Na Cava na iTukutuku Vinaka ni Matanitu ni Kalou?
Ena yabaki sa oti ena 235 na vanua e veiyasa i vuravura, era le 6,035,564 na gone kei na qase era vakayagataka e 1,171,270,425 na aua mera tukuna kina vei ira na tani e dua na itukutuku. Me kena ikuri, era solia tale ga e sivia e 700 na milioni na ivola me vakatetei kina, me vakamatatataki tale ga kina na itukutuku oqo. Era veisoliyaka tale ga e vica vata na udolu na kaseti ni retio kei na kaseti ni vidio me kaburaki raraba kina. Na “itukutuku” ni cava oqo?
OQO na “itukutuku” vinaka ni Matanitu ni Kalou. Ena itukutuku ni kawatamata, e se bera vakadua ni bau vunautaki “na i Tukutuku Vinaka ni matanitu” me vaka sa caka tiko edaidai.—Maciu 24:14, VV.
O ira era cakava tiko e vuravura raraba na cakacaka oqo ni vunau kei na veivakavulici era bolecakacaka kece. Mai na rai ni vuravura, ena sega ni ganiti ira beka na cakacaka oqo. Ia na cava ga e vakavuna nodra yaloqaqa kei na nodra rawaka? E dua na vuna levu ni vakayacoka na itukutuku vinaka ni Matanitu ni Kalou, e vakamacalataki kina na veivakalougatataki ena sotava na kawatamata. Oqo na veivakalougatataki era diva tu na kawatamata kece—na marau, galala mai na bula dredre vakailavo, na matanitu vinaka, na vakacegu kei na tiko vinaka, kei na ka era vakabauta e levu ni na sega ni yaco dina—na bula tawamudu! Na ka oqo e itukutuku vinaka dina vei ira era vakasaqara na inaki ni bula. Io, e rawa ni nomu na veivakalougatataki kece oqo kevaka o rogoca qai ciqoma na itukutuku vinaka ni Matanitu ni Kalou.
Na Cava na Matanitu ni Kalou?
Ni kacivaki na Matanitu ni Kalou, na cava e vakatokai kina me itukutuku vinaka? Oqo na Matanitu era vakavulici kina e vica vata na milioni mera masuta, nira cavuta: “Tama i keimami mai lomalagi, me vakarokorokotaki na yacamuni, me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.”—Maciu 6:9, 10, VV.
Oqo tale ga na Matanitu e dau wewenigusuna na parofita Iperiu o Taniela ena 25 na senitiuri sa oti ni vola: “Ena qai vakatura na Kalou ni lomalagi e dua na matanitu, ena sega sara ni vakarusai rawa: ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu oqori, ka na tu ga ka sega ni mudu.”—Taniela 2:44.
O koya gona, na itukutuku vinaka e baleta na nona Matanitu na Kalou ena vaqeavutaka na veika ca kece me qai liutaka na vuravura taucoko ena vakacegu. Ena vakalesuya dina mai na inaki taumada ni Dauveibuli vua na kawatamata kei na vuravura.—Vakatekivu 1:28.
“Sa Voleka na Matanitu Vakalomalagi”
Voleka ni 2,000 na yabaki sa oti, e kacivaka voli kina e matanalevu na itukutuku vinaka ni Matanitu ni Kalou e dua na turaga yalodina, qai dreta nodra vakasama e levu na kena irairai kei na nona ivalavala. Oqo o Joni na Dauveipapitaiso, na luve i Sakaraia na bete, e Jiu, kei Ilisapeci na watina. E vakaisulu o Joni ena isulu vuti ni kameli qai vau na tolona ena wa kuli ni manumanu, me vakataki Ilaija, na parofita e vakatayaloyalotaki koya vinaka. Ia na nona itukutuku e dreta nodra vakarorogo e lewe levu. “Dou veivutuni,” e kacivaka, “ni sa voleka na matanitu vakalomalagi.”—Maciu 3:1-6.
Era dau vakarorogo vei Joni na Jiu era kaya voli nira sokaloutaka na Kalou dina o Jiova. Me vaka e dua na matanitu, e ciqoma kina o Mosese ena vukudra na veiyalayalati ni Lawa ena rauta ni 1,500 na yabaki yani i muri. Se duri tu ga e Jerusalemi na valenisoro vakaitamera e dau cabori kina na isoro e salavata kei na ka e tukuni ena Lawa. Era nuidei sara tu ga na Jiu ni sa vakabau tu na nodra sokalou ena mata ni Kalou.
