Era Soqo ena Marau na “Dauvunau Gugumatua ni Matanitu ni Kalou”

E SA vakaleqai vuravura tiko na ivakarau ni bula, veika vakailavo kei na politiki. Dina ni yaco tu oqo, ia era a soqo ga na iVakadinadina i Jiova ena nodra Soqo ni Tikina siga tolu e kena usutu, “Dauvunau Gugumatua ni Matanitu ni Kalou.” Se tekivu sara mai na soqo oqo ena Me 2002, ena vakayacori ena veiyasa i vuravura.

E vakavu marau dina na soqo oqo. Meda railesuva mada vakalekaleka na kena porokaramu veivakauqeti e yavutaki vakaivolatabu.

Na iMatai ni Siga e Vakabibitaki Kina na Gugumatua i Jisu

E usutu ni imatai ni siga na “Gugumatua me Vaka na Noda Turaga o Jisu.” (Joni 2:​17) Na vosa “Eda Marau Nida Soqo Vata Mai na Dauvunautaka na Matanitu ni Kalou” e sureti ira na vakarorogo mera wasea vata na marau e dau kune ena veigauna era dau soqo vata kina na tamata ni Kalou. (Vakarua 16:15) E tarava na nodra vakatarogi e so na dauvunau gugumatua ni itukutuku vinaka.

Na vosa “Meda Rekitaki Jiova” e kovuta na veitikina yadudua ni Same 37:​1-​11. Eda uqeti me kua ni “vakararawataki” keda na nodra rawaka tiko ga na tamata ca. E dina nira dau vakatanitaka na itukutuku me baleti keda na tamata ca, ia e tiko na kena gauna vei Jiova me na qai vakamatatataka kina se o cei sara mada na nona tamata yalodina. Na vosa “Meda Dau Vakavinavinaka” e vakamacalataka se da rawa ni vakavinavinaka vakacava vua na Kalou. Na lotu Vakarisito kece me vakacabora na “imadrali ni vakavinavinaka” vei Jiova. (Iperiu 13:15) Na levu ni gauna eda vakayagataka ena veiqaravi vei Jiova ena vakatau mai na noda taleitaka kei na keda ituvaki.

E ulunivosa na “Ra Maqusa na Dauvunau Gugumatua ni Matanitu ni Kalou.” E dusi Jisu Karisito me ivakaraitaki vinaka ni gugumatua. Ni sa tauyavu na Matanitu vakalomalagi ena 1914, e gadrevi na gugumatua vei ira na lotu Vakarisito dina mera kacivaka na itukutuku vinaka. E dusia lesu o koya e vosa na kaci vakairogorogo ena soqo mai Cedar Point, Ohio, e Mereke ena 1922: “Kacivaka na Tui kei na Nona Matanitu”! Ni toso tiko na gauna, era uqeti na dauveiqaravi yalodina ni Kalou mera gugumatua, ra qai tukuna na veika talei me baleta na Matanitu ni Kalou e veivanua kece.

A vakasavui ena yakavi ni imatai ni siga na ulutaga “Yaloqaqa Nida Kila ni Tiko kei Keda o Jiova” qai vakaraitaka ni o ira na tamata ni Kalou era sagai sara tiko ga mai vei Setani. Dina nida sotava na veitusaqati, ia na noda vakananuma na ivakaraitaki vakaivolatabu ni vakabauta ena gauna makawa, vaka kina edaidai ena vakaukauataki keda meda yaloqaqa.​​—⁠Aisea 41:⁠10.

Tarava, e dua na vosa veitaravi e wasei vakatolu e kena ulutaga “Vakauqeti Keda na Parofisai i Maika Meda Lako Tiko ga ena Yaca i Jiova.” O koya e vosa e liu e vakatauvatana na torosobu ni itovo, na vukitani kei na domodomoiyau ena siga i Maika kei na noda gauna. E kaya: “Ena vakadeitaki na noda inuinui me baleta na gauna sa bera mai kevaka eda bucina e lomada na talairawarawa, meda ivalavala savasava da qai daulotu​​—⁠vaka kina na noda nanuma tiko ni na yaco dina na siga i Jiova.”​​—⁠2 Pita 3:​11, 12.

