Era Sega ni Soro ni Vakararawataki Ira na Votonikau

“Sa dua na voto ni kau sa vakalauti kina na lewequ, e dua nai talaki i Setani me vakararawataki au.”​—2 KORINICA 12:7.

1. Na cava e so na leqa e yaco tu edaidai?

O SOTAVA tiko beka na leqa? Mo kila ni sega ni o iko duadua ga o sotava tiko oqori. Ena “veigauna dredre” oqo, era vosota tiko na lotu Vakarisito yalodina na veivakacacani kaukaua, na leqa vakavuvale, na tauvimate, nuiqawaqawataki ni bula vakailavo, na yalolailai, na takali ni wekadra lomani, kei na so tale na ka dredre. (2 Timoci 3:​1-5, VV) Ena so vanua, e rivarivabitaki kina na nodra bula e so ena vuku ni dausiga kei na ivalu.

2, 3. Na vakanananu cala cava e rawa ni votu mai na leqa eda sotava e vaka na votonikau dau veilauti, ia na cava e rivarivabitaki kina oqori?

² E so era tataqea dredre dina na leqa ke sa veitarataravi mai, ra lai yalolailai vakalevu. E kaya kina na Vosa Vakaibalebale 24:10: “Kevaka ko sa gu ca [se, “yalolailai,” NW] e na siga ni rarawa, sa lailai na nomu kaukauwa.” Io, kevaka eda yalolailai nida sotava na leqa, ena tuburi keda totolo na yalodatuvu, seavu tale ga na noda yalovosota. E rawa vakacava oqo?

³ Na yalolailai e rawa ni vaqiqotaka na noda rai. Me kena ivakaraitaki, e rawarawa wale nida vakatubutaka e lomada na noda leqa, da qai mai lomalomani keda yani. E so era na kaya ena vuturi vua na Kalou se cava e vakatara tiko kina me yacovi ira na ca. Ke sa dei vei ira na vakanananu cala vaka oya, era na sega ni marau se lomavakacegu. Ke sega ni qaqarauni na tamata ni Kalou, na nona yalolailai e rawa ni vakasoroi koya e “nai valu vinaka ni vakabauta.”​—1 Timoci 6:​12.

4, 5. Ena so na gauna, e mai curu tu vakacava o Setani ena leqa eda sotava, ia na cava meda nuidei kina?

⁴ Na Kalou o Jiova e sega ni vakavuna na noda leqa. (Jemesa 1:​13) E so na dredre eda sotava e vu beka ga mai na noda via yalodina vua. Io, o ira kece era via qaravi Jiova ena cati ira o Setani na Tevoro, na meca ni Kalou. E saga tiko na “kalou ni vuravura oqo,” ena gauna lekaleka sa vo vua, me vakayalodatuvutaki ira era lomani Jiova ra qai cakava tiko na lomana. (2 Korinica 4:4) E gu o Setani ena kena levu e rawata me vakaleqai ira na tacida kece e veiyasa i vuravura. (1 Pita 5:9) Ia meda kila tiko ni sega ni noda leqa kece e vakavuna o Setani, e rawa ga vua me vakaikuritaka na leqa sa tu rawa, me vakamalumalumutaki keda kina.

⁵ Ia se mani kaukaua vakacava o Setani kei na nona iyaragi, e se rawa ga nida qaqa vua! Eda kila vakacava? Na Kalou o Jiova e dau vala ena vukuda. Sa vakarautaka tu vei keda na nona tamata na itukutuku meda na kua ni lecava na ivadi ca i Setani. (2 Korinica 2:​11) Io, e levu sara ena Vosa ni Kalou na kedra itukutuku na lotu Vakarisito dina era sotava na veika dredre. Me kena ivakaraitaki, e tukuni kina na yapositolo o Paula ni a kaya ni dua “na voto ni kau sa vakalauti kina na lewequ.” Na cava e tukuni kina oya ena iVolatabu? Meda raica mada se vakamacalataki vakacava oqori ena Vosa ni Kalou. Nida cakava, eda na qai raica ni sega ni o keda ga eda gadreva na veivuke i Jiova me ulabaleti kina na veika dredre.

Na Vuna Era Vaka Kina na Votonikau na Veika Dredre

6. Na cava a rairai vakaibalebaletaka o Paula ni kaya ni ‘lauta na lewena e dua na votonikau,’ ia na cava beka na votonikau oya?

