Taro na Dauwiliwili

E veiganiti beka me ubia na uluna na yalewa lotu vaKarisito, ni vakadewataka tiko ena vosa vagalu na vunau vakaivolatabu ena soqoni, soqo ni tabacakacaka kei na soqo ni tikina?

E dodonu me ubia na uluna na yalewa lotu vaKarisito ni qarava na itavi e lesi ga vei watina se o ira na tagane ena ivavakoso. Qo e salavata kei na ivakavuvuli a tukuna o Paula ni “yalewa yadua sa masu se parofisai ni sa sega ni ubi na uluna, sa sega ni doka na uluna” baleta ni “ulu ni yalewa na tagane.” (1 Kor. 11:3-10) Koya gona, ni ubia na uluna na yalewa lotu vaKarisito ena ituvaki va qori e vakaraitaka nona vakamalumalumu ena ituvatuva ni ivavakoso vaKarisito ​—1 Tim. 2:11, 12.a

Ia vakacava na nona vakadewataka na vunau ena vosa vagalu? Dina ni na matanataka tiko ga vei ira na mataveitacini, ia e vunau tiko na tacida tagane, sega ni o koya. Na vakadewa vosa vagalu e duidui mai na vakadewataki ni vosa e vosataki. Ena vakadewa vosa, era na raici koya e vunau tiko na vakarorogo, era na rogoci koya tale tiko ga e vakadewa. Na yalewa lotu vaKarisito e vakadewa ena vosa ena sega ni laurai levu. So na gauna ena rairai dabe toka ga, ia ke tu cake ena vakanamata vei koya e vunau sega ni vei ira na vakarorogo. Koya gona, e sega ni vinakati me na ubia na uluna ni vakadewataka na vosa e vosataki.

Ni vakayagataki na iyaya vakalivaliva vovou e tu ena gauna qo, sa dau laurai levu o koya e vakadewataka na vosa vagalu. Era na raici koya kece na mataveitacini ena dua na retioyaloyalo levu ni vakacagau tiko na vunau, ia ena sega ni laurai levu sara o koya e vunau. Ena vuku ni tikina qo, ena veiganiti vua na yalewa lotu vaKarisito e vakadewa ina vosa vagalu me ubia na uluna me vakaraitaka ni vakadewa tiko ga o koya.

E tara vakacava na idusidusi vou qo na itavi ena Koronivuli ni Vuli Vunau, vakatasuasua, kei na saumi taro ena Vuli iVolatabu ni iVavakoso, Soqoni ni Cakacaka, kei na Vuli Vale ni Vakatawa? Ena ubia tale ga na uluna na yalewa lotu vaKarisito e vakadewa ina vosa vagalu ena gauna va qori? Ena so na ituvaki ena sega ni vinakati me ubia na uluna baleta nira kila vinaka na vakarorogo ni sega ni liutaka tiko o koya na soqoni. Me kena ivakaraitaki, ni vakadewataka tiko nodra isaunitaro na mataveitacini, nodra itavi na yalewa lotu vaKarisito, se vakatasuasua. Ena ubia ga na uluna ni vakadewataka nodra vunau na tacida tagane ena soqoni, se na Vuli Vale ni Vakatawa, Vuli iVolatabu ni iVavakoso, se nona liutaka na lagasere. Ena dua na soqoni, ena rairai lesi e dua na yalewa lotu vaKarisito me vakadewa vei ira na tacida tagane, vei ira na tacida yalewa, vei ira na gone, se vei ira na qase ni ivavakoso. Ena ituvaki va qo, ena rairai ka vakayalomatua me ubia na uluna ena soqoni taucoko.

[iVakamacala e ra]