O koya e vosa ena ikarua ni iwasewase e vakamacalataka na itotogi warumisa e cavuta o Maika me baleti ira na iliuliu kei Juta. Era vakararawataki ira na dravudravua kei ira na vakaloloma. Ia a cavuta tale ga o Maika ni na vakataudeitaki tale na sokalou dina. (Maika 4:​1-5) Nida vakaukauataki ena yalo tabu i Jiova, e noda inakinaki gona meda kacivaka na itukutuku nuitaki ni veivakacegui oqo. Ia vakacava ke sega ni rawa nida vakayacora vaka kina ena vuku ni tauvimate se so tale na ka e vakataotaki keda? E tukuna o koya na ikatolu ni vosa: “E sega ni dredre na ivakatagedegede i Jiova, eda rawa ni sauva.” E vakamacalataka na veitikina mai na Maika 6:​8, e kaya: “Cava tale sa taroga maivei iko ko Jiova, mo caka dodonu ga, ka mo vinakata na yalololoma, ka mo yalomalumalumu tale ga ni drau lako vata kaya na nomu Kalou?”

Ni rawa ni vakaleqai ira na lotu Vakarisito na torosobu ni itovo e vuravura, e yaga kina vei keda kece na vosa “Mo Savasava Tiko ga ni O Taqomaka na Lomamu.” Me kena ivakaraitaki, na noda savasava tiko ga ena vukea me mamarau noda bula vakawati. Nida lotu Vakarisito meda kua sara ga ni vakasamataka na veidauci.​​—⁠1 Korinica 6:​18.

Na vosa “Qarauna De O Vakacalai” e tukuni kina meda okata me vaka sara ga na paisoni na veivakacalai, na rai cala, kei na nodra vakaucaca na vukitani. (Kolosa 2:⁠8) Kuria oya, meda kua ni vakaisini keda ena noda nanuma nida na sega ni leqa ke da vakaceguya na noda gagadre ca.

“Qarava na Kalou Dina Duadua Ga” e ulutaga ni iotioti ni vosa ena imatai ni siga. Ni sa qai dredre tiko ga mai na ituvaki ni bula, e veivakacegui nida kila ni sa vakarautaka tiko o Jiova nona vuravura vou ni yalododonu! O cei ena bula kina? O ira ga na qaravi Jiova. Me vukei keda, o ira na luveda kei ira na vuli iVolatabu ena kena rawati na isausau oqori a sereki kina na ivola Qarava na Kalou Dina. Eda a marautaka dina!

iKarua ni Siga e Vakabibitaka na Gumatua ena Ka Vinaka

E usutu ni ikarua ni siga ni soqo na “Gumatua ena Ka Vinaka.” (1 Pita 3:​13) E vakamacalataki ena imatai ni vosa na tikinivolatabu ena siga oya. E vakabibitaka nida na dau gugumatua ke da dikeva wasoma me qai vakaibalebale vei keda na tikinivolatabu e veisiga.

Tarava sara na vosa veitaravi “O Ira na Dauvunau Era Doka na Nodra Cakacaka.” E vakabibitaka na imatai ni iwasewase na tukuni vakadodonu ni Vosa ni Kalou. (2 Timoci 2:​15) Na noda vakayagataka vinaka na iVolatabu e dolava na sala me ‘vakaukauataki’ kina na bula ni tamata. (Iperiu 4:​12) Meda veivakamuai ena iVolatabu qai momona noda ivakamacala. Na ikarua ni iwasewase e uqeti keda meda lesuvi ira vakawasoma na tataleitaki. (1 Korinica 3:⁠6) E gadrevi na vakavakarau vinaka kei na doudou ena nodra sikovi vakatotolo na tataleitaki. Na ikatolu ni iwasewase e vakatura meda raici ira eda sotava nira na tisaipeli mai muri, qai vakaraitaka ni rawa mera sureti sara ga ena vuli iVolatabu ena imatai ga ni gauna eda sotavi ira kina.