⁶ Bau rarawataki dina na veika a sotava voli o Paula, mani uqeti vakalou me vola ni “dua na voto ni kau sa vakalauti kina na lewequ, e dua nai talaki i Setani me vakararawataki au, de’u vakalevulevui sara.” (2 Korinica 12:7) Na cava sara mada na votonikau oqo e votoki Paula? Macala tu ga ni votonikau e coba e yavada se ina dua ga na tikiniyagoda e dau mosimosi dina. Na ivakatautauvata gona oya e dusia ni dua na ka mosimosi dina e sotava o Paula, e mosi kina na yagona se yalona, se rau mosi ruarua. De a mosi vua na ca ni matana se dua tale na tikiniyagona. Se okati me votonikau o ira na tamata era beitaki Paula ni sega dina ni yapositolo ra qai vosavakacacataka na nona cakacaka vakavunau kei na nona veivakavulici. (2 Korinica 10:​10-​12; 11:​5, 6, 13) Se mani cava na votonikau oya, e dredre ni leuti, mani coba tu ga.

7, 8. (a) Na cava beka e vakaibalebaletaki ena vosa a taurivaka o Paula, “vakararawataki”? (b) Na cava e bibi kina meda kua ni soro nida vakararawataki tiko ena dua na votonikau?

⁷ Eda raica e ke ni votonikau oya a vakararawataki Paula. Ia na vosa vakirisi e taurivaka e ke o Paula e veivolekati na kena ibalebale kei na vosa “ivacu.” E taurivaki sara ga na vosa oya ena Maciu 26:​67, ia na kena vakasama e kau cake mai ena 1 Korinica 4:​11. Na vakasama e tiko ena veitikina oya e baleta tiko na nona vaculaki e dua. Macala tu ga ni a marautaka dina o Setani na rarawa i Paula mai na votonikau oya, baleta na levu ni nona cati Jiova kei ira na nona tamata. E marau tale ga edaidai o Setani ke vakararawataki keda vaka oya e dua na votonikau.

⁸ Me vakataki Paula ga, e bibi meda kila se cava meda cakava meda kua kina ni soro mai na votonikau e rairai vakararawataki keda tiko. Ni na vakatau sara ga kina na noda bula! Nanuma tiko ni loma i Jiova meda bula tawamudu ena nona vuravura vou sa na oti vakadua kina na leqa e dau veivakararawataki me vaka na votonikau. E vukei keda na Kalou meda rawata na icovi uasivi oqo ena nona vakarautaka ena iVolatabu na kedra ivakaraitaki na nona tamata yalodina era sega vakadua ni soro, e dina ni tu na votonikau a dau vakararawataki ira. Era tamata ivalavala ca ga me vakataki keda. De na yaga meda dikeva na nodra ivakaraitaki e so mai “na i lala i vakadinadina levu” oya, me rawa kina nida ciciva “e na yalo dei na cere sa tu e matada.” (Iperiu 12:​1, VV) Nida vakasamataka lesu na veika era vosota, oqori ena vakavurea vei keda na yalo nuidei meda na kua ni soro, se mani mosimosi vakacava na votonikau i Setani.

Votonikau e Vakararawataki Mefiposece

9, 10. (a) A mai lauti Mefiposece tu vakacava e dua na votonikau? (b) A kauaitaki Mefiposece vakacava o Tui Tevita, ia eda na vakatotomuri Tevita vakacava?

⁹ Vakasamataki Mefiposece mada, na luve i Jonacani, na itaudredre i Tevita. Se qai yabaki lima o Mefiposece, sa kau yani na itukutuku ni rau sa vakamatei na tamana, o Jonacani kei na tukana, o Tui Saula. A taqaya vakalevu na marama a mei koya voli ni se gone. E “keveti koya . . . , ia ni sa kusarawa ni dro ko koya, sa lutu na gone, a sa lokiloki kina.” (2 Samuela 4:4) De dua, a vosovosota dredre o Mefiposece na nona lokiloki oqo ena nona tubu cake tiko, a vakararawataki koya me vaka beka e dua na votonikau mosimosi.

¹⁰ Na levu ni nona lomani Jonacani o Tui Tevita, sa qai kauaitaki Mefiposece ena vica tale na yabaki e muri. A solia kece na qele i Saula vua qai lesi Sipa, e dua na tamata i Saula, me qarava na qele oqo. A kaya tale ga vei Mefiposece o Tevita: “Ko na kana tikoga mai na noqu tepeli.” (2 Samuela 9:​6-​10) Sega ni vakatitiqataki ni vakacegui Mefiposece na loloma i Tevita, mani sega ni lomabibitaka kina na nona lokiloki. Sa dua na ka ni vuli totoka! Meda dau lomani ira tale ga era tiko ena ituvaki mosimosi e vaka ga na votonikau dau veilauti.

