Qasenivuli ni Vosa ni Kalou​—Ra Gu ni Vakayacora na Nodra iLesilesi

ERA kacivi vata mai e drau na udolu na qasenivuli mera mai vakavulici ena vica na vula wale tiko ga oqo. Me tekivu sara mai ena vula o Me sa sivi, era kumukumuni vata yani ina vica na drau na Soqo ni Tikina ni iVakadinadina i Jiova ena vuravura raraba, na kena usutu, “Qasenivuli ni Vosa ni Kalou.” Era uqeti na tiko ena soqo oya mera vakavulici ira mada, mera vakaiyaragitaki ira vinaka sara, ra qai gu ni vakayacora na nodra ilesilesi vaqasenivuli.

O a tiko beka ena dua na soqo oya? Ke vaka kina, sega ni vakabekataki ni o a marautaka na kakana vinaka vakayalo a soli ena soqo oya ena kena sokaloutaki na Kalou dina o Jiova. Meda railesuva mada na porokaramu ni veivakavulici ni soqo oya.

iMatai ni Siga​—Yavu ni Veivakavulici Yaga na iVolatabu Uqeti Vakalou

A kidavaki ira na lewenisoqo na jeameni ni soqo ni tikina ena ivunau “Kemuni na Qasenivuli ni Vosa ni Kalou, Mo ni Mai Vuli.” O Jisu Karisito a vuli mai vei Jiova, na “Dauniveivakavulici Uasivi,” mani yaco kina me Qasenivuli Levu. (Aisea 30:​20, NW; Maciu 19:16) Kevaka eda vinakata meda qasenivuli vinaka cake ni Vosa ni Kalou, ena dodonu meda na vuli tale ga mai vei Jiova.

Na vosa e tarava, “Vuavuaivinaka na Noda Veivakavulici me Baleta na Matanitu ni Kalou.” Nira vakatarogi e so na qasenivuli matua ni Vosa ni Kalou, era vakabibitaka ni nodra vakayaco tisaipeli e ka ni marau qai veivakalougatataki tale ga.

Tarava, na ivunau veivakauqeti e kena ulutuga “Uqeti ena ‘Cakacaka Veivakurabuitaki ni Kalou.’” Ena imatai ni senitiuri, e a uqeti ira na tamata na “cakacaka veivakurabuitaki” e vauca na Matanitu ni Kalou mera cakava na ka. (Cakacaka 2:​11, VV) Ena rawa tale ga nida uqeti ira na tamata mera cakava na ka ena noda tukuna yani na “cakacaka veivakurabuitaki” me vaka na ivakavuvuli vakaivolatabu me baleta na ivoli ni sereki, na veivakaturi, kei na veiyalayalati vou.

E vakayaloqaqataki keda kece na vosa e tarava meda “Marautaka na Yalododonu i Jiova.” (Same 35:27) Eda vukei meda vakasaqara na ivalavala dodonu ena noda vulica meda taleitaka na ivalavala dodonu da qai cata na ivalavala e ca, ena noda vulica na iVolatabu, da valuta sara ga na veika era veivakaleqai vakayalo, qai laurai vei keda na yalomalumalumu. Nida cakava oya eda taqomaki mai na vakailala ca, na domodomoiyau ni vuravura oqo, kei na ka ni veivakamarautaki vakasisila kei na itovo kaukaua.

A vakadreti keda na ulunivosa e kena ulutuga, “Vakarautaki Vinaka Meda Qasenivuli ni Vosa ni Kalou,” ni vakayagataka o Jiova na nona Vosa, na yalona tabu, kei na nona isoqosoqo e vuravura me vakaiyaragitaki keda meda nona italatala. Nida vakayagataka na Vosa ni Kalou, e kaya o koya e vosa: “Me noda isausau meda tokia na ibalebale ni iVolatabu mai na kena draunipepa me tara sara na lomadra na vakarorogo.”

“Vakavulici Keda Nida Vakavulica Tiko e Dua Tale” na ulutaga ni imatai ni vosa veitaravi ena soqo oqo. A vakadreti keda na imatai ni vosa oya ni dodonu meda muria na ivakatagedegede cecere ni ivalavala kilikili vakarisito eda vakavulica vei ira na tani. E vakasalataki keda na vosa e tarava meda “wasea vakadodonu nai vakavuvuli dina.” (2 Timoci 2:​15) Nida vakavulici keda, e bibi me wasoma qai gumatuataki na noda vulica vakataki keda na iVolatabu , veitalia ga na balavu ni gauna eda qaravi Kalou tu mai kina. Na iotioti ni vunau ena vosa veitaravi oqo e vakamacalataka ni dau vaqara vei keda na Tevoro na ivalavala me vaka na dokadoka, na yalo ni vakaunona, na viavia rogo, vuvu, na yalo ni veisisivotaki, veicati, veivorati, kei na vaqara cala. Ia, kevaka eda saga vagumatua meda vorata na Tevoro, ena drotani o koya. Meda vorati koya, ena dodonu meda toro voleka vua na Kalou.​—Jemesa 4:​7, 8.

