O Se Nanuma Tiko?

O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:

• Ena Roma 5:​3-5 (VV), na cava e toka sara kina e muri na inuinui ena veitaravi ni ka e cavuta na yapositolo o Paula?

E vola o Paula e so na ka era dau sotava na lotu Vakarisito​—⁠na rarawa, vosota, veivakadeitaki, kei na inuinui. Na “inuinui” oqo e sega ni kena e tuburi koya e dua ni vulica taumada na iVolatabu, ia ena rawa vua e dua na lotu Vakarisito me rawata na inuinui oqo e titobu, veivakauqeti, qai vaqaqacotaka na ka eda vakanuinuitaka taumada.​—⁠12/15, taqana e 22-3.

• Na cava beka me kauai kina na lotu Vakarisito nikua ena qito a dau caka mai Kirisi makawa?

Noda kila na veika e vauci ena qito oya ena matata cake kina vei keda na kedra ibalebale e levu na tikinivolatabu. E so vei ira e dusia na kena ‘muri na lawa ni qito,’ ‘biu laivi ni ka bibi kece qai vakaraici na ivakaraitaki i Jisu,’ ‘cicivi ni cere’ kei na rawati ni isala se icovi. (2 Timoci 2:​5, VV; 4:​7, 8; Iperiu 12:​1, 2; 1 Korinica 9:​24, 25; 1 Pita 5:⁠4)​—⁠1/1, taqana e 28-​30.

• Na iwalewale vou cava a taurivaki ena Janueri 1914 me kacivaki kina na itukutuku vinaka?

A tekivutaki ena gauna oya na iyaloyalo yavala kei na kena e veicavuyaki, e yacana na “Photo-Drama of Creation.” E wasei vakava na vakaraitaki ni iyaloyalo oqo, na kena e yavala kei na vica vata na drau na kena e veicavuyaki, e tabaki ena iloilo rokataki, qai caka vakalevu na iyaloyalo oqo me rau lakolako vata se salavata kei na misini e katoni tu kina na kedra ivakamacala. E vakarautaki e 20 taucoko na lavelave ni Drama oqo qai vakayagataki ena levu na vanua mera vakavulici kina na lewedra ena itukutuku ni iVolatabu.​—1/15, taqana e 8-9.

• E duidui vakacava na iLawalawa Dauvakatulewa mai na isoqosoqo vakalawa?

O ira na dairekita ni isoqosoqo vakalawa era digitaki vei ira na lewena, ia e sega ni dua na tamata e lesi ira na lewe ni iLawalawa Dauvakatulewa, o Jisu Karisito ga. E sega ni tukuni sara mera lewe tale ga ni iLawalawa Dauvakatulewa o ira na dairekita ni veisoqosoqo vakalawa era vakayagataka tiko na iVakadinadina i Jiova. Ena bose vakayabaki se qai oti ga oqo ni Watch Tower Bible and Tract Society of Pennsylvania, era kerea e so na lewe ni iLawalawa Dauvakatulewa era lewe tu ni isoqosoqo vakalawa oya mera vakacegui mai na nodra itavi vakadairekita. Era sa qai digitaki e so tale na tagane matua mai na ‘so tani tale na sipi.’ (Joni 10:16) E solia kina e levu na gauna vei ira na lewe ni iLawalawa Dauvakatulewa mera vakarautaka na kakana vakayalo se na nodra qaravi vakayalo na mataveitacini e vuravura raraba.​—⁠1/15, taqana e 29, 31.

• O cei erau cavuti ena iVolatabu eda vuli kina ena kena valuti na yalolailai?

E dua o Ana, na tina i Samuela. Ni a kasamitaki koya cala o Ilai, na bete levu kei Isireli, ke a rawa ni yalolailai e kea o koya. Ia e qai vakadodonutaka na tikina oya vei Ilai ena dela ni yalomalumalumu. A sega tale ga ni yalocataki Ilai tiko ga o Ana. Na kena ikarua o Marika, de a yalolailai ni a sega ni via sureti koya na yapositolo o Paula ena ikarua ni ilakolako ni kaulotu. A sega ni via yalolailai ni sa yali vua e dua na ilesilesi bibi, ia e tomana na nona cakacaka, qai salavata kei Panapasa.​—⁠2/1, taqana e 20-2.

• Na cava mera qarauna kina na lotu Vakarisito na nodra dau veisolitaka na ilavelave ni porokaramu ni kompiuta?

Levu na laiseni ni porokaramu ni kompiuta (wili kina na porokaramu ni qito) e lewai ira na kedra itaukei mera vakacuruma na porokaramu oya ena dua ga na kompiuta. Eda na beca tiko na lawa e vauca na kena veisoliyaki (copyright law) ke da lavetaka e so tale na ilavelave meda solia vei ira tale e so, kevaka mada ga eda solia wale na ilavelave oqori. Mera talairawarawa na lotu Vakarisito ina lawa e kaya, “solia vei Sisa na ka sa nei Sisa.” (Marika 12:17)​—⁠2/15, taqana e 28-9.

• O cei o Cyril kei Methodius, erau cuqena vakacava na vulici ni iVolatabu?

Erau veitacini na tagane oqo, erau sucu ena ikaciwa ni senitiuri mai Cesalonaika, Kirisi. Rau bulia na matuavosa me volai kina na vosa vaka Slav rau qai vakadewataka e dua na iwase levu ni iVolatabu ina vosa na Slavonic.​—⁠3/1, taqana e 28-9.

• Na cava e vakaibalebaletaki ni tukuni me ‘gadrevi na itovo vakayalo’?​—⁠Roma 8:⁠6.

E kena ibalebale ni lewai keda, dusimaki keda, qai tosoi keda tiko na igu yavala i Jiova. Me cakacaka vei keda na yalo ni Kalou, e yaga meda wilika da qai vulica na iVolatabu, meda talairawarawa ina lawa ni Kalou mai vu ni lomada, da qai masuta na veivuke ni yalo ni Kalou.​—⁠3/15, taqana e 15.

• Na cava meda vakayacora ke dau cala na ka e nanumi me baleti keda?

Ena yalo ni veilomani, e bibi meda lai vakadodonutaka na nanuma cala oya. De dua eda na sega ni gumatua ena noda sasaga oqo, ia meda kua ni yalolailai. Kerea vei Jiova na yalomatua, kerea nona veivuke ni sa dau ‘vakadikeva o koya na yalo ni tamata.’ (Vosa Vakaibalebale 21:2; 1 Samuela 16:⁠7)​—⁠4/1, taqana e 21-3.