11. Na cava e lai lasutaka vei Tevita o Sipa me baleti Mefiposece, ia eda kila vakacava ni sega ni dina? (Raica na ivakamacala e ra ena taqana e 15.)

¹¹ E muri a baci basika e dua tale na votonikau me vakararawataki Mefiposece. A lai kaseti koya vei Tui Tevita o Sipa na nona dauveiqaravi, ena gauna a dro kina mai Jerusalemi o Tevita. Oqo ena gauna a veivorati kina o Apisalomi, na luve i Tevita. A kaya o Sipa ni tiko ga mai Jerusalemi o Mefiposece baleta ni via taura vakailawaki na itutu vakatui.a Mai vakabauta sara na lasu i Sipa o Tevita, qai solia kece vua na tamata veivakaisini oya na veika a taukena tu o Mefiposece!​—2 Samuela 16:​1-4.

12. Na cava a cakava o Mefiposece ina ituvaki dredre a sotava, ia e ivakaraitaki totoka vakacava vei keda o koya?

¹² Ia ni rau sa sota kei Tevita o Mefiposece, a tukuna sara vua na tui na ka e yaco dina. E kaya ni a vakavakarau tiko me lai tomani Tevita, ia a dabui koya o Sipa qai bole me sosomitaki koya. A vakadodonutaka beka o Tevita na leqa oqo? Vakatikina ga. A vota veimama vei rau na tagane oya na qele. Na ka gona oqo a rawa ni mositi Mefiposece tiko me vaka e dua na tikinikau e coba dei tiko ena yavana. Vakaevei, a rarawataka beka na ka e caka? A kudru beka vei Tevita, me kaya ni sega ni donu na ka e cakava? Sega, a ciqoma ga ena yalomalumalumu na ka sa vakatulewataka na tui. A bibi ga vua ni sa lesu bula yani na tui dina kei Isireli, a rekitaka dina. Sa bau totoka sara ga na ivakaraitaki i Mefiposece, oqo ni a vosota voli na bula ni dua na lokiloki, na lasu a tukuni me baleti koya, kei na lomabibi levu.​—2 Samuela 19:​24-​30.

Sega ni Soro o Niemaia ena Veika Dredre e Sotava

13, 14. Na cava a vaka voli na votonikau vei Niemaia ni sa lesu me lai tara tale na bai kei Jerusalemi?

¹³ Vakasamataka na veika e vaka na votonikau mosimosi vei Niemaia ni sa lesu yani i Jerusalemi ena ikalima ni senitiuri B.S.K., qai raica ni sega ni vakabai tu na koro. A sega sara ga ni taqomaki rawa. Era sega ni lewai vakamatau na Jiu era suka yani. Era yalolailai tu, ra qai sega tale ga ni savasava ena mata i Jiova. E dina ni sa lesia o Tui Atakisekise me taravaki tale na bai kei Jerusalemi, ia sega dede, sa qai liaca o Niemaia ni rau sevaka dina na nona ilesilesi o rau na kovana mai na rua na vanua volekata. “Erau sa rarawa vakalevu ni sa lako mai e dua na tamata me segata na ka me ra vinaka kina ko ira na Isireli.”​—Niemaia 2:​10.

¹⁴ Dua na ka na nodrau sasaga na meca oya me rau tarova na cakacaka i Niemaia. De a vaka sara ga na votonikau mosimosi na nodrau vosa ni veivakarerei, lasu, veivakaisini, kei na vosa kaukaua vua​—wili kina o ira na yamata vuni era talai yani mera lai vakayalolailaitaki koya. A soro beka o Niemaia ena nodra ilawaki qaseqase na meca? Sega! A sega ni vakamalumalumu, ia a nuitaki Jiova ga. Mani vakaoti na bai kei Jerusalemi, qai vakadinadinataki kina ni a lomani Niemaia dina o Jiova qai tokoni koya.​—Niemaia 4:​1-​12; 6:​1-​19.

