Taro na Dauwiliwili

Ena gauna cava soti ena gadrevi kina vua na tacida yalewa lotu Vakarisito me ubia na uluna ni muria na ivakavuvuli ni iVolatabu?

“Na yalewa yadua sa masu se parofisai ni sa sega ni ubi na uluna, sa sega ni doka na uluna,” a vola na yapositolo o Paula. Na cava na vuna? Baleta oqo na ivakavuvuli vakaivolatabu ni itutu ni veiliutaki: “Na ulu ni yalewa na tagane.” E nona itavi na tagane na masu kei na vunau ena loma ni ivavakoso vakarisito. O koya gona, kevaka e dua na yalewa lotu Vakarisito e vakayacora na itavi ni sokalou e dau cakava ga o watina se dua na tagane papitaiso, e dodonu me ubia na uluna.​—1 Korinica 11:​3-​10.

Ena ubia na uluna na yalewa lotu Vakarisito kevaka e yaco e so na ituvaki ena loma ni bula vakawati. Kena ivakaraitaki, ni ratou dau soqoni vata mai na lewenivuvale me ratou vuli iVolatabu se kana, ena dau liutaka na ulunivuvale na veivakavulici qai matataki iratou na lewenivuvale ena masu vua na Kalou. Kevaka e tawavakabauta o ulunivuvale, ena colata na watina na itavi oqo. E dodonu me ubia na uluna na tacida yalewa lotu Vakarisito kevaka e masu vakadomoilevu me baleti koya kei ira e so tale se vakavulici iratou na luvena ena iVolatabu ni tiko o watina. Me kua ni ubia na uluna o yalewa kevaka e sega ni tiko o watina, ni ivakaro ga vakalou vua me vakavulici iratou na luvena.​—Vosa Vakaibalebale 1:8; 6:​20.

Vakacava kevaka e dua na gonetagane ena loma ni vuvale e sa yalayala qai papitaiso me dua na dauveiqaravi ni Kalou o Jiova? Ni sa lewena na ivavakoso vakarisito na gonetagane, e dodonu mera vakavulici koya na tacina tagane vakayalo. (1 Timoci 2:​12) Kevaka e vakabauta o tamana, e dodonu me vakavulici luvena tagane. Kevaka e sega ni tiko o tamana, e dodonu me ubia na uluna o tinana ke vakavulici luvena tagane papitaiso kei iratou na vo ni gone ena iVolatabu. Ena qai vakatau ga vei tinana me masu na luvena tagane ena gauna ni vuli se na gauna ni kana. Ena rawa ni masu ga o tinana ke nanuma ni se sega ni ganiti luvena tagane me masu. Ia ke sa mani masu, me ubia ga na uluna.

Ke ra vakaitavitaki ira ena so na itavi ni ivavakoso na yalewa lotu Vakarisito, ena gadrevi mera ubia na uludra. Kena ivakaraitaki, ena soqoni ni cakacaka vakavunau ena loma ni macawa, era na tiko beka ga kina o ira na yalewa lotu Vakarisito. Ena so na gauna ena sega beka ni dua na tagane papitaiso e tiko ena soqoni ni ivavakoso. Kevaka e vakaitavi e dua na tacida yalewa ena itavi era dau taura ga na tagane ena soqoni e vakarautaka na ivavakoso se na soqoni ni cakacaka vakavunau, e dodonu me ubia na uluna.

E dodonu beka vua na yalewa lotu Vakarisito me ubia na uluna kevaka e vakadewataka e dua na vunau ina dua tale na vosa se me matanataka na vosa vagalu? Vakacava kevaka e wilika e matanalevu na parakaravu mai na ivola vakaivolatabu e vulici ena soqoni ni ivavakoso? Ena sega ni gadrevi me ubia na uluna. O ira na tacida yalewa era vakaitavi vaka oqo era sega ni veivakatawani se veivakavulici tiko. O ira tale ga na tacida yalewa era vakaitavi ena vakatasuasua, soli vakasavuirogorogo se vakaitavi ena Koronivuli ni Vuli Vunau e sega ni gadrevi mera ubia na uludra.

Na tagane e papitaiso, e nona itavi na veivakavulici ena loma ni ivavakoso, ia e nodrau itavi ruarua na tagane kei na yalewa lotu Vakarisito na veivakavulici kei na vunau ena taudaku ni ivavakoso. (Maciu 24:14; 28:​19, 20) Ke vunautaka tiko na Vosa ni Kalou e dua na yalewa lotu Vakarisito vua e dua e sega ni iVakadinadina, rau qai salavata tiko kei na dua na tagane iVakadinadina i Jiova, ena sega ni gadrevi me ubia na uluna.

Ena duatani na ituvaki kevaka e sa dau kena ivakarau tiko me caka na vuli iVolatabu ena dua na vale, ia ena dua na vuli e qai tiko kina e dua na tagane yalayala qai papitaiso. E sa loku oti tu na gauna ni vuli oqo, ni o koya e taura na vuli ena veivakavulici tiko. Na vuli vaka oqo e wili me dua tiko na ituvatuva ni ivavakoso. Kevaka e taura na vuli e dua na iVakadinadina yalewa sa papitaiso, qai tiko tale ga kina e dua na iVakadinadina tagane papitaiso, e dodonu vua na yalewa me ubia na uluna. Ia me masu ga na tacida tagane oya. Ena sega ni masu na tacida yalewa ke tiko e dua na tacida tagane yalayala, vaka vo ga kevaka e tiko e dua na vuna vinaka sara me vaka sa sega ni rawa ni vosa na tacida tagane oya.

Ena so na gauna erau na lako vata beka ina vuli iVolatabu kei na yalewa lotu Vakarisito e dua na tacida tagane dautukutuku bera ni papitaiso. Ena vakatau vua na tacida yalewa oya se o cei me taura na vuli. Ena ganiti koya na tacida yalewa me masu ni sega ni rawa vua na tacida tagane me matataki koya na yalewa yalayala oti vua na Kalou ena masu. Kevaka e taura na vuli na tacida yalewa qai masu, e dodonu me ubia na uluna. Dina ga ni bera ni papitaiso na tacida tagane oya, era raici koya mai taudaku ni lewe ni ivavakoso vakarisito o koya ni sa vakaitavi tiko ena cakacaka ni veivakavulici.

“Sa dodonu kina me tu nai ubi e na ulu ni yalewa mei vakatakilakila ni kena malumalumu, e na vukudra na agilose,” a vola na yapositolo o Paula. Io, era ivakaraitaki vinaka na yalewa lotu Vakarisito vei ira na milioni na agilosi era yalodina ena nodra vakamalumalumutaki ira vei Jiova. E yaga dina vei ira na marama lotu na nodra ubia na uludra ena ituvaki e veiganiti!

[iYaloyalo ena tabana e 26]

Ni ubi na ulu e vakaraitaka ni dokai na itutu ni veiliutaki