Cava na Nomu Rai me Baleta na Mate?
NIDA veitosoyaki voli ena noda bula ena veisiga, eda dau lai yalolailai wale ke da vakasamataka na mate, veitalia se da mani bulabula vinaka se da vakavatu tu vakacava. Ni rawa nida mate ena gauna eda takoso kina e gaunisala se da davo sara tu ga ena imocemoce. Nodra vakacaca na batikadi ena 11 Sepiteba, 2001, mai Niu Yoka kei Washington, D.C., e vakadinadinataka vei keda ni o mate, “na i otioti ni meca,” e rawai ira kece na tamata e duidui na ivakatagedegede ni nodra bula kei na nodra yabaki ni bula, so na gauna e vica vata na udolu era vakayalia na nodra bula ena vica wale ga na miniti.—1 Korinica 15:26, VV.
Eda rikou ena itukutuku vaka oqo, ia na mate e dua na ka eda dau kauai kece kina. E dau voli vakalevu wale kina na niusiveva se ra sarava e levu na retioyaloyalo ke vakaraitaki kina na itukutuku ni mate, vakabibi ke ra mate ena dua na ituvaki vakaloloma e lewe vica vata. E vaka ni sega nida dau mamau rawa ena noda via rogoca na itukutuku ni mate, na kena e vu mai na ivalu, leqa tubukoso, ivakarau kaukaua se mate veitakavi. Na kauaitaki vakasivia ni mate e laurai tale ga ena nodra dau luvuci ena rarawa na lewenivanua ke mate e dua na tamata rogo, se kilai levu.
E sega ni dua e rawa ni vakacala oqo. Era dau kauaitaka vakalevu na mate na tamata—na nodra mate na tani. Ia, eda dau via vakalecalecava na noda mate. Ni noda mate e dua na ka eda sega ni dau via vakasamataka.
Se Cava Eda Mate Kina?
Eda sega ni taleitaka meda vakasamataka na noda mate, ia e dau vaka ga oya. Na cava e vuna? Ni a vakatikora e lomada na Kalou na gagadre ni bula tawamudu. E kaya na Dauvunau 3:11: “Sa vakatikora ki lomadra na gauna ena sega ni mudu.” O koya gona, ni yaco tiko ga na mate, e veisaqasaqa kina kei na ka eda gadreva. Ena kena sagai me vakamacalataki na ibalebale ni veisaqasaqa oqo, kei na noda gadreva meda bula tu ga, e tauyavutaki kina e so na mataqali vakabauta me vaka na tawamate rawa ni yalo kei na bula e dewa ina dua tale na bula (reincarnation).
Io, e sega ni dua e lecava ni dau lomaleqataki qai rerevaki na mate, e dina oqo ina matatamata kece. Meda kua gona ni kurabuitaka na nodra raica na mate na matatamata kece me ka e dau veivakayalolailaitaki. E matata e dua na ka, o mate e vakavotuya na tawayaga ni bula e vakaliuci kina na vaqara vutuniyau kei na vakacolasau.
Mate Taudua
E liu, era dau vakatarai na tauvimate bibi se o ira na mavoa vakaca sara mera mate ga e vale, ni ratou toka volekati koya na nona vuvale. A yaco vakalevu oya ena gauna vakaivolatabu, e se yaco tiko ga oqo ena so na vanua. (Vakatekivu 49:1, 2, 33) Ena veivanua e vakayacori tiko kina, era dau soqo vata mai vakavuvale mera veivosaki, wili kina o ira na gone. Vua na lewenivale yadua, ena bau vakamamadataka na nona rarawa ni ratou veivuketaka na veiqaravi, ratou qai osivaka vata na wekadratou e mate.
E duidui sara vakalevu oqo kei na vanua e dau vakatabui kina na veivosakitaki ni mate, e raici me ka rerevaki, ra sega ni wili kina na gone ni nanumi e sa na “rui tarasui” vei ira. Sa duidui vakalevu sara na mate nikua, qai levu era mate taudua. E vuqa era vinakata mera mate ga e vale, me qaravi ira vakayalololoma na nodra vuvale. Ia, e ka ni rarawa ni levu era mate taudua ga e valenibula, ena dela ni mosi, ra qai rikou mada ga ena levu ni paipo ni wainimate e veidodoyaki tu e yagodra. Ena yasana kadua, e sega ni kilai na le vica vata na milioni era vakamatei ena vuku ni labakawa, lauqa, AIDS, ivalu ni lewenivanua se ena nodra dravudravua.
Me Vakasamataki Vakabibi
E vakauqeti keda na iVolatabu meda vakasamataka na mate. Ni tukuna vei keda na Dauvunau 7:2: “Sa vinaka me lako ki na vale ni tagi, ka ca me lako ki na vale ni kana magiti: ni sa kenai otioti ni tamata kecega oqo.” Nida kila na ka dina me baleta na mate, eda na sega ni ogataka ga na ka ni bula se na cakacaka ni veisiga, eda na kauaitaka na lekaleka ni noda bula. Ke vaka oya eda na saga me vakainaki na noda bula, eda na sega kina ni vakawalena se vakamaumautaka tu ga.
Na cava na nomu rai me baleta na mate? O sa bau vakadikeva beka na ka o nanuma, vakabauta, nuitaka, kei na cava o rerevaka me baleta na itinitini ni nomu bula?
E sega ni katuma rawa na tamata na veika matailalai me baleta na bula kei na mate. E kila ga na noda Dauveibuli na kena ivakamacala nuitaki. Ni tiko vua “na waivure ni bula,” e “nodai drodro [tale ga] mai na mate.” (Same 36:9; 68:20) Eda na kurabuitaka beka, ia nida dikeva vata kei na Vosa ni Kalou e so na ivakavuvuli e dau vakabauti tu vakalevu me baleti ira na mate, ena vakacegui keda qai veivakauqeti. Ena laurai tale ga kina ni sega ni itinitini ni ka kece ga na mate.
[Tikina bibi ena tabana e 4]
Noda kila nida na mate ena rawa ni vukei keda meda saga me vakainaki na noda bula