15. Na cava e so na ka a tarai ira tu na Jiu a lomaleqa kina vakalevu o Niemaia?

¹⁵ Ni kovana o Niemaia, e levu tale ga na leqa a sotava vei ira na tamata ni Kalou. E vakararawataki koya dina me vaka na votonikau mosimosi na leqa kece oya, ni kila o koya ni vakaleqa na nodra veiwekani na lewenivanua kei Jiova. O ira na vutuniyau era lavaka vakasivia na ivakacavacava vei ira na tacidra era sega soti ni rawati ira. Ia mera sauma rawa oya vaka kina na ivakacavacava e lavaka o Perisia, e so era volitaka sara ga na nodra qele se volitaki ira vakabobula na luvedra. (Niemaia 5:​1-​10) E levu na Jiu era sa sega ni doka na Siga ni Vakacecegu ra qai sega ni tokoni ira na Livai kei na veika e caka ena valenisoro. E so tale era vakawatitaka na “nodra yalewa na Asitoti, kei ira na Amoni, kei ira na Moapi.” Sa na wacava mada ga na kena vakamosi Niemaia oqo! Ia a sega ni vakasoroi koya e dua vei ira na votonikau oya. E dei toka ga na yalona me tutaka tiko ga na lawa ni Kalou. Meda vakatotomuri Niemaia mada ga, meda kua ni vagolei tani mai na noda qaravi Jiova tiko ga ena yalodina, e dina nira tawayalodina e so tale.​—Niemaia 13:​10-​13, 23-​27.

Era Sega ni Soro e Levu Tale Era Tamata Yalodina

16-18. E tarai Aisake kei Repeka vakacava na leqa mai vale, vaka kina o Ana, Tevita, kei Osea?

¹⁶ E tiko ena iVolatabu na kedra ivakaraitaki e levu tale a sega ni vakasoroi ira na ituvaki rarawataki e vaka na votonikau mosimosi. E so na ituvaki rarawataki e tara na bula vakavuvale. O rau na wati Iso erau vakavuna ‘na rarawa i Aisake kei Repeka,’ na nona itubutubu. A bau kaya sara o Repeka ni cata na bula ena vukudrau na wati Iso. (Vakatekivu 26:​34, 35; 27:46) Vakasamataki Ana tale ga, a dau “vakayalocataki koya vakalevu” o Penina, na ikarua ni wati Elikana, baleta ga ni yava. De dua, a vakalialiai vakalevu mai vale ena ka oqo o Ana. Ia a dau vakalialiai koya tale ga ena matadra e so tale o Penina​—ena matadra beka na wekadrau se nodrau itokani​—ni gole yani na nodratou vuvale ena soqo a dau caka mai Sailo. Na kena mosimosi vei Ana ena vaka beka na mosimosi ni votonikau e sa qai lobo ga yani ena vicikoniyago.​—1 Samuela 1:​4-7.

¹⁷ Vakananuma mada na veika a vosota o Tevita ni a vuvutaki koya vakaca o vugona, o Tui Saula. A drovaki bula ena nona lai vuni voli ena qara era tu ena vanualiwa kei En-gedi, e levu kina na barinivatu lelevu qai rerevaki me cabeti se sirovi. Sa na wacava na levu ni nona vuturi, ni kila vinaka tu ni sega sara ga ni dua na nona cala vei Saula. Ia, ena vuku wale ga ni vuvu ca i Saula, a veidroyaki tiko vaka oya o Tevita me vica vata na yabaki.​—1 Samuela 24:​14, 15; Vosa Vakaibalebale 27:4.

¹⁸ Vakasamataka mada na leqa levu a tara na vuvale i Osea na parofita. A veibutakoci o watina. De dua, na mosimosi ni ka oya e vaka sara ga ni votoki tu na utona ena dua na tikinikau. Qai mai kuria ga na levu ni nona rarawa ni raica ni sa vakavuana na veibutakoci i watina, erau sucu kina e rua na gone!​—Osea 1:​2-9.

19. A vakacacani vakacava o Maikaia?

¹⁹ Na veivakacacani e dua tale na leqa e vaka na votonikau dau veilauti. Vakasamataka mada na ka a sotava na parofita o Maikaia. De a vakararawataka dina na loma i Maikaia, na tamata yalododonu, nona raica ni golevi ira na parofita vakailasu na tui ca o Eapi qai vakabauta na nodra lasu botoboto. Ia ni sa tukuna vei Eapi o Maikaia ni o ira na parofita oya era vosa tiko ena veiuqeti ni “yalo lasulasu,” na cava e qai cakava na nodra iliuliu na parofita dau veidabui? Me cava tale, e “sabici Maikaia e baluna”! Ia e ca sara na ka e cakava o Eapi ni sa tau oti vua na ivakaro i Jiova ni na guce na nona sasaga me lai kabai Remoci mai Kiliati. A kaya o Eapi me bala i valeniveivesu o Maikaia, qai soli vakalailai ga na kena kei na mena. (1 Tui 22:​6, 9, 15-​17, 23-​28) Nanumi Jeremaia tale ga kei na ka era cakava vua na kena meca dauveivakatotogani.​—Jeremaia 20:​1-9.

