Tudei ena Yalomatua kei na Lomadei

Ra Vukei na Gone ena iVakasala ena Kena Gauna Dodonu

O EPAFIRA e dua na lotu Vakarisito a butuki Roma ena imatai ni senitiuri. Ia a vakanananu tiko ga vakalevu i Kolosa, e dua na koro e Esia Lailai. A vunautaka kina na itukutuku vinaka, e sega tale ga ni vakabekataki ni a vukea e so mai Kolosa mera tisaipeli i Jisu Karisito. (Kolosa 1:7) E kaya gona na yapositolo o Paula ena nona volavola mai Roma: ‘Sa loloma tu yani vei kemuni o Epafira, e dau masulaki kemuni vagumatua qai kerea tiko ga kina mo ni tudei e na yalomatua kei na lomadei e na nomuni muria taucoko na loma ni Kalou,’ oqo e vakaraitaka na nona levu ni kauaitaki ira o Epafira na nona itokani vakabauta era tiko mai Kolosa.​—Kolosa 4:​12, VV.

O ira tale ga na itubutubu lotu Vakarisito edaidai era dau gumatua ni masulaka na nodra bula vakayalo na luvedra. Era na saga na itubutubu mera teivaka e lomadra na luvedra mera lomana na Kalou me rawa nira tudei ena vakabauta.

Vuqa na itabagone lotu Vakarisito era kerea mera vukei me rawa nira walia na leqa e dau basika e koronivuli kei na veivanua tale e so. E kaya e dua na goneyalewa yabaki 15: “Sa qai ca ga vakalevu na leqa keimami sotava. Sa vakarerevaki na bula. Keimami gadreva na veivuke!” Sa rogoci beka nodra kerekere na itabagone oqori kei na nodra masu na itubutubu era dau qarava na Kalou? Io! Sa vakarautaka na “dauveiqaravi yalo dina ka vuku” na ivakasala yavutaki ena iVolatabu mera vukei kina. (Maciu 24:​45, VV) Oqo e so na ivola e vukei ira e vica vata na drau na udolu na itabagone mera “tudei e na yalomatua kei na lomadei.” Meda vakadikeva mada e so na ivola oqo.

“Ni Raica . . . 15,000 na iVakadinadina Vou!”

Ena Okosita 1941, era a soqo vata yani e St. Louis, Missouri, e Mereke, e 115,000 na iVakadinadina i Jiova, oqo e se qai bau soqo levu duadua me vakayacori. Ena iotioti ni siga​—“Nodra Siga na Gone”​—era dabe volekata toka na buturara e rauta ni 15,000 na gone, ra qai vakatudaliga vinaka vei Joseph F.  Rutherford ena nona vosa ena ulutaga “Luvedra na Tui.” Ni sa voleka ni cava nona ivakamacala, sa qai vosa me vaka e dua na tama o Rutherford e sa yabaki 71:

“O kemuni kece na . . . gone oni sa vakadonuya . . . mo ni talairawarawa vua na Kalou kei na nona Tui, au kerea mo ni tucake.” Ra tucake na gone ena duavata ga na gauna. E vosa i cake o Brother Rutherford, qai kaya: “Ni raica, sivia e 15,000 na ivakadinadina vou ni matanitu ni Kalou!” E vakuru na domo ni vakasausau. E kuria: “O kemuni kece oni vinakata mo ni tukuna yani na itukutuku ni Matanitu ni Kalou . . . , au kerea mo ni tukuna Io.” Dua na ka na domodra na gone nira sa kaya “Io!” Sa qai vakaraitaka na ivola vou na Children, lako vata kei na balavu ni vakasausau.

Ni cava na vunau veivakauqeti oya, ra qai yatuni yani na gone mera gole ina buturara, mera lai taura mai vei Brother Rutherford e dua na nodra ivola e soli vakailoloma. Era luluvu na vakarorogo ena ka era raica. E kaya e dua a raica sara ga na ka e yaco: “O ira ga e vaka na vatu na lomadra era na sega ni uqeti ena nodra raici ira na itabagone mera [vakaraitaka] na nodra nuitaki Jiova na nodra Kalou.”

