Digitaka na iVakavuvuli mo Muria

O DAU muria na ivakavuvuli? Se o nanuma ni sa oti na kena gauna? Na kena dina, ni tamata kece era dusimaki ena so na ivakavuvuli era vakabauta ni yaga. E kaya na New Shorter Oxford English Dictionary, ni ivakavuvuli e “noda idusidusi meda cakava kina na ka dodonu.” Na ivakavuvuli e vakayacoka ina noda vakatulewa qai lewa noda bula. E rawa tale ga ni vaka na kabasi.

Kena ivakaraitaki, e uqeti iratou nona imuri o Jisu me ratou muria na Lawa Koula, e kune ena Maciu 7:​12: “O koya, na ka vakaaduaga dou sa vinakata me ra kitaka vei kemudou na tamata, dou kitaka vaka talega kina vei ira.” Era muria na imuri i Confucius na ivakavuvuli e vakatokai na li (cakadodonu) kei na jen (cakavinaka), e vakabibitaka na itovo me vaka na yalololoma, yalomalumalumu, vakarokoroko kei na yalodina. O ira mada ga era sega ni dau lotu e tiko vei ira na idusidusi e lewa nodra ivakarau ni bula.

iVakavuvuli Cava Meda Digitaka?

Meda nanuma tiko ni rawa ni vinaka se ca na ivakavuvuli. Kena ivakaraitaki, ena sivia na tini na yabaki sa oti, e uqeti ira e levu na tamata na yalo ni dui nanumi koya ga. De levu era na rairai sega ni kila na itovo oqo se ra nanuma ni sega ni vauci ira, ia na yalo oqo era vakaitovotaka e levu nira vakanadakuya na ivakatagedegede cecere ni bula. Se vakatakilakilataki beka ena itovo oqo se sega, ia e laurai ga kina ni yalo ni dui nanumi koya ga e ivakaraitaki ni tawaveikauaitaki kei na kocokoco. “E rua ga neimami ivakavuvuli,” e kaya e dua na iliuliu ni kabani ni retioyaloyalo mai Jaina. “Dua nodra vakacegui na volivoli. Kena ikarua na rawailavo.”

Na yalo ni dui nanumi koya ga e rawa ni vaka na makeneta. E vakayacoka vakacava na makeneta ina kabasi? Ni rau veivolekati, e vakamuaicala na mata ni kabasi. Ena sala vata oya, na yalo ni dui nanumi koya ga e rawa ni vakamuacala nona kabasi se idusidusi ni ka dodonu e dua, me vakaliuca ga na nona gagadre.

O na kurabui mo kila ni yalo ni dui nanumi koya ga e sega ni qai tekivu wale ga oqo. A tekivu mai ena were o Iteni ni rau vakanadakuya na imatai ni noda itubutubu na ivakatagedegede ni bula e kotora na noda Dauveibuli. Oqo na ka e veisautaka nodrau idusidusi. Nida kawa i Atama kei Ivi, eda dau rawai na kawatamata ena yalo vata oqo, na “yalo ni dui nanumi koya ga.”​—Vakatekivu 3:​6-8, 12.

Na tete ni yalo vaka oqo e laurai levu ena gauna e parofisaitaka na iVolatabu me “iotioti ni veisiga,” e vakatakilakilataki ena “gauna cacamatua, lewalewai dredre.” Levu na tamata era na “lomani ira ga vakataki ira.” Sega ni vakabekataki nida bololaki sara tiko ga meda vakatotomuria na yalo ni dui nanumi keda ga vakataki keda.​—2 Timoci 3:​1-5, NW.

De dua o na duavata kei na dua na itabagone na yacana o Olaf a volavola ina dua na valenitabana ni iVakadinadina i Jiova mai Urope: “E dredre meda cakava tiko ga na ka dodonu, vakauasivi vei keimami na itabagone. Yalovinaka vakadreti keimami tiko ga me keimami kabita matua na ivakavuvuli ena iVolatabu.”

E dua na rai vakayalomatua e vakaraitaka o Olaf. Ena yaga vei keda na ivakavuvuli vakalou​—qase se gone​—meda muria tiko ga kina na ivakatagedegede cecere ni bula. Eda na vorata tale ga kina na yalo ni dui nanumi keda ga. Kevaka o via vulica e levu tale na sala me na vukei iko kina na ivakavuvuli vakaivolatabu, yalovinaka dikeva na ulutaga e tarava.

[iYaloyalo ena tabana e 4]

Levu nikua era sega ni kauaitaka na ka era gadreva na so tale