Na vosa veiganiti “Cata Sara na Mate Ca ni Vuravura, na Saravi ni iYaloyalo Vakasisila” e vakamacalataka na iwali ni leqa rerevaki oqo ina noda bula vakayalo. E kaya na parofita o Apakuki me baleti Jiova: “Sa savasava na matamuni ka sa dredre kina mo ni vakaraica na ca, ia ko ni sa sega ni vosota mo ni raica na ka e ca.” (Apakuki 1:​13) E dodonu meda “cata sara na ka ca.” (Roma 12:9) Era vakasalataki na itubutubu mera kila se cava era sarava na luvedra ena Internet kei na retioyaloyalo. Kivei ira era dau galeleta na iyaloyalo vakasisila, e kaya o koya e vunau, e dodonu mera kerea na nona veivuke e dua na nodra itokani matua vakayalo. Ena veivuke tale ga ke ra dau vakananuma qai dau cavuqaqataka na veitikinivolatabu me vaka na Same 97:10; Maciu 5:​28; 1 Korinica 9:​27; Efeso 5:​3, 12; Kolosa 3:5; kei na 1 Cesalonaika 4:​4, 5.

E veivakacegui na vosa e tarava, “Me Maroroi Iko na Vakacegu ni Kalou,” e vakadeitaka ni gauna e bikai keda kina na lomanuiqawaqawa, e rawa nida vakataqara vei Jiova na noda icolacola bibi. (Same 55:22) Ke da talaucaka na lomada ena masu, ena solia vei keda o Jiova “na vakacegu ni Kalou,” oya na maravu ni lomada e vu mai na noda veiwekani voleka kei koya.​—Filipai 4:​6, 7.

A mai tini na imatai ni siga ena dua na vosa rogo vinaka “Vakaiukuukutaki Ira Nona Tamata o Jiova Ena Rarama,” e vakamatatataka na kena vakayacori na Aisea wase e 60. E vakaruguti tu na vuravura oqo ena butobuto, ia o ira na “kai tani”​—na isoqosoqo levu era cadra mai me vaka na sipi​—era marautaka vata kei ira na lumuti lotu Vakarisito na rarama i Jiova. Nona cavuta o koya e vosa na tikina e 19 kei na 20, a qai vakamacalataka: “Ena sega ni ‘kala’ o Jiova me vaka na matanisiga se ‘dromu’ me vaka na vula. Ena tomana tiko ga na nona vakaiukuukutaki ira na nona tamata ni vakacilava tiko ga vei ira na nona rarama. Sa bau totoka dina na vosa ni veivakadeitaki oya nida sa bula tiko ena gauna ni ivakataotioti ni vuravura butobuto oqo!” Ena icavacava ni nona vosa a kacivaka kina o koya e vunau ni sa soli mai na ivola Parofisai i Aisea​—me Vakararamataka na Kawatamata, iVola Rua. O sa wilika oti beka na ivola vou oqo?

iKarua ni Siga​—Noda Rawata Meda Veivakavulici

Ni oti ga na dikevi ni tikinivolatabu ni veisiga ena ikarua ni siga, eda a vakatudaliga sara ina ikarua ni vosa veitaravi, “Nida iTalatala, Meda Vukea e So Tale Mera Vakabauta.” Eratou a vakabibitaka na vunau ena tolu na iwasewase ni vosa veitaravi oqo e yadua na ikalawa ni nodra vukei na tamata mera mai vakabauta​—noda kaburaka na itukutuku ni Matanitu, na vakabulabulataki ni tataleitaki, kei na nodra vakavulici na tataleitaki mera muria na ivakaro i Karisito. E veivuke na veitarotarogi kei na kena matanataki, me tasereki sara kina vei keda na sala ni nodra vakavulici na tani mera tisaipeli.

