Lotu Cokovata, Cava na Rai ni Kalou?

E DUATANI na nodra rai na dau tokona na lotu cokovata. A taroga kina o Eboo Patel a tauyavutaka na isoqosoqo ni lotu cokovata na Interfaith Youth Core, “Tukuna mada mai vei au e dua na lotu e sega ni vakabibitaka na yalololoma . . . , taqomaki ni veikabula . . . , kei na veikauaitaki?”

Io, era cakacaka vata ena so na gauna na lotu Buda, Katolika, Lotu Tawase, Idu, Musolomani, kei na levu tale mera valuta na bula dravudravua, valataka na dodonu ni tamata yadua, saga me vakatabui vakalawa na buli ni gasau kuro bulu, kei na nodra saga mera kauaitaka na lewenivanua na veikabula. Era dau bose mera soli vakasama, mera veikilai tale ga kina. Ena nodra soqo mera marautaka kina na nodra duavata era dau waqa kadrala, lagasere, masumasu, kei na levu tale.

Ena walia na lotu cokovata na duiyaloyalo ena kedra maliwa na veimatalotu? E vakayagataka qori na Kalou me vinaka kina na ituvaki kei vuravura?

NA CAVA E SEGA KINA NA DUAVATA?

E sakitaka e dua na isoqosoqo levu duadua ni lotu cokovata nira lewena e sivia na 200 na duidui vakabauta qai tiko ena 76 na matanitu. Na inaki ni isoqosoqo qo mera “duavata tiko ga ena nodra cakacaka vata e veisiga.” Ia e rawarawa me tukuni, e dredre me caka. Me kena ivakaraitaki, era tukuna o ira na tauyavutaka na isoqosoqo qori, ni dau qarauni vinaka na vosa e biu ena nodra ivola ni veiyalayalati me kua ni beci kina na vakabauta ni dua na lotu kei na matatamata era sainitaka na ivola ni veiyalayalati. Na cava na vuna? Era veiletitaka me biu se kua na veika me baleta na Kalou ena ivola ni veiyalayalati. Era qarauna gona mera kua ni cavuta se veivosakitaka e dua na ka me baleta na Kalou.

Ke sa sega ni okati na Kalou ena ka era cakava, na cava na yaga ni nodra vakabauta? Ena duidui beka na isoqosoqo ni lotu cokovata mai na isoqosoqo dau veivukei? Sa rauta me tukuna na isoqosoqo lotu cokovata sa cavuti oti mai ni sega ni isoqosoqo vakalotu, ia e “isoqosoqo e dau veivakaduavatataki.”

SA RAUTA BEKA GA NA ITOVO VINAKA?

“Na lotu kece e tautauvata na ka era vakavuvulitaka: oya na veilomani, yalololoma, kei na veivosoti,” e kaya na Dalai Lama, e dau tokona na lotu cokovata. E kuria: “E bibi meda bulataka na itovo kece qori.”

E macala ni bibi dina na itovo me vaka na veilomani, yalololoma, kei na veivosoti. E kaya kina o Jisu ena ivunau e dau vakatokai me iVunau Koula: “Na ka kece oni vinakata mera cakava vei kemuni na tamata, moni cakava tale ga vei ira.” (Maciu 7:12) Ia sa koya beka ga oya na ka e okati ena vakabauta?

A kaya na yapositolo o Paula me baleti ira era kaya nira qarava na Kalou ena nona gauna: “Niu kila nira yalogu dina ena nodra qarava na Kalou, ia e sega ni salavata kei na ivakavuvuli dina.” Na cava na vuna? E tukuna tale: “Era sega ni kauaitaka na yalododonu ni Kalou nira via vakadonui ira ga vakataki ira.” (Roma 10:2, 3) Koya gona nira lecava na ivakavuvuli dina era sega ni kila kina na ka e vinakata na Kalou mera cakava, na nodra yalogu—kei na vakabauta—e tawayaga.—Maciu 7:21-23.

NA RAI NI IVOLATABU ME BALETA NA LOTU COKOVATA

E kaya o Jisu, “era marau o ira era guta na bula veiyaloni.” (Maciu 5:9) E dau vunautaka o Jisu mera veiyaloni na duidui vakabauta, e uqeta tale ga na duavata qai laurai qori ena nona bula. (Maciu 26:52) O ira era muria qori, e vakaduavatataki ira na ivau ni loloma. (Kolosa 3:14) Ia a inaki wale ga i Jisu me vakaduavatataki ira na matatamata me rawa nira veiyaloni? Vakacava a vakataivi tale ga ena nodra ivakarau ni sokalou eso tale?

E kaukaua sara na nodra tusaqati Jisu na nodra iliuliu na Farisi kei na Setoki—era saga tale ga mera vakamatei koya. Na cava a vakayacora o Jisu? A kaya ga vei ira na nona tisaipeli: “Na cava dou leqataka kina? O ira qori era dauveituberi mataboko.” (Maciu 15:14) A sega ni okati ira qori o Jisu mera tacina vakayalo.

Ena dua na gauna e muri, a tauyavu e dua na ivavakoso e Korinica, Kirisi—na siti e levu kina na duikaikai kei na lotu. Na cava mera cakava na lotu vaKarisito? A vola na yapositolo o Paula: “Moni kua ni vauci vata kei na dua e sega ni vakabauta.” Na cava na vuna? E vakamacalataka o Paula: “Erau duavata vakacava o Karisito kei Piliali? Se rau vakaivotavota vata vakacava e dua e vakabauta kei na dua e sega ni vakabauta?” Mani vakarota: “O koya gona, ni lako tani mai na kedra maliwa, ni tawasei kemuni.”—2 Korinica 6:14, 15, 17.

E matata ni vakacala na lotu cokovata na iVolatabu. De dua o na lomatarotarotaka, ‘Ena qai rawati vakacava na duavata?’

RAWATI NI DUAVATA

E vakatubuqoroqoro na cakacaka vakatekenoloji e tu ena waqavuka ni maliwalala e dau vakauitukutuku mai vuravura (International Space Station), qori na nodra cakacaka vata eso mai na 15 na matanitu. Ena rawa beka ni buli na misini vakatubuqoroqoro qo ke ra sega ni duavata mera muria na kena idusidusi na veimatanitu era vakaitavi kina?

E va qori na ka e yaco tiko ena lotu cokovata nikua. Dina nira cakacaka vata qai veidokai, ia era sega ni duavata ena ivakatagedegede mera muria. Qori e vakavuna nodra sega tiko ga ni duavata ena ivakavuvuli ni lotu kei na itovo savasava me muri.

E tiko ena iVolatabu na ivakatagedegede ni Kalou e vaka na idusidusi. E rawa gona nida yavutaka kina na noda ivakarau ni bula ena ka e tukuna. O ira era cakava qori era sa valuta rawa na veivakaduiduitaki vakamatatamata, vakalotu, ra vulica tale ga mera cakacaka vata qai veiyaloni. A tukuna tu mai na Kalou: “Ni’u na qai vukica na nodra vosa na veimataqali me vosa savasava, me ra masu kecega ki na yaca i Jiova, ka me ra qaravi koya e na lomavata.” Na “vosa savasava” qori e vakaduavatataki keda meda qarava na Kalou ena ivakatagedegede e vakadonuya.—Sefanaia 3:9; Aisea 2:2-4.

Era sureti kemuni na iVakadinadina i Jiova moni mai raica na nodra tiko veiyaloni kei na duavata ena dua na nodra Vale ni Soqoni e voleka vei kemuni.—Same 133:1.