Na iVunau Koula​—iVakavuvuli Kilai Raraba

“Na ka ga dou vinakata me ra cakava vei kemudou na tamata, dou cakava tale ga vei ira.”​—Maciu 7:12, VV.

A CAVUTA na veivosa oya o Jisu Karisito rauta ni ruanaudolu na yabaki sa oti ena nona iVunau kilai levu ena Ulunivanua. Mai na veitabadrau na yabaki sa oti, e levu sara na ka e tukuni qai volai me baleta na veivosa oya. Me kena ivakaraitaki, e tukuni ni oya “na uto sara ga ni iVolatabu,” “na ivakamacala lekaleka ni nona itavi na lotu Vakarisito vua na wekana,” kei “na yavu ni ivakavuvuli dina.” Na kena kilai levu e vakatokai kina me iVunau Koula.

E sega wale ga nira ciqoma na iVunau Koula o ira era vakacavutaki ira nira lotu Vakarisito. Ena duidui sala era vakamacalataka tale ga na lotu Vakajiu, lotu Buda, kei na vuku vakirisi na dina ni ivakavuvuli oqo. E kila levu mai na Tokalau kei Esia na malanivosa i Confucius, era dau raici koya mai na veivanua vakaesia me turaga vuku qai qasenivuli rogo. E vakamacalataki vakatolu na vakasama oqo ena Analects, na ikatolu ni nona ivola o Confucius na Four Books. Vakarua, ena nona sauma na nodra vakatataro na gonevuli, a kaya o Confucius: “Na ka o sega ni vinakata me caka vei iko, kua ni cakava vei ira na tani.” Ena dua tale na gauna, a kaya ena dokadoka nona gonevuli o Zigong: “Na ka au sega ni vinakata mera cakava vei au, au na sega tale ga ni cakava vei ira,” a sauma lesu o qasenivuli ena nona tukuna, “Io, ia oqori na ka o se sega ni cakava rawa.”

Nida wilika na veivosa oqori, eda raica ni duidui na ivakamacala i Confucius mai na ka e tukuna o Jisu. Na duidui levu e kune ena iVunau Koula a cavuta o Jisu, oya meda liutaka sara ga na caka vinaka vei ira na tani. Vakasamataka mada ke ra cakava na tamata na ka e tukuna o Jisu, na nodra kauaitaki qai caka na ka mera vukei kina na tani, na kena bulataki e veisiga na ivakavuvuli oqo. O nanuma beka ni oya ena vakavuna me vanua vinaka cake kina nikua na vuravura? E sega ni vakabekataki.

Ke mani vakacava na kena icavucavuti na ivunau oqo, e vakavure vakasama ni dina ga e duidui na gauna kei na vanua era bula kina, ia e vuqa era vakabauta na ivakavuvuli ni iVunau Koula. E vakadeitaka oqo ni iVunau i Jisu ena Ulunivanua e kilai ni cakayaco ina nodra bula na tamata ni veivanua ena veitabayabaki.

Tarogi iko mada: ‘Au na vinakata beka meu dokai, kua ni vakaduiduitaki, kua tale ga ni veidabuitaki? Au na vinakata beka meu bula ena dua na vuravura e sega kina na veicati vakamatatamata, basulawa, kei na ivalu? Au na vinakata beka meu bula ena dua na vuvale era dau veinanumi qai dau veikauaitaki?’ O cei tale me na sega ni taleitaka? Na kena dina ni le lailai sara era marautaka na veituvaki oqori. E vuqa, era sa na sega tu ga ni nuitaka rawa na ituvaki vaka oya.

Beci na iVunau Koula

Ena veitabagauna sa oti, a yaco tale ga e so na kisi ni cakacala ina kawatamata ni raibaleti na nodra dodonu. Oqo e wili kina na nodra volitaki tamata me bobula mai Aferika, nodra keba ni mate na Nazi, nodra vakacakacakataki vakavoraki na gone, qai vakaloloma na nodra veilabalabati vakawa mai na duidui vanua. E levu tale na ka vakarerevaki e dau yaco.

Edaidai, sa via lewai koya ga na noda vuravura vereverea oqo. E vuqa era nanumi ira ga ena gauna e ganiti ira kina se ena gauna e bolei kina na nodra dodonu. (2 Timoci 3:1-5) Na cava na vuna e levu sa ra nanumi ira ga kina, ra tawaloloma, qai sega ni veikauaitaki? Sega li ni raici na iVunau Koula, dina ga ni kilai levu, me tawayaga, qai ivakavuvuli makawa? E ka ni rarawa, ni vaka oqori na nodra rai sara mada ga e vuqa era kaya nira vakabauta na Kalou. Nida raica na itosotoso ni bula eda sa vakanaulu tiko kina oqo, e sa na qai levu cake ga na nodra tawaveinanumi na tamata.

O koya gona, na taro me vakasamataki oqo: Na cava e okati ena bulataki ni iVunau Koula? E se bulataka tiko beka e dua? E tiko beka na gauna ena bulataka kina na kawatamata kece na iVunau Koula? Me saumi na veitaro oqori, oni kerei mo ni wilika na ulutaga e tarava.

[iYaloyalo ena tabana e 3]

E duidui na ivakamacala e vakatavuvulitaka o Confucius kei na so tale me baleta na iVunau Koula