Na vosa e tarava e yavutaki ena usutu “Vakaikuritaka ena Nomu Vosota na Dau Lotu.” E vakamacalataka o koya e vunau ni bibi cake sara na noda ‘vosota me yacova na icavacava.’ (Maciu 24:​13, NW) Meda vakayagataka na isolisoli kece mai vua na Kalou​—na masu, vuli vakataki keda, dau tiko ena soqoni, kei na cakacaka vakaitalatala​—me vakavinakataki cake tiko ga kina na noda qarava na Kalou. Meda vorata na gagadre kei na ogaoga vakavuravura mera kua kina ni mai vakalatilati se vakacacana na noda sokalou.

Era na vakacegui vakacava o ira era oca qai colata na icolacola bibi? A saumi na taro oya ena vosa “Kunea na Vakacegu ena Ruku ni iVua i Karisito.” O Jisu a sureti ira na nona imuri mera lako mai ena ruku ni nona ivua qai vuli vua. (Maciu 11:​28-​30) Eda rawa ni mai cola na ivua i Jisu kevaka eda muria sara vakavoleka na nona ivakarau ni bula e rawarawa ga qai veiraurau vinaka. A qai vakamakaretaka sara na veitikina bibi oya na nodra vakatarogi e so era sa veisautaka nodra bula me rawarawa ga.

E dua na ka e dau namaki ena nodra soqo lelevu na iVakadinadina i Jiova oya na nodra papitaiso na dauveiqaravi yalayala vou ni Kalou. A kidavaki ira era vakarau papitaiso na tacida e vunau ena ulutaga “Levu Tale na iTavi Dokai ni Veivakavulici ni Oti na Papitaiso” qai sureti ira mera vakaitavi vakalevu ena itavi dokai ni veiqaravi. E rawa nira tadolova na qasenivuli ni Vosa ni Kalou papitaiso vou era yacova na ivakatagedegede vakaivolatabu, e so na itavi ena loma ni vavakoso.

“Vakatotomuria na Qasenivuli Levu” na ulutaga ni imatai ni vosa ena yakavi oya. Ena vica vata na bilioni na yabaki mai lomalagi a vuli vinaka kina o Jisu qai vakatotomuri Tamana, rawa kina vua me Qasenivuli Levu. E vakayagataka na iwalewale ni veivakavulici e laulau ena nona bula voli e vuravura, me vaka na nona taroga na taro titobu kei na ivakatautauvata rawarawa e vakavure vakasama. E yavutaka ga na nona ivakavuvuli o Jisu ena Vosa ni Kalou qai veiuqeti na nona ivakamacala, dau vinaka na itautau ni nona vosa qai vosa o koya me vaka e dua e tu vua na lewa. Eda sega beka ni uqeti meda vakatotomuri koya na Qasenivuli Levu?

E vakayaloqaqataki keda e dua tale na vosa veiuqeti, “O Lomasoli Beka Mo Dau Veiqaravi?,” meda vakatotomuria na ivakaraitaki i Jisu meda dau veiqaravi. (Joni 13:​12-​15) E veivakauqeti o koya e vosa vei ira na tagane era sa rawata na ivakatagedegede mera vakataki Timoci ena nona dau vaqara na sala me vukei ira kina na tani. (Filipai 2:​20, 21) Era uqeti na itubutubu mera vakatotomuri Elikana kei Ana mera vukei ira na luvedra mera digitaka na cakacaka vakaitalatala vakatabakidua. Vaka tale ga kina o ira na itabagone era vakasalataki mera vakatotomuri Jisu Karisito kei na cauravou o Timoci mera soli ira mera veiqaravi. (1 Pita 2:​21) E tarai keda tale ga na nodra veimalanivosa e so era sa soli ira tu ina itavi ni dau veiqaravi.

Na usutu ni ikatolu ni vosa veitaravi, “Me Yaga Mada ga Vei Iko na Vuli Vakalou.” E vakadreta o koya e vosa e liu na bibi ni noda vakavinakataka cake na noda dau vakarorogo. Me rawa oya, ena vinaka me dau lekaleka ga na noda vuli vakataki keda ena kena itekitekivu oti me qai vakabalavutaki tiko vakamalua. E uqeti ira tale ga na vakarorogo mera wilika na tikinivolatabu qai vakatoqa na veitikina bibi ena gauna ni soqoni. E vakadreta tale ga o koya e vosa tarava na bibi ni noda taura matua “nai vakarau ni vosa dina.” (2 Timoci 1:​13, 14) Meda taqomaki mai na veitukutuku ni ivalavala vakasisila, na vuku vakavuravura, na dau vakadiloya na dina ni iVolatabu, kei na nodra ivakavuvuli na vukitani, ena dodonu meda volia na gauna meda vuli vakataki keda kina qai tiko ena soqoni. (Efeso 5:​15, 16) A vakabibitaka o koya na iotioti ni vosa ni na gadrevi meda vakaitovotaka na ka eda vulica me yaga tiko ga kina vei keda na vuli vakalou.​—Filipai 4:9.