20. Na votonikau cava a vosota o Neomai, ia a qai vakalougatataki vakacava?

²⁰ Na mosimosi ni nodra takali na wekada lomani e rawa tale ga ni vaka na mosi ni votonikau dau veilauti. A sega wale ga ni leqa na wati Neomai, o rau tale ga na luvena tagane. A lesu i Peceliema ni se vusolo tu ga na lomana ena levu ni rarawa. A tukuna vei ira na nona itokani mera kua ni kacivi koya me o Neomai, ia me o Mara ga, na yaca e tukuna tu na levu ni nona lomararawa. Emuri, ena vuku ni nona vosota, sa qai vakalougatataki koya o Jiova ena sucu ni dua na makubuna. Na makubuna oya a qai dua vei ira na tubu i koya na Mesaia.​—Ruci 1:​3-5, 19-​21; 4:​13-​17; Maciu 1:​1, 5.

21, 22. A tarai Jope vakacava na leqa, ia a beitaka beka na Kalou?

²¹ Sa na wacava mada na kidacala i Jope ni sa rogoca na nodratou mate vakasauri na tini na luvena lomani, vaka kina na butakoci ni nona manumanu kei na nodra labati na nona tamata cakacaka. Vakasauri ga, sa bikai koya na leqa vakaitamera! Ni se vusolo tu ga na loma i Jope ena leqa kece oqori, sa yaviti koya tale o Setani ena dua na mate ca. Nanuma sara ga o Jope ni sa na mate kina. Na kaukaua ni mosi, e nanuma me sa mate ga me vakacegu.​—Jope 1:​13-​20; 2:​7, 8.

²² Ni sa tu mada na ka kece oya, sa qai lako tale yani o watina qai kaya vua ena dela ni rarawa kei na yalo vuturi levu: “Mo vosavakacacataka na Kalou, ka mo mate ga.” Bau vosovosoti dredre dina na votonikau oya! Oti, ratou sa qai gole yani vei Jope na tolu na nona itokani, ia eratou sega ni vakacegui koya, eratou lai beitaki koya ga ena so na ka e vaka me dina tu na kena irogorogo, ratou qai kaya ni vu ni nona leqa na nona valavala ca lo tiko. Na nodratou veibeitaki lasulasu e vaka me sa qai lobo ga kina ena lewena na votonikau. Kua ni guilecava ni a sega ni kila o Jope se cava e sotava tiko kina na veika rarawataki oya, a sega tale ga ni kila ni na sega ni mate. Ia, “e na ka kecega oqo sa sega ni cala kina ko Jope, se kaya ko koya ni sa cala na Kalou.” (Jope 1:​22; 2:​9, 10; 3:3; 14:13; 30:17) E dina ni coba vata vua ena dua ga na gauna e vica vata na votonikau, a yalodina tiko ga. Sa bau veivakauqeti dina na nona ivakaraitaki!

23. Na cava era vosota rawa kina na veimataqali votonikau o ira na tamata yalodina eda sa veivosakitaki ira oti mai?

²³ Na ivakaraitaki e so eda sa raica oti mai oqo e sega ni o koya kece. E levu tale era tu ena iVolatabu. O ira kece na tamata yalodina oya a tiko tale ga na votonikau e dau vakararawataki ira voli. Qai duidui sara na leqa era sotava! Ia e dua ga na ka era tautauvata kina. Era sega vakadua ni soro ena nodra qaravi Jiova. Dina ni rarawataki vakalevu na veivakatovolei era sotava, era qaqa ga vei Setani ni vakaukauataki ira o Jiova. Era qaqa vakacava? Ena qai saumi na taro oqo ena ulutaga e tarava, eda na raica tale ga kina se cava meda cakava meda na kua ni soro se mani votonikau vakacava e vakararawataki keda.

[iVakamacala e ra]

O na Sauma Vakacava?

• Na cava e rawa ni tukuni kina ni leqa eda sotava e vaka na votonikau?

• Na cava e so na votonikau a vakararawataki Mefiposece kei Niemaia?

• Na ivakaraitaki i cei e lauti iko vei ira na tagane kei na yalewa era sega ni soro e dina ni duidui na votonikau a vakararawataki ira, ia na cava o kaya kina oqori?

[iYaloyalo ena tabana e 15]

A sega ni soro o Mefiposece dina ga ni lokiloki, lasutaki na kena itukutuku, qai tuburi koya na lomararawa

[iYaloyalo ena tabana e 16]

A sega ni soro o Niemaia e dina ni tusaqati