Taro na Dauwiliwili

Ena okati beka me dua na basoga ni lotu cokovata na kena voli e dua na vale e taukena e dua na matalotu, qai vukici me Kingdom Hall?

E sega ni dau kena ivalavala vei ira na iVakadinadina i Jiova mera cakava na mataqali veivoli vaka oqo kei ira na matalotu tale e so. Ia ke mani caka, e sega ni kena ibalebale ni sa lai cokoti kina na lotu. E raici me dua na veivoli ga vakadodonu, e sega ni nakiti me na tokaruataki. Sega tale ga ni nodra inakinaki na ivavakoso ni iVakadinadina i Jiova era veivoli oya, mera na vukica na vale me vanua ni sokalou mera na qai wasea na kena vakayagataki kei na matalotu e volitaka.

Na cava gona na lotu cokovata ena rai i Jiova? Me dikevi na veidusimaki i Paula na yapositolo: “Dou kakua ni veitokani vata vakatani kei ira era sa sega ni vakabauta: sa veitokani vakaevei na yalododonu kei na tawa-yalododonu? se rau sa veiwekani vakaevei na rarama kei na butobuto? se rau sa veivinakati vakaevei na Karisito kei Piliali? se rau sa vakaitavi vata vakaevei ko koya sa vakabauta kei koya sa sega ni vakabauta? se rau na to vata vakaevei na vale ni Kalou kei na veimatakau? . . . O koya oqo Mo dou qai lako tani maivei ira, ia dou tawasei tu, sa kaya na Turaga, Ka dou kakua ni tara na ka sa sega ni savasava; Au na qai vakabauti kemudou.” (2 Korinica 6:​14-​17) Na cava e vakaibalebaletaka o Paula ni cavuta na vosa, “veitokani” kei na “veiwekani”?

Matata mai na ka e tukuna o Paula ni oqo e okati kina na sokalou, se veitaratara vakayalo kei ira na sega ni vakabauta se o ira na qaravi matakau. E vakaroti ira kina mai Korinica mera kua ni “kana . . . [e]na nodra tepeli . . . na tevoro.” (1 Korinica 10:​20, 21) E macala e ke, ni lotu cokovata e vauci kina na sokalou vata, se veitokani vakayalo kei ira na matalotu tale e so. (Lako Yani 20:5; 23:13; 34:12) O koya gona, ke voli e dua na vale a vakayagataka tu e dua na matalotu, ena baleta vakatabakidua ga ni qarai e dua na dago ni vale sa duri rawa tu. Ia, ni bera ni qai vakatokai me na dua na Kingdom Hall, sa macala ni na vakasavasavataki taucoko mada, me kau laivi mai kina na ivovo kece ni lotu lasu. Ni sa oti kece na veiveisau vaka oqo, sa rawa ni na qai vakatabui me sokaloutaki vakatabakidua kina o Jiova. E sega gona ni rau mai veiwekani se veitokani kina na sokalou dina kei na sokalou lasu.

Ia nida veivosakitaka na veika matailalai ni veivoli oqo, ena vinaka me vakarauta na noda veitaratara, me baleta vakatabakidua ga na voli ni vale. E vinaka gona vei ira na lewe ni ivavakoso vakarisito mera nanuma na veivakadreti i Paula, oya, me ‘kakua na veitokani vakatani kei ira era sa sega ni vakabauta.’ Eda sega ni beci ira na matalotu tani, ia eda sega tale ga ni lasami ira, se da laiva mera uli keda meda veitomani ena nodra sokalou.a

Ia, na cava na rai vakaivolatabu ke via redetaka na ivavakoso e dua na vale e taukena e dua na matalotu? Ke redetaki na vale, sa macala ni na wasoma na veitaratara kei na matalotu oya, me levei oqo. O koya gona, ke vakayagataki mada ga vakadua na vale oya, ena gadrevi vei iratou na ilawalawa qase me ratou vakalewa vinaka na veitikina oqo: E tu li e loma se ena taudaku ni vale na matakau, se ivakatakarakara vakalotu tale e so? Na cava na nodra rai na tiko voleka e kea ke da vakayagataka? De na tarabe beka kina e dua ena ivavakoso na noda vakayagataka na vale oya? (Maciu 18:6; 1 Korinica 8:​7-​13) Mera vakasamataka sara vakavinaka na qase na isaunitaro kece oqo ni bera nira vakatulewa. Kena ibalebale ni okati sara tale ga e ke na nodra lewaeloma, kei na nodra lewaeloma na lewe ni ivavakoso ni bera ni qai voli e dua na vale vaka oqo ena vakasama me vukici me Kingdom Hall.

[iVakamacala e ra]

[iYaloyalo ena tabana e 27]

Oqo a valenilotu tu, a voli qai veisautaki me Kingdom Hall