Na “Vuna Meda ‘Masu Tikoga Kina’ ” e usutu ni vosa e tarava. Na iVolatabu e uqeti ira na lotu Vakarisito mera vakararavitaka vakatabakidua nodra bula vei Jiova. E dodonu me tiko na gauna eda masu kina vakataki keda. Kuria oqori, meda gumatua ena masu, ena rairai vakalaiva o Jiova meda masu tiko ga ni bera nida kila na kena macala.​​—⁠Jemesa 4:⁠8.

Na vosa “Veitaraicake na Veivosakitaki ni Veika Vakayalo” e uqeti keda meda vakayagataka noda dau veivosaki me yaga vei keda kei ira tale na so. (Filipai 4:⁠8) Era gadreva na veivosaki vakayalo e veisiga na veiwatini kei ira na gone. Me rawati oqori, e rawa ni ratou tuvanaka vakavuvale me bau dua mada ga na gauna ni kana ena dua na siga me ratou tiko kece kina na lewenivuvale, ni oqo e gauna vinaka me veivosakitaki kina na veika e veitaraicake.

E mai vakacavari na porokaramu ena mataka oya ena vosa veiuqeti “Na Yalayala kei na Papitaiso e Basika ina Bula.” O ira na papitaiso era sa vulica vakatitobu na iVolatabu, era sa mai vakabauta, ra veivutuni, ra vakanadakuya na veika ca, ra qai yalataki ira vua na Kalou. Nira sa papitaiso, e tukuna o koya e vosa, mera na tubu tiko ga vakayalo ra qai dei ena nodra dau gugumatua kei na nodra itovo vinaka.​​—⁠Filipai 2:​15, 16.

Ena yakavi e vakabibitaki e rua na ka ena vosa “Dau Yalomalumalumu, me Rawarawa Tale ga na Matamu.” Na yalomalumalumu e kena ibalebale noda kila ni vakaiyalayala ga na veika eda rawata kei na noda itutu ena mata ni Kalou. Ena vukei keda na yalomalumalumu me “rawarawa” tu ga na matada​​—⁠me coba dei ena Matanitu ni Kalou, sega ena qarai ni iyau. Ke da cakava oqori, eda na sega ni lomaocaoca, ni na vakarautaka o Jiova na veika eda gadreva.​​—⁠Maciu 6:​22-​24, 33, 34, NW.

Na vosa e tarava e vakaraitaka na vuna meda “Vakararavi Vakatabakidua Vei Jiova ena Gauna Dredre Oqo.” Eda na walia vakacava na noda dui malumalumu, leqa vakailavo kei na tautauvimate? Meda masuti Jiova me solia vei keda na yalomatua da qai kerea na nodra veivuke e so tale. Meda kua ni yalolailai se domobula ia meda vakararavi ga vakatabakidua vua na Kalou ena noda wilika na nona Vosa.​​—⁠Roma 8:​35-​39.

“Ena Vakatovolei na Noda Vakabauta” e usutu ni iotioti ni vosa veitaravi ena soqo. Na imatai ni iwasewase e vakadreta nida na sotava na lotu Vakarisito yalodina kece na veika rarawa. E ivakadinadina, e vakaukauataka na noda vakabauta, qai solia vei keda na sala meda vakaraitaka kina na noda yalodina vua na Kalou. Dina nida na sega ni biuti keda ena dua na itutu ni leqa, eda na sega ga ni vakayagataka na veika e sega ni yavutaki vakaivolatabu meda levea kina na veika rarawa.​​—⁠1 Pita 3:​16.

