O se Nanuma Tiko?

O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:

• E yaga vakacava na lewa e tauca na Federal Constitutional Court kei Jamani ena kisi me baleta na galala ni sokalou?

E veisautaka na mataveilewai levu oqo na lewa e tauca e dua tale na mataveilewai me baleti ira na iVakadinadina i Jiova kei na nodra sasagataka me kilai vakalawa na nodra isoqosoqo. Era qaqa ena kisi oqo o ira na iVakadinadina i Jiova. E kaya na lewa e tauca na mataveilewai ni galala ni sokalou e solia na galala vua e dua me ‘vakarorogo vakalevu ina nona vakabauta,’ ka vakalailai ina nona matanitu.​—8/15, taqana e 8.

• E vakacava sara mada na dede ni gauna a rarawa voli kina o Jope?

E sega ni vakaraitaka na ivola i Jope ni a rarawa voli o koya ena dua na gauna balavu. Na rarawa nei Jope kei na kena wali e rairai yaco ena loma ni vica ga na vula, sega beka ni dua sara na yabaki.​—8/15, taqana e 31.

• Na cava eda kila deivaki kina ni sega ni itukuni wale ga na Tevoro?

E kila o Jisu Karisito ni dua dina na kabula na Tevoro. Sega ni temaki Jisu na ivalavala ca e tiko vua, e sagai koya e dua dina na kabula. (Maciu 4:​1-​11; Joni 8:​44; 14:30)​—9/1, taqana e 5-6.

• E kaya na Vosa Vakaibalebale 10:15: “A nonai yau na vutuniyau sa nona koro kaukauwa: a nodra dravudravua na dravudravua sai koya era ca kina.” E dina vakacava oqo?

Na iyau e rawa ni taqomaki keda mai na noda sotava e so na bula dredre, vaka ga na koro e viribaiti vinaka tu, e itataqomaki vei ira na lewena. Ia, na dravudravua e rawa ni veivakaleqai ke yaco e so na leqa tubukoso.​—9/15, taqana e 24.

• Na cava na kena ibalebale nira sa qai tekivu na tamata “me vakatokai ira e na yaca i Jiova” ena gauna i Inosi? (Vakatekivu 4:​26)

Se taurivaki sara mai ena ivakatekivu na yaca i Jiova; ia na ka e tekivu ena gauna i Inosi, e sega ni baleta na nodra kacivi Jiova ena vakabauta. E rairai ra vakatokai ira na tamata ena yaca ni Kalou me beci kina o koya. Se ra lai vakatoka yacataki kina e so mera cuva vei ira ena sokalou lasu.​—9/15, taqana e 29.

• Na cava na ibalebale ni vosa na “veivakadodonutaki” e vakayagataki ena iVolatabu?

E sega ni kena ibalebale na veivakararawataki se veivakalolomataki. (Vosa Vakaibalebale 4:13; 22:15) Na vosa vakirisi ni “veivakadodonutaki” e vakayagataki ga ina veivakavulici, vuli, veivakasalataki kei na so na gauna ena veivakanakuitataki e tau ena loloma. Ke ra via vakatotomuri Jiova na itubutubu e bibi mera dau veivosaki tiko ga kei luvedra. (Iperiu 12:7-10)​—10/1, taqana e 8, 10.

• Era vakaraitaka vakacava na lotu Vakarisito dina nikua nira tokona na veiliutaki ni Kalou?

Nira tokona tiko na Matanitu ni Kalou, era sega ni vakaitavi na iVakadinadina i Jiova ena politiki se ra bukana na saqati ni matanitu e veiliutaki, ena vanua sara mada ga era vakacacani se vakatabui kina na iVakadinadina. (Taito 3:1) Me vakataki Jisu ga kei ira na nona imuri taumada e yaga dina na nodra cakacaka nira vukei ira na lewe ni nodra dui vanua mera muria na itovo talei ena iVolatabu, me vaka na dau dina, itovo savasava, kei na caka vinaka.​—10/15, taqana e 6.

• E drodrova vakacava na Andes na wai dau soli bula?

Era saga tiko na iVakadinadina i Jiova ena vanua oqo mera rogoca na lewenivanua na ka dina mai na iVolatabu, ena nodra vosa mada ga, na vosa vaka Quechua kei na vosa vaka Aymara. Era dau sikovi ira na lewenivanua era vakaitikotiko ena veiyanuyanu ena drano na Titicaca, wili kina na yanuyanu era “ciri” koto. Na yanuyanu ciri oqo era buli ena gasau era bula ena vanua vovodea ena drano.​—10/15, taqana e 8-10.

• Me vaka ga na kompiuta e dau nodra idusidusi na waqavuka ni vuka voli e macawa, na idusidusi cava e vakarautaka vei keda na Kalou?

E vakarautaka na Kalou na noda lewaeloma me idusidusi ni noda bula, meda rawa ni vakaduiduitaka na vinaka mai na ca, na ka e dodonu mai na ka e cala. Eda sucukaya mai o keda kece na lewaeloma. (Roma 2:14, 15)​—11/1, taqana e 3-4.

• E yaga vakalevu vakacava na mate i Jisu?

Ni sa ivalavala ca na tamata uasivi o Atama, sa vakayalia na nona bula kei na nodra bula na nona kawa. (Roma 5:12) Ni bula uasivi o Jisu e cabora rawa kina na nona bula me keda ivoli, me rawa kina vei ira era yalodina mera na rawata na bula tawamudu.​—11/15, taqana e 5-6.

• O cei o ira na yavusa na Scythia era cavuti ena Kolosa 3:11?

Era yavusa dau veitokiyaki ena vanua dravuisiga kece e Eurasia na Scythia, a ra lewa rauta na 700 ina 300 B.S.K. Era kenadau ni vodoose ra qai tamata ni ivalu. E rairai a sega ni dusia vakadodonu tiko e dua na matatamata na Kolosa 3:11 (NW), ia e vakaibalebaletaka ga vei ira na tamata e lolovira na ivakarau ni nodra bula.​—11/15, taqana e 24-5.

• Na cava e bibi kina meda dau vakasamataka wasoma na ivakavuvuli ni iVunau Koula?

Na ivakavuvuli yaga oqo e vakatavulici ena lotu Vakajiu, lotu Buddha, ena vuku vakirisi, kei na lotu i Confucius. Ia, ena nona Vunau ena Ulunivanua o Jisu, e dusimaka meda liutaka sara ga na caka vinaka vei ira na tani, qai cakayaco na ivakavuvuli oqo ina nodra bula na tamata ni veivanua ena veitabayabaki. (Maciu 7:​12)—12/1, taqana e 3.