Ia, nira vakarorogo tiko vei Joni, sa ra qai liaca e so ni nodra lotu e sega ni vaka na kena era nanuma. Sa curuma na ivakavuvuli ni lotu Vakajiu na itovo kei na vuku vakirisi. Na lawa e solia na Kalou vei Mosese sa mai veiwaki se vakatawayagataki ena vakabauta kei na ivakavuvuli vakatamata. (Maciu 15:6) Nira veituberi vakatani nodra iliuliu ni lotu lomaqa qai tawaloloma, e levu sa ra sega ni sokaloutaka kina vakadodonu na Kalou. (Jemesa 1:27) E gadrevi mera veivutunitaka nodra ivalavala ca vua na Kalou vaka kina ena veiyalayalati ni Lawa.
Ena gauna oya, era namaka tiko e levu na Jiu nona basika mai na Mesaia yalataki, se o Karisito, ra vaqaqa kina e so me baleti Joni: “Se sa i koya na Karisito se sega.” E sega ni kaya o Joni ni o koya na Mesaia, ia e dusimaki ira tale vua e dua, ni kaya: “[Sa] sega mada ni rauti au me’u sereka na wa ni nona i vava.” (Luke 3:15, 16, VV) Ni vakamacalataki Jisu tiko vei ira nona tisaipeli, e kaya o Joni: “Raica na Lami ni Kalou, ko koya sa kauta tani na nodrai valavala ca na kai vuravura!”—Joni 1:29.
Sa dua dina na itukutuku vinaka, ni kacivaka voli o Joni vei ira kece na sala me rawati kina na bula kei na marau—oya o Jisu, o koya “sa kauta tani na nodrai valavala ca na kai vuravura.” Nida kawa i Atama kei Ivi, eda sucukaya mai na ivalavala ca kei na mate. E vakamacalataka na Roma 5:19: “Me vaka sa vakacalai na lewe vuqa e na nona talaidredre e dua bau na tamata [o Atama], sa vakadonui vaka talega kina na lewe vuqa e na vuku ni nona talairawarawa na le dua [o Jisu].” O Jisu, e vaka na lami e vakacabori, e ‘kauta tani na noda ivalavala ca’ qai vakalesuya mai na ituvaki e veibasai kei na bula rarawa e sotava tu na kawatamata. E tukuna na iVolatabu: “Sa kenai sau ni valavala ca na mate: ia sai solisoli walega ni Kalou na bula tawa mudu, e na vuku i Jisu Karisito na noda Turaga.”—Roma 6:23.
E dina ni uasivi o Jisu qai tamata rogo duadua e bau bula—e soli koya me vunautaka na itukutuku vinaka. E tukuna vei keda na iVolatabu ena Marika 1:14, 15: “Ia ni sa biu ki na vale ni veivesu ko Joni, sa lako mai ki Kalili ko Jisu, a sa dauvunautaka nai tukutuku vinaka ni matanitu ni Kalou, ka kaya, Sa qai yaco na gauna, a sa voleka na matanitu ni Kalou; dou veivutuni, ka vakabauta nai tukutuku-vinaka.”
Era vakalougatataki vakalevu o ira na ciqoma na itukutuku i Jisu ra qai cakacakataka nodra vakabauta na itukutuku vinaka. E kaya na Joni 1:12: “Ko ira kecega sa vakabauti koya [o Jisu], sa solia vei ira ko koya me ra yaco rawa me ra luve ni Kalou, vei ira sa vakabauta na yacana.” Nira luve ni Kalou, era na rawata na icovi ni bula tawamudu.—1 Joni 2:25.
Ia e sega ni yalani ga vei ira ena imatai ni senitiuri na veivakalougatataki ni Matanitu ni Kalou. Me vaka sa cavuti taumada, sa kuruvaki qai vakatavuvulitaki tiko na Matanitu ni Kalou e vuravura taucoko. Se dulaki tu na veivakalougatataki ni Matanitu ni Kalou. Na cava mo cakava me nomu kina na veivakalougatataki oqo? Na ulutaga e tarava ena vakamacalataka.