Na ikarua ni iwase ni vosa veitaravi oqo e tarogi kina e so na taro e baleta na noda tawaveitovaki. Era sega ni dau vakatubuca na lotu Vakarisito taumada, ia era kila ni vakatabakidua ga vua na Kalou na nodra yalodina. Era vaka tale ga oqori na iVakadinadina i Jiova edaidai, nira taura matua na ivakavuvuli: “Dou sa sega ni vakavuravura.” (Joni 15:19) Ni dau vakasauri na vakatovolei ni noda tawaveitovaki, ena daumaka ke da tikica na gauna meda dabe vata kina vakavuvale, meda railesuva na idusidusi yaga era tu ena iVolatabu. Na ikatolu ni iwase ni vosa veitaravi oqo e dusia ni sega ni inaki i Setani me vakamatei keda, ia me rawai keda ga meda tawayalodina. Ena vakacaucautaki o Jiova ena noda vosota ena yalodina na veivakalialiai, na idre ni itovo vakasisila, na veika e vakamosia na yaloda kei na bula tautauvimate.

Na veisureti vakayalololoma “Toro Voleka Vei Jiova” e ulutaga ni iotioti ni vosa ena siga oya. Noda kila vinaka na idivi kei Jiova ena vakavuna noda via toro voleka vua. E vakayagataka na nona kaukaua sega ni vakaiyalayala me taqomaki ira nona tamata, vakabibi ena veika vakayalo. Nona lewadodonu e sega ni voravora ia mera rawata ga kina na bula tawamudu na yalododonu. E vakadinadinataki nona vuku na Kalou ni vakayagataki ira na tamata sega ni uasivi mera vola na iVolatabu. E nona idivi vakasakiti duadua na loloma, e uqeti koya me vakarautaka na sala mera rawata kina na bula na tamata ena vuku i Jisu Karisito. (Joni 3:​16) Sa qai tinia o koya e vosa ena nona sereka e dua na ivola vou e veivakauqeti qai kena ulutaga Toro Voleka Vei Jiova.

iKatolu ni Siga e Vakabibitaka na Gumatua ena Cakacaka Vinaka

E ulutaga ni ikatolu ni siga ni soqo na “Matatamata Era Gumatua ena Cakacaka Vinaka.” (Taito 2:​14) A tekivu vinaka na porokaramu ena mataka ni veivosakitaki vakavuvale na tikinivolatabu ni siga oya. Tarava oqori na vosa “O Dau Nuitaki Jiova?” Era vakanuinui ga na veimatanitu ena nodra vuku kei na kaukaua. E kena veibasai vei ira na dauveiqaravi i Jiova nira yalodoudou ra qai marautaka na nodra vakararavi vua se mani leqa cava ga era sotava tiko.​​—⁠Same 46:​1-3, 7-​11.

Na vosa “Ra iTabagone​​—⁠ni Yavutaka Nomuni Veigauna Mai Muri ena iSoqosoqo i Jiova” e sauma na taro oqo: Ena vinaka vakacava na nomuni bula na itabagone? Ena sega ni vinaka ke vakasaqarai na ilavo, iyau, kei na rogo. E uqeti ira vakayalololoma na itabagone na noda Dauveibuli mera nanumi koya nira se gone. Era vakatarogi e so era gumatua ena veiqaravi vakayalo nira se gone, eda bau vakila tale ga nodra marau. E ka ni marau gona me ciqomi na ivolacebaceba vou, Ra iTabagone​​—⁠Oni na Vakayagataka Vakacava na Nomuni Bula?, e tabaki me vukei ira na iVakadinadina itabagone mera tara na yavu dei ni veigauna tawamudu sa tu mai muri ena isoqosoqo i Jiova!

Tarava oqori e dua na drama veilauti vakaivolatabu “Tudei ena Gauna ni Leqa.” E vakamacalataka na nona veiqaravi vakaitabagone o Jeremaia ena dua na gauna balavu me yacova na rusa i Jerusalemi, na ka ga a parofisaitaka tiko mai vagumatua. E nanuma o Jeremaia ni na sega ni rawata na nona itavi, ia a vakayacora ga ena dela ni veitusaqati, qai vakabulai koya o Jiova.​​—⁠Jeremaia 1:​8, 18, 19.

E tarava na drama oqori na vosa e kena ulutaga “Kua ni Rere ni Tukuna Yani na Vosa ni Kalou me Vakataki Jeremaia.” E dau tukuni na itukutuku lasu qai tabaki na vosa gaga me baleti ira na dau kacivaka na Matanitu ni Kalou edaidai. (Same 109:​1-3) Me vakataki Jeremaia ga eda na valuta na yalolailai ena noda rekitaka na Vosa i Jiova. Eda nuidei nira na sega ni qaqa o ira na valuti keda tiko.

