Vakavulica na Luvemu
O Bau Nanuma ni o Sega ni Taleitaki?
NI SEGA ni ciqomi e dua me lewe ni dua na ilawalawa, kena ibalebale e sega ni taleitaki. De dua e duatani na roka ni kuli ni yagona se duatani na nona ivosavosa se ivakarau ni nona cakava na ka. O bau nanuma ni o sega ni taleitaki ena so na gauna?—a
Meda raica mada na kena italanoa e dua na tagane a va tale ga qori na nona rai. Na yacana o Mefiposece. Eda na vulica qo se o cei o koya, kei na vuna a nanuma kina ni sega ni taleitaki. Ke o nanuma ni o sega ni taleitaki ena so na gauna, e levu na ka o rawa ni vulica vei Mefiposece.
E tamai Mefiposece o Jonacani, na itokani voleka i Tevita. Ni bera ni mate ena ivalu o Jonacani, a kerea vei Tevita: ‘Maroroi ira na luvequ.’ Ni sa tui o Tevita, a nanuma lesu ena vica na yabaki e muri na vosa i Jonacani ni se bula tiko na luvena o Mefiposece. A sotava e dua na vakacalaka ni se gone, a vakavuna me lokiloki ena nona bula taucoko. O raica rawa na vuna a rairai nanuma kina ni sega ni taleitaki?—
A via caka vinaka o Tevita vei Mefiposece na luvei Jonacani tagane. A mani tukuna me lai tiko ena dua na vale volekata na nona itikotiko mai Jerusalemi, me rau dau kana vata tale ga. A soli Sipa, o ira na luvenatagane, kei ira na nona dauveiqaravi mera lai qaravi Mefiposece. A kauaitaki luvei Jonacani o Tevita qai dokai koya dina! O kila na ka e yaco?—
A yaco na leqa ena vale i Tevita, ni a saqati koya na luvenatagane o Apisalomi qai saga me tui. A mani dro o Tevita me bula. E levu era lako vata kei koya, a via lako tale ga o Mefiposece. O ira na itokani dina qori i Tevita era kila ni o koya ga e dodonu me tui. Ia e sega ni rawa ni lako o Mefiposece ni lokiloki.
A tukuna o Sipa vei Tevita ni sega ni lako o Mefiposece ni vinakata tiko me tui. A vakabauta na lasu oya o Tevita! A mani solia vei Sipa na ka kece e taukena o Mefiposece. A druka o Apisalomi, mani lesu i Jerusalemi o Tevita. Sa qai tukuna vua o Mefiposece na ka e yaco dina. A vakatulewataka kina o Tevita me rau veimamataka o Mefiposece kei Sipa na iyau. Na cava o nanuma ni cakava o Mefiposece?—
A sega ni kudruvaka ni tawadodonu na ka e vakatulewataka o Tevita. E kila o Mefiposece ni na vakataotaka ga qori na nona cakava vinaka na tui na nona cakacaka. A mani tukuna me taura kece ga o Sipa na iyau. E bibi ga vei Mefiposece ni dauveiqaravi i Jiova o Tevita sa mai tiko tale e Jerusalemi me tui.
E vakavu rarawa vei Mefiposece e levu na ka e sotava. E dau nanuma ni sega ni taleitaki. Ia e lomani koya o Jiova, e karoni koya tale ga. Na cava eda vulica kina?—Ke da cakava mada ga na ka e dodonu, eso era se rawa ga ni tukuna na ka lasu me baleti keda. A kaya o Jisu: “Ke cati kemudou o vuravura, mo dou kila ni a cati au e liu qai cati kemudou e muri.” Eso mada ga era vakamatei Jisu! Ke da cakava tale ga na ka e dodonu, meda nuidei ni na lomani keda na Kalou dina o Jiova, kei na Luvena o Jisu.
Wilika ena nomu iVolatabu
2 Samuela 4:4; 9:1-10; 19:24-30;
[iVakamacala e ra]
a Ke o wiliwili tiko kei na dua na gone, mo cegu ni o raica na itoqa balavu o qai uqeti gone me tukuna na nona nanuma.