Na soqo guiguilecavi dredre oya, era papitaiso kina e lewe 1,300 na gone me ivakaraitaki nira sa yalataki ira vei Jiova. Vuqa vei ira na gone oqori era se tudei tu ga ena vakabauta me yacova mai edaidai. Era tokona na ivavakoso era lewena, era bole cakacaka e Peceli, se ra kaulotu e vanuatani. Levu na gone era guiguilecava dredre na “Nodra Siga na Gone” oya kei na ivola na Children!

“E Vaka Mera Lako Mai Ena Kena Gauna Dodonu”

Donuya na veiyabaki ni 1970 me lako mai, era sa tabaka na iVakadinadina i Jiova e tolu tale na ivola e tarai ira tale ga e vica vata na drau na udolu na gone. Na ivola na Vakarorogo Tiko ki Vua na Qasenivuli Levu, Your Youth​—Getting the Best out of It, kei na Noqu i Vola ni Talanoa Ena i Volatabu. Ena 1982 sa tekivu tabaki na ulutaga, “Ra Taroga na iTabagone . . . ” ena ivoladraudrau na Yadra! Na ulutaga oqo e uqeti ira na gone kei na qase. E kaya e dua na gone yabaki 14: “Ena veibogi au dau vakavinavinaka tu ga vua na Kalou ni uqeta na kena tabaki mai na ulutaga oqo.” E kaya e dua na gone yabaki 13: “Au taleitaka dina na veiulutaga, e vaka mera lako mai ena kena gauna dodonu.” Era duavata na itubutubu kei ira na qase vakarisito, ni veiulutaga oqo era yaco mai ena kena gauna dodonu, ra qai yaga.

Ena 1989 sa rauta ni 200 na ulutaga e kovuti ena “Ra Taroga na iTabagone . . . ” era tabaki ena itabataba vakavalagi ni Yadra! Ena Soqo ni Tikina na “Yalo ni Qaravi Kalou” a vakayacori ena yabaki oya, a soli kina na ivola Questions Young People Ask​—Answers That Work. E vukei ira beka na itabagone mera tudei ena vakabauta? Oqo na ka eratou vola mai e tolu na itabagone: “E yaga sara ga vakalevu vei keitou na ivola oqo, keitou qai kila kina na neimami leqa na itabagone, kei na sala me wali kina. Vinaka vakalevu na nomuni kauaitaki keimami.” Era duavata ena tikina oqo e vuqa na itabagone ena veiyasa i vuravura.

“Vakaotia Neirau Viakana”

Ena 1999, ra vakarautaka tale na iVakadinadina i Jiova e dua na ivurevure ni veivakasalataki vei ira na itabagone, oya na vidio Young People Ask​—How Can I Make Real Friends? E ciqomi ena marau. “E tarai au sara ga vakabibi na vidio oqo,” e kaya e dua na gone yabaki 14. “Keitou na vakayagataka vakawasoma na kakana vakayalo oqo,” e kaya e dua na tina itubutubu le dua. E kaya e dua na goneyalewa: “Eda luvuci nida kila ni noda iTokani voleka na noda Kalou o Jiova, e lomani keda, qai kauaitaki keimami dina na itabagone keimami lewe ni nona isoqosoqo ena vuravura raraba.”

Sa vakacava sara mada na yaga ni vidio? Ra kaya e so na itabagone: “E vukei au meu qarauna na noqu ilala, meu vakarabailevutaka na noqu veikilai kei ira kece ena ivavakoso, me noqu itokani o Jiova.” “E vukei au mera kua ni rawai au na noqu icaba.” “E vakadeitaka na noqu sasaga meu qaravi Jiova tiko ga ena noqu vinaka taucoko.” Rau vola mai e dua na veiwatini: “Keirau vakamuduo mai vu ni yalo i keirau ni soli mai na ‘kakana’ oqo. E vakaotia neirau viakana.”

E yalodina ena nona itavi soli vakalou na “dauveiqaravi yalo dina ka vuku” ena nona vakarautaka na kakana vakayalo ena kena gauna dodonu vei ira kece era na ciqoma. Sa dua na ka noda marau nida raica ni sa vukei ira tiko na itabagone edaidai na ivakasala vakaivolatabu me rawa nira “tudei ena yalomatua kei na lomadei e na nomuni muria taucoko na lomana [ni Kalou]”!