E veiganiti dina na ulutaga ni vunau soqovi levu “Sa Veisau Tiko o Vuravura.” Sa dua na ka na veiveisau e yaco tiko ena noda gauna. E sa tukuni tu ena iVolatabu ni ituvaki vaka oya vaka kina na tagici ni ‘vakacegu kei na tiko vinaka’ e ikabakaba ina siga rerevaki ni veilewai ni Kalou. (1 Cesalonaika 5:⁠3) Ena kauta mai na veisau totoka​​—⁠sa na oti na ivalu, basulawa, itovo kaukaua kei na tauvimate sara mada ga. Meda kua gona ni nuitaka na ituvaki ni bula edaidai, ia sa kena gauna oqo meda iataka na sokalou dina da qai dei ena bula savasava.

Ni vakamacalataki oti vakalekaleka na ulutaga e vulici ena macawa oya ena Vale ni Vakatawa, e muria sara yani na iotioti ni vosa e kena ulutaga “Cakava Tiko ga na Ka Vinaka ni O Dauvunau Gugumatua ni Matanitu ni Kalou.” E vakaraitaka o koya e vosa ni yavalati keda vakayalo na porokaramu qai uqeti keda meda vakararavi vei Jiova. Kena itinitini, noda uqeti meda savasava, da veilomani, qai dauvunau gugumatua ni Matanitu ni Kalou.​​—⁠1 Pita 2:​12.

Na mataqali yalo vata ga oqo a kune vua na dauveiqaravi i Jiova ena gauna i Niemaia, eda lesu i noda itikotiko ena marau nida vakalougatataki vakayalo mai na Soqo ni Tikina e kena usutu “Dauvunau Gugumatua ni Matanitu ni Kalou.” (Niemaia 8:​12) O sega li ni marautaka na soqo oqo qai uqeti iko ena nomu sasagataka tiko ga mo dauvunau gugumatua ni Matanitu ni Kalou?

[Kato/iYaloyalo ena tabana e 23]

iVola Vou ni Vuli!

Ni cava na imatai ni siga ni soqo era marau na tiko kina ni a sereki na ivola vou Qarava na Kalou Dina. Na ivola oqo e baleti ira na sa vulica oti na ivola Na Ka Mo Kila Mo Bula Tawamudu Kina qai sega ni vakabekataki ni na vakaukauataka na nodra vakabauta era “sa vakarautaki tu ki na bula tawa mudu.”​—⁠Cakacaka 13:​48, VV.

[Credit Line]

iTaba ena waqanivola: U.S. Navy photo

[Kato/iYaloyalo ena tabana e 24]

iVukevuke Meda Volekata Kina na Kalou

Na iotioti ni vosa ena ikarua ni siga e sereki kina na ivola vou Toro Voleka Vei Jiova. E tiko kina e va na iwasewase, era vakamacalataka yadua na idivi kei Jiova​—⁠nona kaukaua, lewadodonu, vuku kei na loloma. E tiko tale ga ena iwasewase yadua ni ivola na wase e vakaraitaki kina ni o Jisu Karisito a vakatotomuria vinaka na kena idivi na Kalou. E inaki ni ivola oqo me vukei keda kei ira noda vuli iVolatabu me voleka qai qaqaco noda veiwekani kei na Kalou o Jiova.

[Kato/iYaloyalo ena tabana e 26]

iDusidusi Vakayalo Vei Ira na iTabagone

E duidui na ikatolu ni siga ni soqo ni sereki kina e dua na ivolacebaceba e kena ulutaga Ra iTabagone​—Oni na Vakayagataka Vakacava na Nomuni Bula? Era na vukei kina na itabagone mera vakatulewataka donu na veika era na cakava mai muri, kei na ivakasala vakaivolatabu mera na qaravi Jiova kina me tawamudu.