Dua na ka na noda marau ni rogoca na ivunau “iSolisoli Vovou me Baleta na Noda Toso Vakayalo”! Eda reki nida rogoca ni sa voleka ni tabaki e dua na ivola vou, na kena ulutaga Me Yaga Vei Iko Nomu Curu ina Koronivuli ni Vuli Vunau. Eda a nanamaki sara ga ena gauna sa vakamacalataka kina o koya e vosa na lewenivola. Ni vakamacalataki na veitikina e baleta na ivakasala ni vosa ena ivola oqo, e kaya o koya e vunau: “E sega ni muria na rai vakavuravura na ivola oqo ena kena vakamacalataki na 53 na iwalewale vinaka ni wilivola, vosa, kei na veivakavulici. E yavutaki ga ena ivakavuvuli vakaivolatabu.” E vakamacalataka na ivola oqo na nodra ivakarau ni veivakavulici vinaka na parofita, o Jisu kei ira na nona tisaipeli. Io, ena vukei keda sara ga na ivola oqo kei na veiveisau ena Koronivuli ni Vuli Vunau meda qasenivuli vinaka cake sara kina ni Vosa ni Kalou.

iKatolu ni Siga​—Dodonu Meda Rawata Makawa Meda Qasenivuli

Ni oti na veivosakitaki ni tikinivolatabu ni veisiga ena iotioti ni siga, eda a vakatudaliga kece sara ina iotioti ni vosa veitaravi, “Vakarautaki Keda ina Siga i Jiova na Parofisai i Malakai.” A tekivu parofisai o Malakai rauta ni duanadrau na yabaki ni oti nodra suka mai Papiloni na Jiu. Sa baci rawai ira tale na vukitani kei na itovo ca, era beca na yaca i Jiova ena nodra vakanadakuya na nona lawa savasava kei na nodra kauta mai na manumanu mataboko, lokiloki, tauvimate me nodra isoro. Kuria oya, era sereka na watidra, rairai me rawa nira vakawatitaki ira kina na goneyalewa ni veimatanitu tani.

E vakadeitaka vei keda na imatai ni wase ni parofisai i Malakai ni o Jiova e lomani ira na nona tamata. E vakabibitaka ni gadrevi meda rerevaka na Kalou da qai doka tale ga na veika tabu. O Jiova e namaka meda solia vua na noda vinaka taucoko, sokalou vua ena loloma dina. E sega ni dodonu me ivakarau ga ni ka na noda veiqaravi tabu, da na qai dui saumitaro ga kina vua na Kalou.

Ni vakatauvatana na ikarua ni wase ni ivola i Malakai ina noda gauna, a taroga kina o koya e vunau ena ikarua ni wase ni vosa veitaravi oqo: “Eda qarauna beka o keda yadua me ‘kua ni kune ena tebenigusuda e dua na ka ca’?” (Malakai 2:6) E dodonu vei ira era veituberi ena vuli mera yavutaka sara ga na nodra veivakavulici mai na Vosa ni Kalou. Meda cata na veivakaisini me vaka na kena rawati na veisere ena yavu e sega ni dodonu.​—Malakai 2:​14-​16.

Ni vosa tiko ena usutu “O Cei ena Bula ena Siga i Jiova?” a vukei keda kina o koya e vosa ena iotioti ni vosa veitaravi ena sala meda vakarautaki keda kina ina siga i Jiova. E tukuna o koya e vunau “Sa vu ni veivakacegui dina vei ira na dauveiqaravi i Jiova nira kila ni sa vakayacori tiko vei ira na ibalebale levu cake ni Malakai wase e 3, tikina e 17!” “E tukuni kina: ‘A sa kaya ko Jiova ni lewe vuqa era na noqu ga, e na siga ka’u na kumuna kina na noqui yau talei; ia ka’u na lomani ira, me vaka na tamata sa lomani koya na luvena sa qaravi koya.’ ”

