Taro na Dauwiliwili

E dodonu beka na veimauilavo ke lailai ga na ilavo e veimautaki?

E sega ni vakamacalataka vakamatailalai na Vosa ni Kalou na veimauilavo, ia e matata mai na veika e volai kina ni veicalati na veimataqali veimauilavo kece kei na ivakavuvuli ni iVolatabu.a Me kena ivakaraitaki, e macala vakasigalevu tu ni veimauilavo e bucina na yalokocokoco. Oqo mada ga na imatai ni ka me qaqarauni kina na lotu Vakarisito, ni kaya na iVolatabu ni sega ni na rawata na Matanitu ni Kalou e dua na “daukocokoco,” qai semata tale ga na kocokoco kei na qaravi matakau.​—1 Korinica 6:​9, 10; Kolosa 3:5.

Na veimauilavo e vakabulabulataka tale ga na dokadoka kei na yalo ni veisisivi, ni guti na qaqa. E veivakadreti kina na yapositolo o Paula, ena nona vola: “Me da kakua ni gadreva me da dokai walega, se veicudruvi, se veivuvutaki.” (Kalatia 5:​26) Kuria oqo, na veimauilavo e uqeta na kena vakamanamanataki me sotavi na kalougata. Levu na ka era dau vakamanamanataka na dauveimauilavo, ra dau qai namaka me lutuki ira donu mada ga na madigi. Era tauvata kei ira na Isireli tawayalodina ena nodra a “vakarautaka na tepeli kakana vua na kalou ni Kalougata ka vakatawana na waini veiwaki me mena na kalou ni Nanamaki.”​—Aisea 65:​11, NW.

E so era nanuma ni ka ga ni lasa ke betitaki na ilavo lailai ga ena nodra veimau vakaveiwekani se veitokani, se ena qito vaka na vidividi se chess. Vua e betitaka e dua ga na ilavo lailai, sa macala ni na sega ni wiliki koya me dua e kocokoco, dokadoka, dau veisisivi se dau vakamanamana. Ia vua erau veisa ena qito, ena tarai koya vakacava? E levu e nodra malumalumu na veimauilavo era a tekivu ena betitaki ni ilavo lalai ‘me ka ga ni lasa.’ (Luke 16:10) Yaco gona me kati ira tale na ka era nanuma taumada me ka ga ni qito.

Vakabibi oqo vei ira na gone. Ena nodra marautaka na ilavo lalai era winitaka, e uli ira mera tovolea mera veimautaka na ilavo e levu cake. (1 Timoci 6:​10) Na matabose ni korolevu o Arizona e dau vukei ira na bobula ina veimauilavo, e tabaka mai Mereke na macala ni dua na vakadidike balavu, e vakadinadinataki kina ni levu vei ira na bobula ina veimauilavo era se tekivu taudonu ena “nodra betitaka na ilavo lalai ga ena qito, se ena nodra veimau kei ira na nodra itokani se na wekadra.” Duatani tale na itukutuku e kaya ni “o ira na gone era tekivu veimauilavo sara ga e vale, vakavuqa ena nodra veimau kei ira na nodra itokani se na wekadra.” Kuria na itukutuku vata tiko ga oqo ni “tolusagavulu na pasede ni gone era tekivu veimauilavo ni se bera mada ga nira yabaki tinikadua.” Ra qai vakailavotaka e levu vei ira na itabagone na nodra malumalumu oqo mai na nodra basulawa se ra volitaki ira, e kaya na vakadidike e vakatokai, Why Do People Gamble Too Much​—Pathological and Problem Gambling (Vuna Era Veimauilavo Kina Vakalevu​—Nodra Malumalumu, Ra Bobula ina Veimauilavo). Sa lai tini ca na ka a nanumi taumada me ka ga ni lasa!

Nida bula tu ena vuravura e sinai vutuvutu ena icori kei na ka ni veitemaki, na cava meda lai biuti keda kina vakasakasaka ina dua na ituvaki me qai kuria na leqa? (Vosa Vakaibalebale 27:12) Na veimauilavo​—nira tiko na gone se ra yali, na betitaki ni ilavo lailai se levu​—ena vakaleqa na noda bula vakayalo, meda kua gona ni rawai kina. Vei ira na lotu Vakarisito era taleitaka me ka ni veivakalasai na qito vaka na vidividi se chess, se veimau, e vinaka cake mera toqa ga ena dua na tikinipepa na kedra kai, se me kua sara ga ni toqai ni ka ga ni qito. Macala gona ni lotu Vakarisito yalomatua ena levea na veimauilavo ni kauaitaka na nona bula vakayalo, na nodra bula vakayalo na nona vuvale kei ira na nona itokani​—dina ga ni ilavo lailai sara e veimautaki.

[iVakamacala e ra]