Kato ni Taro

◼Vakacava ena ubi na uluna na tacida yalewa ke tomani koya e dua na tagane e dautukutuku ena vuli iVolatabu e matanikatuba?

Ke dua na tacida yalewa dautukutuku e sa dau vakavulica tiko e dua ena iVolatabu qai tomani koya e dua na tacida tagane dautukutuku, e dodonu me ubi na uluna. (1 Kor. 11:​3-​10) E tukuna na Vale ni Vakatawa ni 15 Julai 2002, tabana e 27: ‘E sa loku oti tu na gauna ni vuli qo, sa macala tale tu ga o koya me taura na vuli. Na vuli va qo e wili me dua na ituvatuva vakaivavakoso. Ke taura na vuli e dua na iVakadinadina yalewa papitaiso, qai tiko tale ga kina e dua na iVakadinadina tagane papitaiso, e veiganiti vei yalewa me ubia na uluna.’ Ena vakayacori qori ke caka na vuli iVolatabu e vale, matanikatuba, se dua tale na vanua.

Ia ke se bera ni vakadeitaki na vuli iVolatabu e vakayacori tiko e matanikatuba, ena sega ni gadrevi vua na tacida yalewa dautukutuku me ubia na uluna ke veitomani e dua na tacida tagane dautukutuku, ke inaki mada ga ni veisiko me vakatovotovotaki na vuli iVolatabu se me veivosakitaki na ivola e dau caka kina na vuli. Me vaka ni taura na gauna me qai vakadeitaki e dua na vuli iVolatabu e caka e matanikatuba, so na gauna ena vica vata sara na veisikovi lesu, ena vinakati kina vei rau na dautukutuku me rau vakalewa na ituvaki, de dua erau na raica ni veiganiti me sa tekivu ubi na ulu.