na yalayala oya ena iVolatabu, eda na sega ni rawata na veivakalougatataki ni Matanitu ni Kalou. Ena nona iVunau rogo ena Ulunivanua e veivakasalataki kina ena doudou o Jisu: “Ena sega ni curu ki na matanitu vakalomalagi ko ira kecega sa kaya vei au, Turaga, Turaga; ko koya ga sa cakava na loma i Tamaqu sa tiko mai lomalagi.”​—⁠Maciu 7:​21.

Dikeva ni vakabibitaka o Jisu me liumata na caka ni loma i Tamana me rawati kina na veivakalougatataki ni Matanitu ni Kalou. Kena ibalebale, na ka e rairai via vakalou ena sega sara ni vakadonuya na Kalou. E kaya gona kina o Jisu: “Era na lewe vuqa ena kaya vei au e na siga ko ya, Kemuni na Turaga, na Turaga, keimami a sega li ni vakavuvuli e na yacamuni? ka vakasevi ira na tevoro e na yacamuni? ka kitaka na cakacaka-mana e vuqa e na yacamuni? Ia ka’u na qai tukuna vei ira, Au sa sega sara ni kilai kemudou; dou lako tani vei au, koi kemudou sa daukitaka nai valavala ca.” (Maciu 7:​22, 23) E bibi me matata vei keda na itukutuku vinaka ni Matanitu ni Kalou da qai cakava na ka e salavata kaya.​—⁠Maciu 7:​24, 25.

E Tiko na Veivuke

Sa sivia oqo e 100 na yabaki nodra vunautaka tiko na iVakadinadina i Jiova na itukutuku vinaka ni Matanitu ni Kalou. Era kacivaka ra qai veisoliyaka na ivola mera vukei kina na tamata ena vuravura taucoko mera kila se cava sara mada na Matanitu ni Kalou, na veika totoka ena kauta mai, kei na ka me cakava e dua me rawata kina na veika totoka oqori.

Oni vakauqeti mo ni rogoca na itukutuku era vunautaka tiko na iVakadinadina i Jiova. Ni o ciqoma, o qai cakava na veika e salavata kei na itukutuku vinaka, o na vakalougatataki dina edaidai, vaka kina ena gauna se bera mai ni sa na liutaka na vuravura taucoko na Matanitu ni Kalou.​—⁠1 Timoci 4:⁠8.

Mo se tei yavala, ni sa voleka sara na veika totoka ena kauta mai na Matanitu ni Kalou!

[iYaloyalo ena tabana e 7]

Era kacivaka ra qai veisoliyaka na ivola na iVakadinadina i Jiova, me vunautaki kina na itukutuku vinaka ni Matanitu ni Kalou