E dua tale ga na ka namaki ena soqo oqo na drama “Doka na Veiliutaki i Jiova,” eratou a vakaraitaki kina na luve i Kora. Dina ga ni a tusaqati rau o Mosese kei Eroni o tamadratou, ratou a yalodina tiko ga vei Jiova kei ira na nona mata. E a mate o Kora kei ira na nona imuri, eratou a bula na luve i Kora. Na vosa e tarava, “Ena Yalodina, Vakamalumalumu ina Veiliutaki Vakalou,” e vakamua na veika e yaco ena drama oya vei keda yadua. A vakarota o koya e vosa e ono na tikina era tawayalodina kina o Kora kei ira na nona imuri: nodra sega ni tokona ena yalodina na veiliutaki i Jiova; nodra vakalaiva na dokadoka, na viavia vakaitutu levu, kei na vuvu me vakavuna na nodra dre cala; na kena vakabibitaki na nodra malumalumu o ira era digitaki mai vei Jiova; na bukani ni vosakudrukudru; sega ni lomavakacegu ena nodra ilesilesi dokai; kei na vakaliuci ni yalodina vei ira na nodra itokani voleka kei na nodra matavuvale qai muri na nodra yalodina vei Jiova.

E ulutaga ni vunau soqovi levu, “O Cei e Vakavulici Ira Tiko na Veimatanitu ena Ka Dina?” Na ka dina e veivosakitaki oya, e sega ni ka dina e dau kilai raraba tu, ia na ka dina e baleta na inaki i Jiova o koya a mai vakatakila o Jisu Karisito. A vakamacalataka o koya a vunau ni ka dina oqo e salavata kei na noda vakabauta, na ka dina ena laurai ina ivalavala ni noda sokalou, kei na ka dina e vakavotui ena noda itovo. Nida vakatauvatani ira na lotu Vakarisito ena imatai ni senitiuri kei ira na iVakadinadina i Jiova nikua, sa qai vakaukauataka ga na noda vakabauta ni ‘sa tiko na Kalou ena keda maliwa.’​—1 Korinica 14:​25, VV.

Ni vakamacalataki oti vakalekaleka na ulutaga e vulici ena macawa oya ena Vale ni Vakatawa, e vakauqeti ira kece na qasenivuli ni Vosa ni Kalou era vakarorogo tiko na iotioti ni vunau, “Gu ni Vakayacora na Noda iLesilesi ni Veivakavulici.” A lesuvi vakalekaleka na parokaramu me vakadreta na kena bibi ni noda vakayagataka na iVolatabu ena noda veivakavulici, na sala eda rawata kina meda veivakavulici, kei na noda nuitaka sara ga na ka dina eda vakavulici ira kina na tani. E vakadreta tale ga o koya e vunau meda saga me ‘laurai na noda tubucake’ kei na noda ‘qarauni keda vinaka kei na noda ivakavuvuli.’​—1 Timoci 4:​15, 16, VV.

Eda matalau dina ena magiti vakayalo ena Soqo ni Tikina, “Qasenivuli ni Vosa ni Kalou!” Meda vakatotomuri koya mada ga na noda Dauniveivakavulici Uasivi, o Jiova, kei na noda Qasenivuli Levu, o Jisu Karisito, nida vakavulica vei ira na tani na vosa ni Kalou.

[Kato/iYaloyalo ena tabana e 28]

iVola Vovou e Veiganiti

Era marautaka na mataveitacini era tiko ena Soqo ni Tikina “Qasenivuli ni Vosa ni Kalou” na nodra taura e rua na ivola vou ena vukei ira ena so na yasa i vuravura mera vakavulica na ka dina mai na iVolatabu. Na ivolacebaceba, E Dina Beka ni Sega ni Dau Mate na Yalo? e iyaragi vinaka me tekivutaki kina na veivosaki ena veivanua e sega ni vakaduiduitaka na nodra vosa na vosa vakavalagi na “soul” kei na “spirit.” E vakamacalataka vakamatata na ivolacebaceba vou oqo ni rau duidui na yalo kei na kabula vakayalo, vaka tale ga kina ni mate na tamata ena sega ni lai vuki me dua na kabula vakayalo.

Ena iotioti ni vosa ena ikarua ni siga ni soqo a soli tale ga kina na brochure A Satisfying Life​—How to Attain It. Na inaki ni kena vakarautaki na brochure oqo oya me tekivutaki rawa kina na vuli iVolatabu kei ira era sega ni kila ni bula tiko e dua na Dauveibuli, ni tiko na nona itovo qai tiko tale ga e dua na ivola e uqeti vakalou. O sa vakayagataka beka na ivola vovou oqo ena nomu cakacaka vakavunau?

[iYaloyalo ena tabana e 26]

Mai Milan, Itali, kei na so tale na soqo ena veiyasa i vuravura, era le vica vata na drau na papitaiso

[iYaloyalo ena tabana e 29]

Ra vakauqeti na vakarorogo nira sarava na drama “Doka na Veiliutaki i Jiova”